На денот кога Украина првпат објави дека ослободила 400 квадратни километри од руската окупација на југ, Зеленски во обраќањето преку видео врска предупреди на опасноста што ја претставува Русија. „Русија сега има само една политика, а тоа е „војна против Украина, против Европа, против светот“, рече Зеленски, пренесува ДПА.

Тој ги повика шефовите на држави и влади собрани во Прага да направат сѐ што можат за да ја запрат војната во неговата земја. Тој повика на повеќе санкции против Русија, посилна воена поддршка за Украина за „руските тенкови да не стигнат до Варшава или Прага“ и безбедносни гаранции додека неговата земја не се приклучи на НАТО. „Агресорот треба да биде казнет“, нагласи тој, додавајќи: „Ќе дојде ден кога руското зло ќе загуби“.

Зеленски денеска имаше говор и пред Институтот Лови во Австралија. Зборувајќи преку видео врска, Зеленски го повика светот да „покаже сила“ по анексијата на четирите украински региони. „Шефот на Русија сега внимателно ја анализира реакцијата на светот на лажните референдуми што ги организираше на украинска територија и на најавата за анексија на нашата територија“, рече Зеленски.

„Него го интересира дали сè уште има потенцијал за ескалација. Ако светската реакција сега е слаба, Русија ќе излезе со нова ескалација“, додаде тој.

Кремљ го обвини украинскиот претседател Володимир Зеленски дека повикал на нуклеарна војна во денешното обраќање пред Институтот Лови во Австралија. Кремљ тврди дека неговите коментари се „повик за започнување нуклеарна војна“.

Михајло Подољак, советник на претседателот на Украина, зборуваше и за руската најава дека Зеленски повикува на нуклеарна војна.

„Уште една руска лага. Зеленски не кажа ништо за нуклеарен напад врз Русија. Зеленски потсети на нуклеарната уцена од Русија и предложи превентивно да се наведат последиците за Русија и да се интензивираат нападите врз неа во форма на санкции и вооружена помош за Украина“, напиша Подољак.

Украина денеска објави дека руските сили се под силен притисок од украинската контраофанзива.

„Украинските вооружени сили ослободија повеќе од 400 квадратни километри од регионот Херсон од почетокот на октомври“, изјави претходно Наталија Гуменјук, портпарол на Јужната воена команда.

Со ова Украина за првпат официјално објави колкав дел од окупираната територија на југ вратила под своја контрола.

Украинските сили се во офанзива на сите фронтови од почетокот на септември и веќе го вратија најголемиот дел од регионот Харков на североисток, како и важни логистички центри како што се Купјанск и Лиман на исток.