Свет

Кралот Чарлс го прими Макрон во прва посета на европски лидер на Велика Британија по Брегзит

Британскиот крал Чарлс Трети денеска го прими францускиот претседател Емануел Макрон, во прва државна посета на некој европски лидер на Велика Британија од Брегзит.

Нивното срдечно поздравување симболизира враќање на поблиски односи меѓу двете земји, коментираат светските медиуми.

Се очекува кралот Чарлс во подоцнежното обраќање да ги нагласи „мноштвото сложени закани“ со кои се соочуваат двете земји.

- Толку многу можеме заедно да создадеме, објави Макрон на Х по пристигнувањето.

Во придружба на престолонаследникот принцот Вилијам и неговата сопруга принцезата Кејт, кралот и кралицата Камила, како и Макрон и неговата сопруга Брижит, се возеа во кочии за процесија во Виндзор, која заврши во дворот на средновековниот замок, западно од Лондон.

Од изборот на Кир Стармер за премиер минатата година, Британија се обидува да ги обнови врските со европските сојузници, а британскиот крал ќе настојува да одигра своја улога во одредувањето на тонот на посетата пред да почнат политичките разговори.

- Нашите две нации не делат само вредности, туку и неуморна решителност да дејствуваат врз основа на нив во светот, се очекува подоцна да изјави 76-годишниот монарх, кој сè уште се лекува од рак.

Тридневната посета на Макрон е исполнета со состаноци за економски прашања и надворешни работи. Но, првиот ден од државната посета, која се одвива 16 години откако покојната кралица Елизабета Втора го прими тогашниот француски претседател Никола Саркози, е главно фокусиран на церемонии и е преполн со симболика.

Пред да се упати кон Лондон денеска попладне каде ќе се обрати во парламентот, Макрон му се придружи на Чарлс Трети за да изврши смотра на Почесната гарда. Тој треба да руча со семејството и да ја разгледа Кралската колекција, слики и мебел кои семејството Виндзор ги собирало низ вековите.

Десното око на монархот беше забележливо црвено кога се сретна со Макрон. Извор од Бакингемската палата рече дека му пукнал крвен сад во едното око, што не било поврзано со ниедна друга здравствена состојба.

Денот ќе заврши со државна вечера во замокот Виндзор, на која ќе се обратат британскиот крал и францускиот претседател пред околу 150 гости. 6

Во продолжение на посетата на францускиот претседател, разговорите меѓу Макрон и Стармер ќе се насочат на низа прашања – како да се запре шверцувањето луѓе и да се подобрат економските и одбранбените врски во моментот кога САД се оддалечуваат од својата традиционална улога на бранител на европската безбедност.

Иако постоеја тензии околу обликувањето на односите по Брегзит и начинот на спречување на барателите на азил да го минуваат Ламанш со чамци, Велика Британија и Франција тесно соработуваат во создавањето планирана воена сила за поддршка на Украина во случај на прекин на огнот со Русија.

Британските функционери се надеваат дека Макрон ќе се согласи на пилот-договор за враќање на барателите на азил. Тоа би вклучило депортација на еден барател на азил во Франција во замена за друг со легитимна причина за престој во Британија, со што би се нарушил деловниот модел на бандите кои шверцуваат луѓе.

Рекорден број баратели на азил пристигнаа во Британија со чамци од Франција во првите шест месеци од оваа година. Стармер, кој во анкетите заостанува зад десничарската партија „Reform UK“ на Најџел Фараж, е под притисок што побрзо да најде решение.

Франција досега одбиваше да потпише таков договор и велеше дека Британија треба да преговара за аранжман со сите земји од ЕУ.

Тагови: Емануел Макрон Кралот Чарлс

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Американка криела ДНК-докази во случаи на силување, осудена на 10 години затвор

Поранешната форензичарка од Бирото за истраги на Колорадо (CBI), Ивон „Миси“ Вудс, е осудена на десет години затвор поради манипулирање со податоци од ДНК-анализи во кривични предмети, вклучувајќи случаи на убиство, сексуално насилство и грабеж.

Вудс, која работела како форензички аналитичар речиси три децении, во јуни се изјасни за виновна по четири точки од обвинението: компјутерски криминал, лажно сведочење, фалсификување и обид за влијание врз службено лице.

Таа беше осудена на 8 септември од страна на судијата Ендру Поланд во округот Џеферсон, Колорадо.

