Балкан

Косовската министерка за правда не ѝ верува на Србија дека е убиен Фатон Хајризи

Хаџиу рече дека информациите дадени за Хајризи се контрадикторни и дека не се знае со сигурност дали убиениот е Хајризи и каде се случило убиството.

Министерката за правда на Косово, Албулена Хаџиу изјави дека е неприфатливо да се користи етничката припадност од страна на српската политика во случајот со убиството на српскиот полицаец Никола Красмановиќ, од страна на осомничениот Фатон Хајризи, кој исто така вчера беше убиен од српската полиција, јави дописникот на МИА од Приштина.

Хаџиу рече дека информациите дадени за Хајризи се контрадикторни и дека не се знае со сигурност дали убиениот е Хајризи и каде се случило убиството.

Таа побара темелна истрага за случајот.

- Етно-политичката употреба на криминалното дело убиство на полицаец во Лозница од страна на Владата на Србија е неприфатливо, намерно и со предумисла. Преку поранешниот портпарол на партијата на (поранешниот претседател на Србија) Слободан Милошевиќ, сега нејзин претседател и министер за внатрешни работи на Србија, Ивица Дачиќ, беше пренесена веста дека бегалецот од затворот во Косово, Фатон Хајризи, осуден за повеќе тешки кривични дела, е убиен. Информациите деновиве беа контрадикторни, па не можеме со сигурност да знаеме дали воопшто е убиен и дали е убиен на територијата на Србија или на Република Српска во Босна и Херцеговина, како и други важни и неопходни детали за истрага. Дефинитивно е потребна широка и длабока истрага за да се расветли вистината на овој случај, рече Хаџиу.

Таа рече дека го осудува убиството на секој службеник на должност и дека тоа е правно казнив чин.

- Чинот на убиство на полицаец и повредување на друг кај Лозница во Србија несомнено се тешки кривични дела против законот и редот на полицајците на службена должност. Убиството на полицајци е, без дискусија, дело за осуда во секоја правна и морална смисла. Најостро осудуваме секое такво дело, рече Хаџиу.

Фатон Хајризи, осомничениот за убиството на српскиот полицаец и ранувањето на неговиот колега во Лозница, Србија, е убиен вчера по околу 40 часа потрага, соопштија српските власти.

Српскиот вицепремиер и министер на полицијата, Ивица Дачиќ објави дека припадници на полицијата го ликвидирале Хајризи во околината на Лозница.

Според информациите кои ги пренесоа српските медиуми, Хајризи се обидел да ја помине реката Дрина и да пребегне во Босна и Херцеговина, но не успеал, па се сокрил во напуштен фабрички комплекс.

Откако МВР на Србија објави фотографија од осомничениот, еден од мештаните од областа Лозница пријавил дека видел лице со таков опис. Припадниците на МВР на Србија пристигнале во голем број, го блокирале целиот простор, а потоа го ликвидирале Хајризи.

Хајризи беше во бегство од 6 јули, кога од слободниот викенд не се врати во затворот Смрековница во Косово. Тоа беше негово деветто бегство од затвор, со што стана рекордер во Косово. На социјалните мрежи тој објасни дека мотивот за неговото бегство било злоставувањето кое го претрпел во затвор.

Фатон Хајризи на јавноста ѝ е познат од 2000 година, кога на само 15-годишна возраст уби руски војник, припадник на КФОР за што беше осуден на 27 години затвор. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Холандија од следната година ќе мора да прифати баратели на азил од другите држави на ЕУ

Холандија следната година, заедно со другите членки на Европската Унија (ЕУ), ќе мора да прифати одреден број баратели на азил од земјите кои биле изложени на „натпросечен миграциски притисок“ .

Холандија следната година, заедно со другите членки на Европската Унија (ЕУ), ќе мора да прифати одреден број баратели на азил од земјите кои биле изложени на „натпросечен миграциски притисок“ оваа година или, наместо тоа, финансиски да придонесе за нивната грижа, објави Европската комисија.

Според предлогот на Комисијата, земјите кои примиле надпросечен број баратели на азил оваа година се Грција, Кипар, Италија и Шпанија, а другите членки на ЕУ треба да им помогнат да го споделат миграцискиот товар, објави NL Times.

