Вирусот не ги заобиколува ниту Македонците кои живеат и работат во САД, а дел од нив за Канал 5 споделуваат дека атмосферата е нереална и стравуваат дека набрзо може да излезе од контрола. Димитри Златановски од Њу Џерси, вели дека пред неколку дена од вирусот загубил близок пријател по потекло од Кавадарци, кој изминатите две децении живее во САД, а неговото семејство исто така било позитивно на вирусот.
Бројката на заболени во САД, полека се движи кон 300 илјади, а тамошните власти веќе изразија стравување дека стапката на смртност ќе ги надмине сите до сега, со проекции од 100 до 250 илјади мртви. Кризата во САД, и покрај економските мерки, остави над 10 милиони американци без работа. Американскиот претседател Доналд Трамп, пак кој по втор пат направи тест за присуство на вирусот, најави нови мерки, за заштита на најзагрозените категории.
-Пишува дека Претседателот е негативен на Ковид -19, и ова е вториот тест, кој мислам дека го направив од љубопитност за да видам колку брзо може да се направи. Ги направив и двата и вториот пат морам да кажам дека е попријатен,изјави Доналд Трамп – Претседател на САД.
Домовите за стари лица треба да го забранат влезот на не медицински персонал. Денеска дополнително препорачуваме во сите вакви установи истиот персонал, да се грижи за истите лица, конзистентно, за да се минимизира потенцијално ширење на вирусот. Ги замолуваме и овие установи да одредат посебни простории за болни и здрави.
На европско тло пак, Шпанија со 120 илјади заболени стана главно кризно жариште по Италија. Земјата изминатото деноноќие регистрираше нови 900 мртви, со што вкупната бројка се искачи на близу 11 илјади починати. Врвот на црниот биланс се уште го држи Италија со 13 илјади мртви, најмногу од сите држави до сега.
На Балканот пак, Србија воведе забрана за движење од сабота во 13 часот до понеделник до 5 часот наутро. Од вчера во земјата се забранети и собири на повеќе од две лица на едно место. Во земјата до сега има близу 1.200 потврдени случаи и 28 мртви.