Во објава на Х, порано Твитер, Викиликс сподели таен документ на израелското разузнавање од октомври 2023 година, за кој тврди дека споменува израелски план за намерно протерување цивили од Газа во Египет, пренесе Индекс. Викиликс наведува дека израелските власти заклучиле дека „таква стратегија би донела долгорочни позитивни резултати“.
„Планот предвидува процес во три чекори кој вклучува воспоставување шаторски населби во Синај и отворање на хуманитарен коридор, по што ќе следи изградба на градови во северен Синај, од кои нема да има враќање“, напишаа со линк до целосниот документ.
Војната во Појасот Газа трае речиси девет месеци откако терористите на Хамас го нападнаа јужниот дел на Израел и убија 1139 луѓе, главно цивили, а киднапираа уште 250 луѓе и ги одведоа во Газа. Одговорот на Израел беше жесток и продолжува, а израелските власти тврдат дека нема да запрат додека не го уништат Хамас.
Во нападите на израелската армија врз Газа загинаа 35.000 Палестинци, од кои 56 отсто жени и деца, а десетици илјади луѓе беа ранети. Израел се соочува со критики за масовно кршење на човековите права и присилна евакуација на цивили, а некои земји дури и го обвинија дека извршил геноцид.
Да потсетиме, Џулијан Асанж, основачот на Викиликс, сајт кој од 2006 година објавува низа доверливи документи на светските влади и разузнавачки агенции, се врати во Австралија пред една недела откако се договори со судот и се изјасни за виновен за американската шпионажа. Со години, САД бараа екстрадиција, судење и драконска казна за Асанж за откривање на доверливи документи и идентитети на функционери на американските разузнавачки служби, со кои што, според нив, ги загрозиле нивните животи.