Македонија

Ковачевски: е.GO е инвестиција од 130 милиони евра и 890 нови добро платени работни места

Владата, застапувана и претставувана од Дирекцијата за технолошки индустриски развојни зони и „НЕКСТ.Е.ГО МОБИЛЕ“, денеска во ТИРЗ Тетово потпишаа договор за државна помош за нова инвестиција.

Владата, застапувана и претставувана од Дирекцијата за технолошки индустриски развојни зони и „НЕКСТ.Е.ГО МОБИЛЕ“, денеска во ТИРЗ Тетово потпишаа договор за државна помош за нова инвестиција, која предвидува целосно производство на електрични автомобили e.GO.

По тој повод, денеска се одржа настан на кој се обрати претседателот на Владата, Димитар Ковачевски. Во продолжение, Ви праќаме транскрипт од обраќањето во целост:

„Почитуван претседател на Собранието г-дин Џафери, почитувани претставници на Владата, почитуван г-дин Ахмети, почитувани претставници на НЕКСТ.Е.ГО МОБИЛЕ СЕ,

Почитувани екселенции, почитувани домаќини,

Драги партнери и гости,

Почитувани медиуми и граѓани,

Денес ми претставува навистина голема чест и задоволство ми е што сум присутен овде, каде започнува нова инвестициска приказна, мултимилионски проект, на германската компанија „НЕКСТ.Е.ГО.МОБИЛЕ СЕ“.

Моите колеги знаат да пишуваат исклучително добри говори, и секогаш го прават тоа на најдобар начин врз основа на претпоставки кои јас им ги давам. Меѓутоа некогаш не можете да доловите сè на лист хартија. Затоа сакам да споделам со вас, неколку важни работи за себе.

Прво Македонија, беше пред 21 година, т.е Република Македонија во тоа време, којашто имаше голем предизвик, каде што тука во тоа време имаше голем број на политичари и дипломати, коишто нас ни помагаа да изградиме општество еднакво за сите, и општество во коешто секој ќе може државата да ја гледа како поле за личен и професионален развој.

За точно 21 година после тоа, повторно сме собрани сите тука и повторно имаме странци. Меѓутоа тие странци, со коишто разговаравме во изминативе три месеци, се од Германија, професионалци менаџери, коишто заедно со наши граѓани тука во Македонија, и успешни бизнисмени и инвеститори, ја отвораме првата фабрика за електрични автомобили во државата, и во регионот.

Тие преговори покажаа неколку работи. Јас изминатиот период заедно со уште неколку министри одговаравме на неколку прашања, дали ние како држава сме подготвени да направиме исчекор во вакво општество коешто ќе понуди повеќе за своите граѓани. И секогаш одговарав со „да“. И секогаш добивав уште едно прашање, па дали некој може нас нешто да ни направи, дали може некој да не закочи…и мојот одговор секогаш беше „не“.

Затоа што јас имам исклучително голема верба во нашите граѓани. Без разлика дали се тоа се Македонци, Албанци, Власи, Срби, Турци, Роми, Бошњаци, сите што живеат тука. И секогаш кажував дека граѓани коишто можат да купуваат производи од највисоки производители, се граѓани кои можат да направат промена. И затоа тие граѓани, направија набрзо вклучување во НАТО, и направија почеток на преговорите со Европската Унија. И длабоко верувам дека граѓаните, преку своите избраници во Собранието, ќе направат и најбрзо интегрирање во Европската Унија.

Нема поголема потврда за тоа што го зборувам од овој денешен ден. Затоа што тие граѓани ќе бидат вработените во оваа фабрика којашто ќе произведува електрични автомобили, коишто ќе ги гледаме на пазарите низ Европската Унија или светот.

И затоа сакам да ве замолам за еден аплауз, не за нас овде, туку за граѓаните коишто тоа го овозможија.

Денес е еден од оние убави денови кога стануваат видливи резултатите од вложениот труд. Денес ќе се постават темелите на инвестицијата која само во првата фаза тежи 130 милиони евра и ќе отвори најмалку 890 нови добро платени работни места.

