Според него, ниту се спроведуваат реформи, ниту се прават потребните чекори да се фати возот за ЕУ, а власта намерно ја изолира државата.

Прашан каде СДСМ и тој го гледаат излезот за евроинтеграциите, ако власта останува против уставни измени под овие услови, а ЕУ од друга страна останува на веќе договореното со францускиот предлог, Филипче вели решението е во Резолуцијата за црвени линии која СДСМ ја достави до сите партии, но досега ниту една не ја прифати.

- Тоа што граѓаните во 11 проценти само ги прифаќаат уставните измени за мене е еден од сигналите дека навистина се информирани за жал од центри којшто шират лажни вести... Затоа јас ја дадов предлог резолуцијата во која што за жал ниту една партија досега не одговори. Нашиот предлог беше да се обединиме. И да кажеме за што доколку понатаму во текот на преговорите се соочиме со некои непринципиени барања тогаш ние имаме консензус дека за јазикот, идентитетот, културата, историјата, не преговараме, тоа се заеднички црвени линии, изјави Филипче.

Евроамбасадорот Михалис Рокас во интервју за Канал 5 вчера јасно порача дека ставот на ЕУ е јасен и ако се исполнат преземените обврски Унијата е подготвена за брз почеток на преговорите со Македонија. Рокас вели дека ЕУ е свесна за разочарувањата на македонските граѓани на патот кон членство, но и дека Брисел останува сигурен партнер за земјата.

- Секогаш имам голема почит кон ставовите на премиерот. Но, ЕУ има став. Тој став е сосема јасен. Позицијата на ЕУ е многу јасна. Веќе се усвоени преговарачката рамка и заклучоците на Советот едногласно од страна на сите членки на ЕУ во 2022г. Ако тие обврски се исполнат, ЕУ е подготвена многу брзо да ги започне преговорите. Подготвени сме и мислам дека не треба повеќе да се чека, туку да се направи тој многу важен чекор напред, изјави Рокас.

Основата за градење доверба меѓу Скопје и Софија, евроамбасадорот ја гледа во билатералниот ангажман од двете страни и кажа дека ЕУ ќе поддржи секоја иницијатива за соработка меѓу Македонија и Бугарија, а како добар пример за соработка го спомена Коридорот 8 и заедничкото потпишување на договорот за изградба на тунелот на граничната железница.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.