Култура

Костадиновска-Стојчевска за Скопје-европска престолнина на културата

Имаме потенцијал кој, убедена сум, нема да ја пропушти шансата да се покаже во своето најдобро издание.

Министерката за култура Бисера Костадиновска-Стојчевска, заедно со градоначалничката на Град Скопје, Данела Арсовска и амбасадорот на Европската Унија во Република Македонија, Дејвид Гир, денеска на сцената „Школка“, во Градскиот парк на прес-конференција ги објаснија сите натамошни случувања и процедури поврзани со „Скопје – Европска престолнина на културата во 2028 година“.

Костадиновска-Стојчевска истакна дека „Скопје – Европска престолнина на културата во 2028 година“ - звучи прекрасно, звучи надежно, но тоа обврзува и на многу, многу работа.

„Оваа титула, која на нашиот главен град му ја доделија експертите од Европската комисија, не е награда. Таа е шанса, таа е можност и, како министерка за култура, убедена сум дека ќе дадеме сè од себе во 2028-ма да бидеме горди на Скопје и Скопје на нас. На оваа титула гледам и како предизвик да се обединиме во идејата и да им овозможиме на Скопје и на неговите жители, но и на сите македонски граѓани, да се чувствуваат европски“, рече Костадиновска-Стојчевска на денешната прес-конференција во Градскиот парк.

Таа потсети дека, препознавајќи ја вредноста, но и тежината на титулата „Европска престолнина на културата“, Владата, преку Министерството за култура, се обврза на безрезервна поддршка, и финансиска и кадровска и инфраструктурна, во служба на „Скопје 2028“. Како што нагласи Костадиновска-Стојчевска, ова е проект во којшто ќе се вложува со години, а тоа беше многу важен аспект за Скопје да ја добие титулата „Европска престолнина на културата“.

„Придобивките се огромни, можностите се неисцрпни. Ги повикувам на креативна мобилизација сите културни работници и уметници, независната културна сцена, младите автори, иновативните луѓе, креативните индустрии, невладиниот сектор, туристичките работници, занаетчиите, бизнис-заедницата, медиумите... Имаме потенцијал кој, убедена сум, нема да ја пропушти шансата да се покаже во своето најдобро издание. Ова треба да е наша заедничка инвестиција во една незаборавна година, година во која Скопје ќе биде достојна и впечатлива европска престолнина на културата“, потенцираше Костадиновска-Стојчевска.

Нагласувајќи дека изборот на Скопје за „Европска престолнина на културата за 2028 година“ е огромен успех за македонската култура и тест за нашиот однос кон неа, министерката за култура истакна дека европските експерти ја уважија нашата посветеност и подготвеност да одговориме на предизвиците кои со себе ги носи 2028-ма и како што рече, тоа мора и да го оправдаме.

−„Во 2028 година Скопје нема да биде крстопат туку точка на средба на културите кои своето богатство, уникатност и различност ќе ги стават во функција на утврдување и засилување на европското чувство кај сите. Затоа треба да имаме на ум дека „Европска престолнина на културата“ е, пред сè, идеја, а потоа титула. Суштината на таа идеја сме ја разбрале ако и културата ја разбираме како „мотор“ на нашиот севкупен развој. „Горивото“ е во знаењето, во креативноста и во иновативноста −истакна Костадиновска-Стојчевска и додаде дека нè чека обемна работа во која мора да го вложиме сиот креативен и организациски потенцијал, а европските експерти будно ќе го следат секој наш чекор.

Претходно, во рамки на настанот, министерката за култура Бисера Костадиновска-Стојчевска присуствуваше и на работилницата за македонско народно творештво на Детскиот културен центар - „Карпош“ .

На денешната прослава на тутулата „Скопје-евеопска престолнина на културата“ и на прес-конференцијата, која беше во организација на Градот Скопје, беше подготвена и забавна програма, музички настапи, интерактивни активности и гастрономски уживања.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Сирија го добива првиот парламент по падот на Асад

Првиот парламент на Сирија во ерата по Асад беше формиран, откако привремениот лидер Ахмад ал-Шара назначи 70 пратеници, со што вкупниот број на членови достигна 210.