Оваа инвестиција е од огромно значење за државната, но и за локалната економија и развојот на човечкиот потенцијал во Тетово и во државата. Со оваа значајна инвестиција, Македонија уште еднаш потврдува дека е држава која нуди одлични услови за инвеститорите, со стабилна економска и политичка клима во која меѓународните компании како „НЕКСТЕ.Е.ГО“ имаат партнер од доверба.

Она што особено ме радува е дека за прв пат, кај нас ќе биде произведен целосен автомобил. Во Северна Македонија и досега се произведуваа делови за автомобили од светските брендови, но сега имаме целосно производство на финален производ токму кај нас. И ова е навистина голема работа.

Оваа инвестиција ми е лично посебно драга. Не само затоа што ќе го промени на подобро животот на семејствата чии членови ќе работат тука, туку затоа што ќе го промени начинот на кој размислуваме за возилата. Затоа што ова е иднината, и на индустријата и на заштитата на животната средина. Меѓутоа ова е иднината и на образованието. Вакви инвестиции, вакви фабрики, ќе го сменат образованието во државата, бидејќи ќе направат нови потреби коишто ќе бидат неопходни.

Електричниот автомобил „е-Go“ кој ќе се произведува овде во ТИРЗ во Тетово е корисен за урбани средини, истовремено одржлив, иновативен, економичен и без штетни емисии на гасови. Ова меѓу другото е нашиот влог за идните генерации.

Фабриката која ќе се гради овде во ТИРЗ зоната во Тетово, е составен дел од глобалниот производствен капацитет на „е-Go“, наменет да го снабдува и националниот и меѓународниот извозен пазар.

Кризата која веќе започна во целиот свет, нѐ научи дека постојано треба да вложуваме, да ги поттикнуваме и да ги стимулираме домашните и странските компании да инвестираат.

Ваквите инвестиции се доказ дека како Влада успешно ги користиме сите потребни механизми кои ги даваат очекуваните резултати овозможувајќи услови за понатамошен побрз и одржлив економски раст и развој.

Во технолошко индустриските развојни зони, во првите шест месеци се постигнати договори за инвестиции во висина од 240 милиони евра, а потенцијално до крајот на годината се очекува затворање на уште два договори во висина од 160 милиони евра. Јас никогаш не сум најавувал инвестиции, и оваа е инвестиција за која беше извесно дека ќе се случи. Оставивме прво да се договорат сите детали и потоа на изненадување на целата јавност, бидејќи ги гледам написите во медиумите, дознавме дека во Македонија ќе има инвестиција којашто ќе биде од 130 милиони евра, и ќе биде на почеток со околу 900 вработени. И уште има такви инвестиции, од други инвеститори, а ние ќе оставиме тоа инвеститорите заедно со институциите да го најават, и ќе се случи многу брзо.

Само за еден месец во компаниите во зоните се отворени речиси 100 нови работни места, со што заклучно со јули, од почетокот на годинава во компаниите во ТИРЗ се реализирани над 1.100 нови работни места.

Вкупниот број на вработени во јули порасна и достигна над 15.000 вработени, што е за 6% повеќе споредено со јули минатата година, односно за 14,5% повеќе во однос на јули 2020 година.

Позитивниот тренд на раст од почетокот на годинава продолжува и во однос на извозот и увозот. Во првите седум месеци од 2022 година извозот од ТИРЗ достигна речиси две милијарди евра, што е највисок во последниве четири години. А да не заборавиме дека работиме во најкризни две години после втората светска војна. Само во јули годинава компаниите во ТИРЗ имаат извоз од 280 милиони евра што е за 25% повеќе од јули минатата година.

И покрај глобалните политичко економски случувања, сите анализи покажуваат дека ваквиот тренд ќе продолжи до крајот на годината со што според проценките, извозот може да го надмине минатогодишното рекордно ниво од три милијарди евра извоз годишно.

Ваквиот тренд се очекува да продолжи и во однос на порастот на нови работни места и согласно инвестициите постигнати изминатата година се предвидува отворање на над 2.700 работни места во следните години.

Овие позитивни резултати и бројки кои постојано растат, потврдуваат дека создадената нова стратегија и програма за работа креираат позитивна бизнис клима за инвеститорите и вработените.