Голем број барања за азил се поднесени во Грција и Кипар, додека Италија е прогласена за земја под „миграциски притисок“ поради непропорционално големиот број мигранти кои пристигнале откако биле спасени на море.

Шпанија, од друга страна, се соочи со голем прилив на мигранти ова лето во нејзината северноафриканска енклава Сеута, каде што, според извештаите, десетици илјади луѓе пристигнале по море.

Бугарија, Чешка, Естонија, Хрватска, Австрија и Полска, исто така, во принцип треба да прифаќаат баратели на азил, но овие земји можат да побараат од Европската комисија ослободување или намалување на нивните обврски, наведувајќи го високиот миграциски притисок со кој веќе се соочуваат.

Сепак, Европската комисија утврди дека Холандија, Германија и неколку други земји-членки на ЕУ немаат право да бараат ослободување од обврската за прифаќање баратели на азил.

Комисијата го проценува миграцискиот притисок во секоја земја-членка поединечно, земајќи го предвид бројот на пристигнати мигранти и поднесените барања за азил, како и бруто-домашниот производ (БДП) и населението на секоја земја.

Предлогот на Европската комисија наскоро ќе биде дискутиран меѓу земјите-членки на ЕУ, кои на крајот ќе одлучат за конечниот број баратели на азил што секоја земја ќе мора да ги прифати.

Тагови: Холандија баратели на азил

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Наука

Лансирањето на ракетата „Артемис II“ предизвика пореметување во атмосферата на Земјата, тврдат научниците

Научниците од Националниот универзитет Ченг Кунг во Тајван тврдат дека лансирањето на ракетата „Артемис II“ предизвикало огромни нарушувања во атмосферата на Земјата што можеле да го нарушат GPS и другите комуникации.

Тие велат дека мисијата „Артемис II“, која беше лансирана на 1 април 2026 година, за деветдневно патување околу Месечината, создала дупки во атмосферата на Земјата и предизвикала модулации на шок-акустични и гравитациски бранови, објави списанието „Скај ат Најт“.

„Горењето што го покачува апогејот предизвикало шок бранови и невидено големи нарушувања што се прошириле на 50 степени географска должина низ Северна Америка“, рекоа авторите на студијата.

Тие додадоа дека ова е прв пат една вселенска мисија да произведе три случаи на јоносферски нарушувања над истиот регион за време на последователни орбитални маневри. Фотографија: Танјуг/АП Фото/Крис О'Мира

Иако утврдиле дека самиот настан на лансирање на „Артемис II“ не предизвикал широко распространети прекини на GPS, тие забележале промени во јоносферата што потенцијално би можеле да предизвикаат проблеми за време на идните лансирања на ракети.

„Ваквите пречки би можеле да ги нарушат комуникациите на Земјата, на пример, со попречување на радио сигналите. Исто така, лансирањата на ракети би можеле да влијаат на други технологии на Земјата кои се потпираат на GPS за позиционирање, како што се автомобилите без возач и беспилотните летала“, се вели во студијата.

„Артемис II“ патуваше подалеку од Месечината од која било претходна мисија, користејќи ја гравитационата сила на Месечината за да се катапултира околу неа и да го започне своето враќање кон Земјата.

Ова беше првата мисија со екипаж на Месечината од програмата Аполо и беше клучна пресвртница во плановите на НАСА за воспоставување трајно човечко присуство на површината на Месечината.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Во организација на грчката амбасада: Музички спој и традиција од целиот Медитеран пред полна сала во Скопје

Филхармонијата беше домаќин на музички спектакуларчен концерт насловен „Мозаико Медитерано“ на грчката лирска сопранистка Марија Костраки и ансамблот предводен од виолинистот Андонис Сусамоглу.

Настанот во организација на Амбасадата на Грција понуди уникатен спој на медитерански музички традиции, со посебен фокус на творбите на познатиот композитор Манос Хаѕидакис.

Пред полната голема сала и покрај големиот интерес, концертот помина во преубава атмосфера, воодушевувајќи ја публиката која уживаше во врвните изведби...

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.