Сите фактори во Македонија да придонесат за успешен референдум. Европската Унија ќе биде целосна, само со интегриран Западен Балкан. Ова е повеќе или помалку очекуваната порака која од Скопје ја испрати австрискиот канцелар Себастијан Курц, само ден по посетата на првиот човек на алијансата каде што Македонија сака да биде дел. За да стигнете до таму треба да гласате на референдумот, сите и без исклучок, изјави канцеларот.
За премиерот Заев пак, поддршката која Австрија и ја дава на Македонија за ЕУ и НАТО интеграциите е од големо значење. Посетата на австрискиот канцелар ја оцени како порака дека сме на вистинскиот пат кон реализирање на нашиот врвен државен приоритет - интеграција во евро-атланските структури.
Сепак, дамка на средбата фрли слабата техничката подготвеност на Владата, но и тоа што австрискиот канцелар наместо со знамето на неговата земја, беше пречекан со знамето на Латвија, што го забележаа австриските новинари. Дополнителен проблем настана и при преводот, па еден од австриските новинари на канцеларот мораше да му го преведе прашањето. За ова беа свесни и од владата по што преку соопштение се извинија за како што велат, ненамерниот протоколарен пропуст.
Канцеларот Курц од Владата, на средба и со лидерот на опозицијата Христијан Мицковски. Претседателот на ВМРО-ДПМНЕ, како што стои во соопштението, му порачал на Курц дека договорот со Грција не ги одразува државните и национални интереси на земјава.
,,Целокупниот процес на преговарање се одвиваше нетранспарентно и опозицијата не беше консултирана, а самиот договор не ги одразува државните и национални интереси на Република Македонија“,стои во партиското соопштение.
Со Столтенберг и Курц почна серијата посети на високи странски гости пред референдумот. Утре на ред е германската канцеларка Ангела Меркел, а најавени се и други високи претставници од меѓународната заедница.