Пандемијата ни покажа дека во Европа може да се произведуваат многу повеќе неопходни добра и да се обезбеди заштеда на трошоците кои инаку ги имаме за транспорт и логистика од далечните земји, особено од истокот.

Македонија тоа го искористи создавајќи амбиент за нови инвестиции. Ние сме членка на НАТО, а нашата позиција е и членство во Европската Унија со веќе отпочнати проговори, за инвеститорите да знаат дека имаат сигурност и предвидлив деловен амбиент, што е впрочем и нашата предност во регионот. И ќе повторам уште еднаш, оваа држава од 19 јули кога ја одржавме првата меѓувладина конференција со Европската Унија, ќе оди само напред. Нема да оди назад, нема да оди ни лево а уште помалку десно. Државата ќе оди напред, во полноправно членство со Европската Унија, затоа што тоа им го должиме на граѓаните, а тоа им го должиме и на инвеститорите кои отвораат добро платени работни места за граѓаните.

Нашиот пристап во привлекувањето инвестиции е изменет и сега е насочен кон инвестиции и инвеститори што носат поголема додадена вредност. Таков пример е и оваа инвестиција денес, и такви примери се и ветерните паркови и соларните централи односно обновливите извори на енергија, кои дел веќе се финализирани, а дел се во фаза на подготовка односно имплементација.

На крајот, уште еднаш, сакам да упатам честитки за стартот и да посакам успешна работа на компанијата.

Создавање на локалната економска вредност и напредниот технолошки развој кој оваа инвестиција го носи ќе го промени животот во локалната заедница, ќе даде силен стимул на економијата и значајна референца за државата во привлекување на странски инвестиции.

За крај, денес е денот кога се одбележува 21 година од потпишувањето на Охридскиот рамковен договор и би сакал да ја искористам оваа можност да упатам честитки и да изразам задоволство од нашето заедништво, нашата сплотеност и желба за соживот и меѓусебна толеранција.

Докажавме дека само така, една мултиетничка и мултикултурна држава може да биде успешна, економски напредна и просперитетна за своите граѓани.

Сакам уште еднаш на крајот да им честитам на семејството Дестани, и на компанијата e.GO од Германија, на целиот менаџерски тим којшто денеска е тука присутен со нас, и што побрзо и поуспешно да ги завршат градежните работи за производство на фабриката, и првите автомобили веќе да може да ги возиме и кај нас и на странските автопатишта во предвидените рокови коишто ги имаат зададено“.

Здравје

Вакциналните пунктови соочени со недостиг на кадар

Вакциналните пунктови соочени со недостиг на кадар, едно од можните решенија правилна прераспределба.

Вакциналните пунктови низ државава се соочуваат со недостиг од кадар. Од Унијата што ја предводи Здружението на медицински сестри, техничари, акушерки и стоматолошки сестри „За нас“, во изјава за МИА велат дека на територија на градот Скопје, но и во државата, генерално, постои голем дефицит на медицински сестри насекаде, вклучувајќи ги и пунктовите за вакцинација. Од Министерството за здравство пак, потенцираат дека се работи на обезбедување на неопходниот кадар во сите здравствени установи.

Според податоците со кои располага Унијата што ја предводи Здружението на медицински сестри, техничари, акушерки и стоматолошки сестри „За нас“, во општина Гази Баба, како една од поголемите општини со голем број пунктови, недостасуваат сестри во претшколските и во школските диспанзери, а во општина Прилеп недостасуваат две, односно четири медицински сестри во овие диспанзери.

Гордана Бешлиовска, претседател на Унијата што ја предводи Здружението на медицински сестри, техничари, акушерки и стоматолошки сестри „За нас“, за МИА вели дека во овој момент, едно од можните решенија за да се надмине проблемот е правилната прераспределба.

- Од општините каде има доволен и непотребен број медицински сестри, истите да се прераспределат во здравствените домови каде што недостасуваат на територија на град Скопје. На пример, со случајот во општина Прилеп, каде до 15 јануари, шест доктори од концензионерските ординации заминаа во пензија, зад себе оставија медицински сестри кои во моментов се без работа. Со нивно вработување, како искусни медицински сестри, може веднаш да се надополни дефицитот, истакнува Бешлиовска.