Првиот парламент во ерата по поранешниот сириски претседател Башар ал-Асад беше формиран денес со објавување на список од 70 пратеници избрани од привремениот лидер Ахмад ал-Шара.

Шефот на изборната комисија на Сирија, Мохамед Таха ал-Ахмад, им изјави на новинарите дека новиот парламент од 210 членови ќе ја одржи својата прва седница во понеделник, објави „NBC News“. Потоа пратениците ќе положат заклетва и ќе биде избран парламентарниот Претседателски совет.

Списокот од 70 пратеници избрани од ал-Шара вклучува 15 жени, со што вкупниот број на жени членки во парламентот достигна 22. Сириските власти ја одржаа првата фаза од парламентарните избори во октомври, освен во јужната покраина Свеида, која е контролирана од вооружени бунтовници Друзи кои се спротивставуваат на централната влада. Гласањето исто така не беше одржано во североисточниот дел од Сирија контролиран од Курдите во тоа време. Изборите во североисточна Сирија се одржаа во мај откако владините сили ја презедоа контролата врз областа за време на конфликтот претходно оваа година. Сè уште не е одреден датум за гласањето во Свеида, но двајца претставници од регионот се меѓу имињата што ги објави Ал-Шара денес.

Парламентот ќе има 30-месечен мандат и ќе работи на нов изборен закон, додека ќе го подготвува теренот за гласање на следните избори. Сирија е без парламент откако бунтовничката офанзива во декември 2024 година, предводена од сега веќе непостоечката група Хајат Тахрир ал-Шам, го заврши владеењето на династијата Асад.

Извор: Б92

Тагови: Сирија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре променливо облачно и нетабилно

Времето утре ќе биде променливо облачно и нестабилно со повремен локален дожд и грмежи.

Наместа ќе има поинтензивни процеси со пообилен пороен дожд (над 15 l/m²), грмежи, засилен ветер (над 60 km/h) и појава на краткотрајно невреме со град. Минималната температура ќе биде во интервал од 11 до 19, а максималната ќе достигне од 27 до 35 степени.

Во Скопје, променливо облачно и нестабилно со повремени врнежи од дожд, грмежи и засилен ветер. Во делови од котлината ќе има услови за краткотрајно невреме со пообилен пороен дожд и појава на град. Минималната температура ќе се спушти до 17, а максималната ќе достигне до 32 степена.

Во петок ќе се задржи променливо облачно и нестабилно време со повремени врнежи од дожд и грмежи. Локално процесите ќе бидат поинтензивни во форма на невреме со пообилен пороен дожд (над 15 l/m²), електрични празнења, силен ветер (над 60 km/h) и појава на град. Потоа следува период на стабилно и сончево време. Во сабота ќе дува умерен до засилен северен ветер.

Тагови: нетабилно

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Побарана забрана за предавање и повеќе други мерки за претпазливост за професорка осомничена за поткуп

Основното јавно обвинителство Штип донесе наредба за спроведување истражна постапка против 38-годишна жителка на Кочани осомничена за кривично дело – Примање поткуп од член 357 став 6 во врска со став 1 од Кривичниот законик.

Осомничената како лице кое врши работи од јавен интерес, односно доцент на Универзитетот „Гоце Делчев’’ во Штип, директно за себе побарала корист – парични средства за да изврши дејствие што не би смеела да го изврши.

На 16 јуни, откако студент не покажал доволно знаење за да го положи испитот кај неа, таа не му впишала оценка во индексот и во електронскиот систем дека не положил туку директно побарала пари во износ од 300 евра, за да му напише шестка со која тој би го положил наведениот испит.

На 29 јуни во нејзината канцеларија, ги примила парите од студентот, така што му дала инструкции да ги остави на помошната маса, помеѓу скрипта и еден лист бела хартија, а во индексот му запишала преодна оценка.

Јавниот обвинител до судијата на претходна постапка достави предлог за определување неколку мерки на претпазливост – забрана на напуштање на живеалиштето односно престојувалиштето, обврска на осомничената да се јавува во судот, привремено одземање патна исправа, забрана за приближување или воспоставување, односно одржување контакти или врски со студентот, како и забрана за вршење на работни активности на факултетот.

Тагови: поткуп

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.