Излезноста беше 39,51 отсто, што е пониско од претходните избори.

Во меѓувреме, најголемата партија на косовските Срби, „Српска листа“, победи без втор круг во девет од десет општини со српско мнозинство.

Српска листа триумфира, но поголемиот дел од клучните градови одат во втор круг

Партијата поддржана од официјален Белград, „Српска листа“, ги освои сите десет општини во земјата каде Србите се мнозинство, според прелиминарните резултати. Партијата победи без потреба од втор круг во: Лепосавиќ, Ново Брдо, Штрпце, Звечан, Зубин Поток, Грачаница, Ранилуг, Партеш и Северна Митровица. Само во општината Клокот ќе има втор круг на гласање, каде кандидатот на „Српска листа“, Божидар Дејановиќ, ќе се натпреварува против Срѓан Спасиќ од Српско национално единство.

Трката за градоначалници останува отворена во клучните градови, вклучувајќи ги Приштина, Призрен, Пеќ, Ѓаковица и Митровица, откако ниту еден од кандидатите не обезбеди над 50 отсто од гласовите.

Според прелиминарните резултати, 21 општина ја завршуваат трката уште во првиот круг, меѓу кои:

Демократската партија на Косово (ПДК) победи без втор круг во Феризај, Скендерај и Хан на Елезот.

Движењето „Самоопределување“ (ВВ) успеа да обезбеди победа без втор круг во Каменица, Подуево и Штиме. ВВ ќе оди во втор круг во Приштина, Митровица, Пеќ, Ѓаковица и Призрен.

Демократскиот сојуз на Косово (ЛДК) победи во Истог и Липљан. Кандидатот Прпарим Рама ќе оди во втор круг во Приштина.

Алијансата за иднината на Косово (ААК) победи во Дечан и Клина.

Актуелниот градоначалник Рамиз Ладровци (кој се натпреваруваше со посебна листа) победи во Дренас без втор круг.

Реакции и нерегуларности

Претседателката на Косово, Вјоса Османи, истакна дека Србија континуирано интервенира во изборните процеси преку „Српска листа“.

- Како што знаете, Србија постојано интервенира во изборни процеси на Косово, ние природно со институциите за безбедност ќе направиме сè за да им се гарантира правото на слободно гласање на сите граѓани на Косово, вклучително и оние на северот. Сепак, се надевам дека по извештајот на европарламентарниот известувач за Косово, ќе имаме и повеќе меѓународни институции кои ќе реагираат и ќе преземат мерки за овие флагрантни кршења на меѓународното право од страна на Србија, кои вклучуваат и директна интервенција во изборите на друга држава, и во овој случај на Косово, користејќи различни методи, вклучително и криминални за овие интервенции, истакна Османи.

ЦИК соопшти дека изборниот процес генерално поминал мирно. Сепак, Косовската полиција и Државното обвинителство иницираа два случаи за „Нарушување на тајноста на гласањето“ и „Нарушување на слободното одлучување на гласачите“. Коалицијата на невладини организации „Демократија во акција“ пријави „многу изразена појава“ на гласање со асистенција и проблеми со листите на гласачи.

Претставници на ЕУ и дипломати, вклучувајќи ги британскиот амбасадор Џонатан Харгривс и амбасадорот на ЕУ Ајво Орав, ги набљудуваа изборите, оценувајќи го процесот како важен за демократијата и за очекуваното враќање на Србите во косовските институции.

Вториот круг на локалните избори во Косово, во општините каде ниту еден кандидат не освои над 50 отсто од гласовите, е закажан за 2 ноември 2025 година.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.