Едно од главните решенија, како што додава Бешлиовска, е и континуираното организирање конкурси за вработување и тоа не само во овој дел, туку на сите нивоа во здравствениот систем.

- И тоа не само во овој дел, туку и во патронажните служби, како и во стационарите на секундарно и терциерно ниво на здравствениот систем. Заклучокот е дека сепак, превенцијата е најважна. Само еден грам превенција спречува тони лекувања, а нам ни е најважно да направиме сè за доброто на корисниците на услугите, односно за пациентите, нагласува Бешлиовска.

МИА се обрати и до Министерството за здравство, од каде побаравме одговор дали има недостиг на кадар во пунктовите за вакцинација низ државава. Во одговорот којшто го добивме оттаму се вели дека сите пунктови функционираат согласно потребите на населението и вакцинацијата се спроведува непречено.

- Министерството за здравство континуирано работи на обезбедување на неопходниот кадар во сите здравствени установи. Континуирано се реализираат обуки на кадарот за вакцинација, зајакнати се инфраструктурните капацитети, со цел да се одговори на сите предизвици и да се обезбеди непречена и ефикасна вакцинација во целата држава, се наведува во писмениот одговор на Министерството за здравство. /МИА.

Регион

Почина архиепископот на Албанија Анастасиос

На 95-годишна возраст утрово почина поглаварот на Албанската православна црква, архиепископот Анастасиос, кој од почетокот на месецов беше хоспитализиран во атинска болница, а здравствената состојба му беше критична.

На 95-годишна возраст утрово почина поглаварот на Албанската православна црква, архиепископот Анастасиос, кој од почетокот на месецов беше хоспитализиран во атинска болница, а здравствената состојба му беше критична, јави дописничката на МИА од Атина.

Поглаварот на Албанската православна црква на 30 декември бил превентивно примен во болница во Тирана со сезонски вирус, меѓутоа ситуацијата се влошила, па на 3 јануари во вечерните часови со авион на грчкото воено воздухопловство, итно беше пренесен во болница во Атина.

Пораки со сочувство за смртта на архиепископот испратија грчкиот премиер Кирјакос Мицотакис, претседателката на Грција Катерина Сакеларопулу, министерот за надворешни работи Јоргос Герапетритис, како и од опозициската СИРИЗА.

Роден како Анастасиос Јанулатос, архиепископот беше теолог, мисионер, писател и поранешен професор на Универзитетот во Атина, а во изминатите 32 години беше поглавар на Православната црква на Албанија, која тој самиот ја обнови во 1992 година под сегашната титула, откако мисијата ја доби од Вселенската патријаршија.

Со неговата напорна работа и посветеност биле формирани над 400 парохии, основал Богословско-свештеничката школа во Драч и црковната гимназија во Аргирокастро, обучил и ракоположил 145 нови свештени лица, се грижел за издавање на литургиски и други верски книги, се погрижил за обнова на 150 нови цркви, за реставрација на 70 манастири и цркви-културни споменици и за поправка на 160 цркви и 45 црковни објекти, односно вкупно 425 објекти, а го основал и првиот женски манастир.

Архиепископот Анастасиос дополнително им помагал на сиромашните, дистрибуирајќи стотици тони храна, облека и лекови, ги основал првиот православен албански весник, како и списанија за деца и млади, научно списание и радио.

Паралелно со возобновувањето на Православната Црква, развил програми од областа на образованието, здравството, социјалната заштита, руралниот развој, културата и екологијата.

Во 2000 година архиепископот Анастасиос беше номиниран за Нобеловата награда за мир.

Регион

Грчкиот Парламент гласа за избор на претседател на земјата

По пет дена ќе се одржи второто гласање и доколку и тогаш не се постигне потребното двотретинско мнозинство, ќе се одржи и трето на кое ќе бидат потребни три петтини од вкупниот број гласови, односно поддршка од 180 од вкупно 300 пратеници.

Претпладнево пратениците во грчкиот Парламент ќе гласаат за претседател на Грција, а првпат по над 30 години предложени се четворица кандидати, меѓутоа според калкулациите, не се очекува при денешното прво гласање да биде постигнато потребното двотретинско мнозинство, со што по пет дена ќе се одржи ново, второ гласање, јави дописничката на МИА од Атина.

