Здравје

Кошаркарите Дамјан и Војдан Стојановски им приредија вистинско изненадувањe на децата

Во Клиничката болница „Аџибадем Систина“ со низа активности се одбележа Денот на Дишенова мускулна дистрофија.

Најголемо изненадување за децата беше дружбата со познатите кошаркари од МЗТ, браќата Дамјан и Војдан Стојановски, кои им подарија дресови со своето име и медали. На дружбата претходеше и проекција на филм „Живот во моите чевли“, приказна за предизвиците на децата со мускулна дистрофија и нивните семејства, а беа проследени и мотивациските говори од д-р мед. науки Наталија Ангелкова, специјалист по педијатрија - невролог и доц. д-р Владимир Чадиковски, специјалист по детска хирургија, супспецијалист по детска кардиохирургија. Во организација на настанот активно се вклучи и здружението Асоцијација за мускулна дистрофија Македонија, а со поздравен говор присутните ги поздрави претседателот Ване Петридов.

Во духот на одбележување на денот на лицата со ДМД, секаде во светот се осветлуваат објекти во црвена боја, па така изминатата седмица во црвено светло блескаше и Одделот за педијатрија во „Аџибадем Систина“. Во дворот на болницата се пуштија црвени балони, а сите вработени носеа црвени маички под мотото „Ниту еден мускул не е посилен од твоето срце“ во знак на поддршка на овие деца. Со овие активности се испрати силна порака дека и децата со мускулна дистрофија се дел од општеството и дека треба да бидат прифатени со своите различности.

„7 септември се одбележува веќе десет години по ред, на глобално ниво, како ден за подигнување на свеста за мускулната дистрофија на Дишен. На ваков ден се потсетуваме на неопходноста од еднакви можности за функционирање на пациентите со мускулна дистрофија во општеството. Оваа година настанот се одвива под мотото: 'Рушење на бариерите - надминување на сите пречки и остварување на комплетна инклузија во секојдневниот живот'. Тоа значи: достапност на здравствена нега на секое ниво со примена на меѓународните стандарди за нега и терапија, физичка достапност до јавните институции, училишта, факултети, согледување на предизвиците во секојдневниот живот и ангажирање на целата заедница за нивно надминување, вклучување во редовна настава во основно и средно училиште, олеснување на можностите за студирање и вработување, вклучување во широки социјални активности и овозможување ресурси за поткрепа“ – изјави д-р мед. науки Наталија Ангелкова, специјалист по педијатрија – невролог.

ЗАЕДНО ВО СПОРТОТ

Со овој настан се одбележа и продолжувањето на договорот на Клиничката болница „Аџибадем Систина“ и трофејниот кошаркарски клуб МЗТ. Втора година по ред, болницата е медицински спонзор и се грижи за здравјето на кошаркарите. Д-р Владимир Аврамовски, заменик медицински директор во „Аџибадем Систина“, објаснува дека оваа соработка за болницата, како врвна здравствена установа, која е посветена на здравјето и на унапредувањето на спортските вредности, е од големо значење.

„’Аџибадем Систина’ во континуитет е посветена на одржување на здравјето на граѓаните, а во нашата работа во која се вклучени врвни професионалци во сите специјалности, особено внимание посветуваме на поддршката на спортот. Тоа го докажуваме низ годините – се грижиме за промоција на спортот во земјата, секако како докажан лидер во превенција и третман на спортските повреди, но и со поддршката на спортски клубови, федерации, поединци. Соработката со МЗТ Скопје, со овој трофеен клуб, ја продолжуваме и оваа сезона, искрено веруваме во нивните идни успеси. Да аплаудираме заедно на новите спортски резултати, а нашиот тим ќе овозможи темелна поддршка за здравјето на играчите“ – изјави заменик медицинскиот директор Владимир Аврамовски.

Од МЗТ, пак, изјавија дека им е особена чест што за здравјето на нивните играчи ќе биде задолжен медицинскиот персонал од најдобрата болница во земјава, а оваа поддршка сигурно ќе вроди со многу победи и трофеи.

„Горди сме што ја продолжуваме соработката, најдобрите секогаш се поддржуваат. Од наредната година се надеваме дека ќе го продолжиме трендот на успешност како на домашните натпревари така и надвор. За нас е од големо значење тоа што зад нас стои еден голем бренд во здравството како што е клиничката болница 'Аџибадем Систина'“ - Филип Ѓоревски, извршен директор на МЗТ.

ЗА СВЕТСКИОТ ДЕН НА МУСКУЛНА ДИСТРОФИЈА

Светскиот ден за подигање на свеста за мускулна дистрофија е настан што се одржува секоја година на 7 септември. На овој ден се промовираат иницијативите за образование, залагање и социјална вклученост, со цел подобрување на квалитетот на животот на луѓето што живеат со дистрофинопатии. Овогодишното мото е: „Разбивање на бариерите и заедничко градење на подобра иднина“. Во светот приближно едно од 5 000 момчиња се раѓа со оваа болест, а болеста е предизвикана од мутација на хромозомот Х, поради што се засегнати главно мажите. Во нашава земја со невромускулни заболувања се соочуваат околу 100 деца. Со ДМД се дијагностицирани околу 50 деца.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Осуден поранешен претседател на Јужна Кореја

Окружниот суд во Сеул денес го осуди поранешниот јужнокорејски претседател Јун Сук-јол на две години затвор откако го прогласи делумно за виновен за нелегално примање политички средства во форма на бесплатни анкети на јавното мислење.

Централниот окружен суд во Сеул утврди дека Јун го прекршил Законот за политички фондови, што е различна пресуда од посебен судски случај во кој неговата сопруга, поранешната прва дама Ким Кион-хи, беше ослободена од обвинението врз истата основа, објави Јонхап.

