Пожарот што го зафати барот „Ле Констелашн“ во скијачкиот центар Кран-Монтана, преполн со гости кои го прославуваа почетокот на 2026 година, одзеде 40 животи, претежно тинејџери.

Седум од загинатите беа играчи на локалниот фудбалски клуб во Лутри, идиличен град со околу 10.500 жители на брегот на Женевското езеро. „Генерацијата е десеткувана“, изјави за АФП претседателот на ФК Лутри, Стефан Бизе, во седиштето на клубот. „На оние што ќе останат ќе им биде многу, многу тешко да се опорават“, додаде тој.

Во блиската црква, десетици луѓе се појавија вчера вечерта за да се збогуваат со 16-годишниот Артур, јуниор во клубот. Десетици свеќи и цвеќиња беа оставени на скалите, заедно со помали фудбалски топки украсени со срца.

Од другата страна на влезот, беше поставен огромен постер со цртеж од Артур и неговиот помлад брат, кои се смешкаат и го прегрнуваат, и зборовите: „Твојот помал брат и твоето семејство никогаш нема да те заборават“. Артур требаше да го прослави својот 17-ти роденден.

Неговата мајка Летиција Бродар-Ситре, која самата е тренерка во ФК Лутри, јавно проговори во деновите по трагедијата за нејзината очајна потрага по својот син. Шест млади луѓе го изнесоа ковчегот на Артур од црквата, по што следеше и неговиот помлад брат. Болничарите и полицајците стоеја настрана додека поминуваше погребното возило.

Целата заедница е погодена

„Беше многу важно младите да бидат таму“ и да можат да зборуваат и „да ја споделат својата посветеност на Артур“, изјави свештеникот Ален Бруз за АФП по погребот. „Тие се оние на првата линија“.

Ова не беше првата миса на која присуствуваа овие млади луѓе оваа недела, а веројатно нема да биде ниту последна. Покрај седумте фудбалери, неколку други жители на малото гратче загинаа во пожарот. Има и повредени, а некои „помагаа да се спасат луѓето од Кран-Монтана“, рече свештеникот. „Тие видоа навистина вознемирувачки сцени. Навистина целата заедница беше погодена“.

Недолго по трагедијата, парохијаните поставија споменик за луѓето да можат да остават пораки за поддршка или молитви на ѕидот зад олтарот. „Почивајте во мир, мали ангелчиња“, пишуваше едниот, а другиот: „Мислам на тебе. Ти си мојот омилен тренер“.

„Летајте слободно кон рајот“

Пет други играчи на ФК Лутри се уште се во болница, а девојката на еден од нив почина.

Блиското приватно меѓународно училиште Шампите, исто така, објави дека некои од неговите сегашни ученици и четворица поранешни ученици, од кои некои играа за ФК Лутри, се убиени, според швајцарските медиуми. „Доживуваме незамислива трагедија“, рече претседателот на ФК Лутри.

Клубот дели ленти исечени од едрата на легендарниот брод во градското пристаниште на кои луѓето пишуваат пораки и ги врзуваат за оградата околу фудбалското игралиште. „Вие сте деца, летајте слободно кон рајот“, гласи една порака украсена со цртеж од гулаб на мирот и две срца.

„Оваа иницијатива дојде од членови на нашата заедница кои рекоа дека сакаат да бидат од помош и дека треба да бидат заедно, да разговараат, да се прегрнуваат, да ги споделат своите чувства за оваа ужасна трагедија“, рече Бисе. Неговата сопруга Софија Бисе и нивниот син, кои ги познаваа сите млади луѓе што починаа, исто така беа на погребот.

„Ова беа млади луѓе што ги познаваа уште од четиригодишна возраст“, ​​рече Софија Бисе. „Сите повеќе или помалку се среќаваа во училиште, потоа на фудбалски терени, а сега на забави“.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.