До неодамна претседателот на Парламентот Константинос Тасулас, како предлог од владејачката Нова демократија, поранешниот министер Тасос Јаницис предложен од ПАСОК, поранешната пратеничка и министерка од ПАСОК Лука Кацели предлог од СИРИЗА и писателот Костас Кирјаку прдложен од партијата Победа, се четворицата кандидати за кои ќе гласаат пратениците.

Согласно грчкиот Устав, претседателот го одбира Парламентот и предвидени се најмногу пет гласања, доколку при првото не се постигне потребното двотретинско мнозинство од вкупниот број пратеници, односно најмалку 200 гласа, нешто што не се очекува да се случи за време на денешното гласање.

По пет дена ќе се одржи второто гласање и доколку и тогаш не се постигне потребното двотретинско мнозинство, ќе се одржи и трето на кое ќе бидат потребни три петтини од вкупниот број гласови, односно поддршка од 180 од вкупно 300 пратеници.

Доколку никој од кандидатите не добие ни 180 пратеници, ќе следи и четврто гласање, повторно по пет дена, кога ќе биде потребно мнозинство од вкупниот број пратеници, односно најмалку 151 глас, а доколку и ова мнозинство не се постигне, гласањето се повторува по пет дена, по петти пат и за претседател се избира кандидатот кој добил соодветното мнозинство.

Според ставовите на партиите и пратениците, новиот претседател се очекува да биде избран по четвртото гласање, кое ќе се одржи кон средината на февруари и да биде избран Константинос Тасулас за шеф на државата со најмалку 158 гласа, од кои 156 од Нова демократија и два од независните пратеници Салмас и Самарас, кои до неодамна беа дел од владејачката партија.

Со уставните измени на крајот на ноември 2019 година, изборот на претседател се одвои од предвременото распуштање на Парламентот, за да се избегне реприза на она што се случи во 2015 година, кога недоволниот број гласови за претседателскиот кандидат доведе до предвремени избори во земјата.

Гласањето за претседател е јавно, со прозивање на секој од пратениците, кои се вкупно 300 на број, а ќе имаат можност да изберат еден од четворицата кандидати.

Петгодишниот мандат на актуелната претседателка Катерина Сакеларопулу завршува на 13 март годинава.

Повеќе од сигурно е дека ниту еден од кандидатите од опозициските партии нема да го освои потребното мнозинство, со што се очекува Тасулас да биде новиот претседател на Грција.

Од јули 2019 година до пред десетина дена беше собраниски спикер, позиција на која три пати со широко мнозинство беше изгласан од пратениците, адвокат по професија и 25 години пратеник од Нова демократија, додека пак во однос на ставовите кон нашата земја, генерално, ставовите на идниот грчки претседател не се разликуваат од оние на актуелната Влада.

Како што анализираше МИА минатата седмица, Тасулас, согласно неговите јавни изјави изразени во изминатите години како претседател на Парламентот, ја поддржува европската перспектива и на регионот и на Северна Македонија, но и порачува дека е неопходно да се почитува Договорот од Преспа, додека пак на крајот на октомври 2022 година на маргините на Конференцијата на претседателите на Парламентите на земјите – членки на Советот на Европа, беше првиот претседател на грчкиот Парламент што се сретна со негов македонски колега и по средбата со тогашниот спикер на Собранието Талат Џафери порача дека парламентите со кои претседаваат „треба да го покажат патот за подобрување на односите меѓу двете земји“.

Во однос на ратификациите на трите меморандуми со нашата земја потпишани по Договорот од Преспа, кои сè уште чекаат да бидат ставени на дневен ред, на крајот на септември 2020 година, Тасулас, како претседател на грчкиот Парламент, посочи дека „трите ратификации на меѓународните договори со Северна Македонија немаат карактеристика на итни“.

Тасулас беше предлог на владејачката Нова демократија за шеф на државата, како што во телевизиска порака до граѓаните пред десет дена, соопшти грчкиот премиер Кирјакос Мицотакис.