Специјалниот обвинител претходно поднесе обвинение против Јун, обвинувајќи го него и неговата сопруга дека од април 2021 до март 2022 година добиле вкупно 58 анкети на јавното мислење бесплатно од Мјунг Тае Кјун, кој се претставувал како политички посредник, со проценета вредност од околу 270 милиони вони, што одговара на околу 158.000 евра.

Судот утврди дека во тој период Јун бесплатно добил 14 анкети за јавното мислење и, покрај затворската казна, нареди конфискација на имотна корист во износ од 13,9 милиони вони, односно околу осум илјади евра.

Според пресудата, прифатено е тврдењето на специјалното обвинителство дека Џун ветил дека ќе ја поддржи кандидатурата на поранешниот пратеник Ким Џонг Сун како кандидат на конзервативната Партија на народната моќ на дополнителните избори во јуни 2022 година во замена за анкети на јавното мислење. Со истата пресуда, Мјунг Тае Кјун е осуден на 18 месеци затвор. Специјалното обвинителство побара казна од четири години затвор за Јун и три години затвор за Мјунг. Бранителите на поранешниот претседател најавија жалба против денешната пресуда.

Свет

Најмалку 27 загинати во пожар во бар во Бангкок, властите велат дека излезите биле блокирани

Само неколку секунди биле доволни пламенот целосно да го проголта ноќниот бар „Ронг Бир На Ладпрао“ во Банкок..

Пожарот во кој животот го загубија најмалку 27 лица, 60тина се повредени, од кој над 20 се во критична состојба, се случил непосредно пред полноќ, додека во преполниот локал се одржувал концерт. Сведоците раскажуваат дека по силна експлозија, снемало струја низ целиот објект, а густ чад кој излегувал од електрична табла за миг ја исполнил внатрешноста. Во целосен мрак, стотици посетители се обидувале да најдат излез, додека огнот со неверојатна брзина се ширел низ објектот. Според првичните наоди на противпожарната служба, евакуацијата дополнително била отежната поради заклучен излез за итни случаи..

-Очевидците ни кажа дека имало излез на задниот дел од објектот, но бил заклучен. Тој излез води кон голем отворен простор овде, но на вратата која била заклучена имало ознака „само за вработени“

-Кога почна да гори, најпрво се слушна експлозија и снема струја во цел бар. Луѓето не можеа да гледаат каде одат..

-Пожарот беше многу силен. Кога дојдов овде луѓето буквално се бореа да излезат надвор, но многу од нив не успеаа. Многу луѓе останаа заглавени внатре.

Дека најголем дел од телата биле пронајдени во задниот дел од објектот, потврди и Тајландскиот премиер Анутин Чарнвиракул, кој утрово го посети местото на трагедијата и најави темелна истрага. Според Гувернерот на Банкок Чадчарт Ситипунт пак, огнот брзо се проширил и поради лесно запаливите материјали во локалот кој се наоѓале на таванот, но биле дел и од сценската декорација.

-Многу од луѓето не можеа да излезат надвор, бидејки тие отишле кон задниот дел на објектот. Се обиделе да се засолнат од чадот и огнот во тоалетите..Таму всушност ги најдовме најголемиот дел од телата,- изјави Анутин Чарнвиракул – премиер на Тајланд.

-Пожарот започнал некаде околу полноќ , брзо се раширил низ просториите и имало многу чад. Мислам дека можеби имало и нешто што го блокирало излезот за итни случаи, па многу луѓе не можеле да се спасат брзо. Многу од нив се загушиле и останале без свест,- Чадчарт Ситипунт - гувернер на Банкок.

Слична трагедија на 1 јануари годинава се случи и во швајцарскиот ски центар Кранс-Монтана, каде при пожар за време на дочек на новата година во ноќен бар загинаа 41 лице, а над 100 беа повредени. Пожарот избувнал по употреба на пиротехнички средства, а пламенот брзо зе проширил поради лесно запалив материјал на таванот. Истрагата за трагедијата се уште трае, а покрај сопствениците на барот, се проверува и евентуалната одговорност и кај дел од локалните фукционери и надлежните служби.

Македонија

Мисајловски најави дека ќе се реконструира Домот на АРМ, ќе се вложат околу 10 милиони евра

Целосна реконструкција на објект во „Ќојлија“, Домот на АРМ и хотелот „Шар“, реконструкција на воениот стадион и спортските терени, како и изградба на нова спортска сала во Воената академија, најави денеска министерот за одбрана Владо Мисајлов.

Целосна реконструкција на објект во „Ќојлија“, Домот на АРМ и хотелот „Шар“, реконструкција на воениот стадион и спортските терени, како и изградба на нова спортска сала во Воената академија, најави денеска министерот за одбрана Владо Мисајловки, кој денеска беше на увид во градежните работи во касарната „Ќојлија“.

Мисајловски најави дека реконструкцијата во „Ќојлија“ во кој се вложуваат над 10 милиони денари ќе биде завршена во септември, а паралелно се работи и во Велес, Прилеп и Штип. Вкупно се работи на околу 20 проекти, со вредност од над 3 милиони евра.

Тој информираше дека е подготвена техничка документација за повеќе капацитети, меѓу кои домот на армијата, за кој е подготвена проектна документација со проценета вредност од околу десет милиони евра, како и за хотелот „Шар“, а следната година ќе започне нивната целосна реконструкција. Тој посочи дека капиталните проекти ќе продолжат со реконструкција на воениот стадион и спортските терени, како и изградба на нова спортска сала во Воената академија.