Откако беа откриени неправилности, CBI ја прегледа работата на Вудс и утврди проблеми во 1.045 кривични предмети. Вудс работела на повеќе од 10.000 предмети за време на нејзиниот 29-годишен ангажман во лабораторијата.

Според обвинителите, таа менувала или изоставувала податоци за ДНК, прескокнувала задолжителни чекори и на други начини манипулирала со лабораториските записи за побрзо да ги обработи предметите.

Како резултат на тоа, во некои случаи, полицијата и обвинителите не добиле целосна слика за тоа што всушност покажале ДНК-анализите.

„Колорадо паблик радио“ (Colorado Public Radio) известува дека повеќе од 400 од предметите на кои работела Вудс се однесувале на сексуални напади.

На рочиштето за изрекување на пресудата, обвинителите опишаа случаи во кои количината на откриена машка ДНК била прикажана како помала или била изоставена од извештаите.

Обвинителот Дарен Кафка на суд наведе десет конкретни случаи за да ги прикаже последиците од постапките на Вудс. Меѓу нив беа случаи на сексуален напад врз четиригодишно девојче во Пуебло и врз 88-годишна жена, како и пријавено силување во Националниот парк „Роки Маунтин“.

Според обвинителството, Вудс пронашла машка ДНК на предметните докази, но не ја пријавила точно во конечните лабораториски наоди.

Пред судот, Вудс им се извинила на жртвите, на нивните семејства и на колегите, признавајќи дека нејзините одлуки можеби довеле до пропуштање на можности за понатамошна истрага.

Укината пресуда за убиство поради нејзината работа. Скандалот веќе доведе до укинување на најмалку една пресуда за убиство.

Скандалот го принуди CBI повторно да анализира големо количество докази и да ги преиспита лабораториските процедури. Колорадо веќе потроши милиони долари за нови тестирања, а адвокатите на одбраната и обвинителите повторно ги отвораат предметите во кои бил вклучен Вудс.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Вечерва на „Кино на отворено“ во Кисела Вода: „Таинствената шума“ и култниот „Пред дождот“

Во прекрасна опуштена атмосфера, синоќа во паркот „Македонија“ се одржа првата вечер од манифестацијата „Кино на отворено“ во Кисела Вода.

Присутните уживаа во програмата која ја отвори детскиот анимиран филм „Клинци Каубојци“, а продолжи со проекцијата на наградуваниот македонски филм „Приказната за Силјан“ во режија на Тамара Котевска и продукција на Јорданчо Петковски и Ана Хамши.

Општина Кисела Вода ги поканува граѓаните да бидат дел од филмското дружење и вечерва, на истата локација.

Вечерашната програма, која се одржува во близина на Домот на културата „Билјана Беличанец“, стартува во 19:00 часот со детскиот анимиран филм „Таинствената шума“, синхронизиран на македонски јазик. Веднаш потоа, од 20:25 часот, следува проекција на култниот „Пред дождот“ на Милчо Манчевски, македонско ремек-дело кое има освоено над 30 меѓународни награди, меѓу кои и „Златниот лав“ во Венеција, како и номинација за Оскар.

Настанот се реализира во соработка со Кинотека на Република Македонија и „Киноверзум“.

Ве очекуваме и вечерва во паркот „Македонија“!

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Видео: Првиот ден на „Октоберфест“ во сенка на инцидент

Првиот ден на „Октоберфест“ во сенка на инцидент. Посетители виселе наопаку, итните служби веќе згрижиле 600 лица.

Посетителите на „Октоберфест“ во Минхен виселе наопаку околу пет минути за време на една атрактивна панаѓурска вожња, а причината за инцидентот сè уште е непозната, пренесе ДПА.

Откако се симнале од високиот тобоган,неколку лица, главно помлади, се пожалиле на блага вртоглавица и проблеми со циркулацијата.

По кратка лекарска контрола, сите се вратиле на фестивалот на пивото.

Службата за итна помош соопшти дека првиот ден од 191-виот „Октоберфест“ згрижила околу 600 пациенти.

Најголемиот фестивал на пивото во светот беше отворен вчера и ќе трае 16 дена, сè до 4 октомври.

https://www.instagram.com/reel/DdeZBufocli/?utm_source=ig_embed&utm_campaign=loading

Тагови: Октоберфест

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.