Ова е нашата реалност која е сурова, вели Диме Велев, Претседател на Сојузот на здруженија на дијабетичари на Македонија. Тој смета дека околу 150 000 граѓани од кои 45 000 со дијабетес на инсулин се игронирани, дискриминирани, понижени и речиси обезличени од властите, а тоа е и главната причина за протестот закажан за утре во 19 часот пред Министерството за здравство.
-Ние немаме ни игли за аплицирање на инсулинот, нема сетови за децата со тип 1 до 18 години за пумпи, немаат антидијабетна терапија за новите пациенти, а донесена е, склучени се договори по тендери пред два месеци. Немаме одговор за нашите барања за референтна цена за глукомери и за медицинските помагала. Немаме одговори за кога ќе ја добиеме иновативната терапија што е потпишана и треба да ни се дистрибуира. Немаме одговор за едукација, која е задолжнителна по СЗО и по дијабетолошките протоколи да ги има секој пациент кога оди на контролен преглед. Значи ние скоро ништо немаме веќе во Македонија,- вели Диме Велев - Сојузот на здруженија на дијабетичари на Македонија.
Што е уште потрагично, нема ни емпатија од сограѓаните, а тоа се докажа со скандалозниот однос на жена која дрско прекина снимање на дете со дијабет додека нејзините родители раскажуваа за предизвиците, тврдејќи оти однапред го резервирала летниковецот во градскиот парк, вели Велев. Тој вели и дека во нашата земја се случува деца со дијабет 1 да не се примаат при упис во градинка или училиште, или пак на родителите им се поставуваат разни услови.
-Го осудувам тоа што се случи, од страна на тие. Не знам, луѓе беа, физички, ама најверојатно ментачно не се луѓе. Ова е трагедија за мене, искрено ви кажувам, малку сум емотивен, не глумам, сериозно кажувам. Сакам да потенцирам дека ние имаме посериозен проблем, и од овој, во Сојузот го разговараме, моментално се подготвува и протокол за работа со деца на училиште и градинки. Ни ги одбиваат, не ни ги запишуваат дечињата со тип 1, или ги запишуваат под некои услови дека родителот треба да доаѓа да аплицира инсулин, да доаѓа да ги рани, вели Диме Велев - Сојузот на здруженија на дијабетичари на Македонија.
Од Министерството за здравство за Канал 5 велат дека застојот на набавките не е по нивна вина и бараат разбирање од пациентите за настанатите состојби.
Во моментов течат жалбените постапки на набавката на ленти, процедура која не зависи од министерството. Жалиме што набавката доцнела, а требала да се започне уште во декември од претходното раководство. Што се однесува до набавката за сензори, таа е во фаза на евалуација и се очекува набрзо да заврши. Сите деца со дијабет, како и бремените и слепите лица за првпат ќе добијат вакви сензори, велат од Министерството.