Бугарскиот европратеник Андреј Ковачев повторно ѕвечка со вето, во исчекување на одлуката за одржување на првата Меѓувладина конференција во декември. Во интервју за бугарската ТВ Европа, Ковачев е дециден – мораме да добиеме гаранции дека идните генерации нема да учат фалсификувана историја, а Македонија нема да манипулира со историските прашања.
-Ние не сакаме во Европската Унија да влезе земја како полноправна членка и овие проблеми да ги имаат по 10, 20 години нашите деца, внуци, внуците на Заев и следните генерации да се мразат како полноправни членки на ЕУ. Не е толкава драма ако преговорите ги почнат по шест месеци, кога ќе има подготвеност. , вели Андреј Ковачев, европратеник
Во однос на подготвеноста на македонската владата да се допрецизираат одредени прашања од Договорот за добрососедство, кои упатуваат на евентуални територијални претензии кон Бугарија, Ковачев вели дека тоа е далеку од задоволување на барањата на Софија. Европратеникот посочува дека под историска вистина се подразбира прифаќање на условите содржани во декларацијата на бугарскиот парламент, во кој меѓудругото, доминира негирањето на македонскиот јазик.
-Велат подготвени сме да потпишеме анекс и да кажеме дека нема да имаме територијални претензии кон вас. Тоа е исклучително великодушно и мило, но тоа е категорично недоволно. Кога ќе бидат подготвени, кога ќе се охрабрат да ги надминат поделбите и децениските фалсификати и сеење омраза, режирани од Титова Југославија, ќе можат да ги почнат преговорите., вели Ковачев
Шефот на дипломатијата Османи вчера појасни дека работни групи на двете министерства за надворшени работат на надминување на разликите. Тој изрази подготвеност да се направи дополнително појаснување во Договорот, како на пример за кратко име на земјава, ако тоа предизвикува загриженост во Бугарија.