Маѓар оцени дека Шуљок е „недостоен да го претставува единството на унгарската нација, да го чува владеењето на правото и да биде морален ориентир“, пренесуваат унгарските медиуми.

Тој изјави дека лично му порачал на претседателот дека народот гласал за промена на режимот и дека, според него, Шуљок не ја исполнува својата улога.

- Имаше многу моменти кога требаше да реагира за да ги заштити децата или демократскиот поредок, но тоа не го направи - рече Маѓар.

Тој побара од Шујок доброволно да се повлече по смената на власта, предупредувајќи дека во спротивно тој и „другите поставени од владата на Орбан“ ќе бидат отстранети.

Шуљок изјави дека ќе ги разгледа аргументите, нагласувајќи дека и тој сака да го зачува владеењето на правото и угледот на Унгарија.

Маѓар најави дека новиот парламент би можел да ја одржи конститутивната седница на 4, 6 или 7 мај.

Тој, исто така, најави иницијатива за зајакнување на претседателската функција и воведување директен избор на претседател, со цел ограничување на моќта на премиерот и зајакнување на системот на контрола.

Маѓар вети дека ќе ги задржи позитивните политики на досегашната влада и ќе воведе нови мерки за поддршка на граѓаните, вклучително и програми за семејства, инвестиции во инфраструктурата, енергетска ефикасност и дополнителни средства за здравството.

Тој најави и враќање на замрзнатите средства од ЕУ во вредност од над 22 милијарди евра, преку антикорупциски мерки, приклучување кон Европското јавно обвинителство и реформи во правосудството и медиумите.

Во однос на разговорот со претседателката на Европската комисија, Урсула фон дер Лајен, Маѓар изјави дека ќе се исполнат условите што се во интерес на унгарските граѓани.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.