Кос: Време е за проширување на проширувањето - Канал 5

Свет

Кос: Време е за проширување на проширувањето

На земјите кандидати за членство им треба време за реформи, а понекогаш на нашите земји членки им треба време да одлучат, време кое денешниот свет повеќе не ни го дава.

Кос: Време е за проширување на проширувањето

Во актуелниот геополитички контекст време е за „проширување на проширувањето“, за да не ја изгубиме контролата врз безбедноста и стабилноста на Европа, порача еврокомесарката за проширување Марта Кос во обраќањето на „Форумот за проширување на ЕУ 2025: Заокружување на Унијата, обезбедување на нашата иднина“ што се одржува денеска во Брисел.

- На земјите кандидати за членство им треба време за реформи, а понекогаш на нашите земји членки им треба време да одлучат, време кое денешниот свет повеќе не ни го дава. Ако не дејствуваме брзо и решително, ризикуваме да ја изгубиме контролата врз безбедноста и стабилноста на нашиот континент, рече Кос.

Таа нагласи дека политиката на проширување на ЕУ одигра централна улога во клучните моменти во поновата историја на Европа и затоа таа е неопходна и денес со цел уште еднаш да се спротивставиме на силите што имаат за цел да го дестабилизираат европскиот континент.

- Треба да го исчистиме нашиот континент од автократии, треба да го одбраниме нашиот простор на слобода и демократија и уште еднаш сме свртени кон политиката на проширување за да обезбедиме одговори за пополнување на јазот во просперитетот, слободата и стабилноста низ цела Европа и да ја затвориме празнината што се повеќе ја користат нашите противници, трговците со луѓе и криминалците, рече Кос.

Таа порача дека ЕУ и денес како и нејзините основачи во 50-те години на минатиот век се соочува со прашањата како да се обезбеди војните во Европа засекогаш да бидат испратени во учебниците по историја, како да се заштитат демократиите од автократски тенденции, како да се максимизира европската способност за дејствуваме и како Европа да одлучува за сопствената иднина.

Според неа, ЕУ делумно одговори на овие прашања во минатото, кога во 80-те години на минатиот век и се приклучија новите демократии Грција, Шпанија и Португалија и на почетокот на 20-от век, кога и пристапи голем дел од Централна и Источна Европа.

- Денес повторно се подготвуваме за нови членки и го правиме тоа повторно водени од прашањата за мир, демократија и безбедност, рече Кос.

Според неа, проширувањето не само поттикнувач на промени во земјите кандидати за членство, туку и можност ЕУ да даде одговори на загриженоста на нејзините граѓани во врска со социјалните или економските модели, миграцијата, корупцијата или организираниот криминал.

Таа потенцира дека проширувањето како „сила што предизвикува промени“, премногу често буди негативни асоцијации, па затоа обврска на сите е да се стави крај на ваквите асоцијации и да се дадат веродостојни одговори за обезбедување посилна Европа и за нејзино обединување првпат во историјата.

- Овие фундаментални прашања за иднината на Европа бараат отворена дебата, на сите што сакаат да се чуе нивниот глас – владите, граѓанското општество, европските институции, но исто така и националните парламенти на сегашните и идните земји членки, додаде Кос.

Според неа, 2025 е добра година за проширувањето на ЕУ, со придвижување на многу работи и значителен напредок во европскиот пат, што е доказ дека спроведувањето на реформите се исплати.

- За да бидеме во чекор со геополитичката итност на нашето време постепено ја забрзавме интеграцијата, вклучително и преку Украинскиот инструмент и плановите за раст на Западниот Балкан и Молдавија, што уште отсега ја прави Европската Унија реалност во кандидатите за членство, рече Кос.

Таа порача дека и покрај актуелните предизвици, проширувањето мора да остане кредибилен процес и да се базира на заслуги, без скратени или забрзани постапки, без да се затвораат очите пред недостатоците како одговор на геополитичките аргументи.

- Кога демократските структури се слаби или не се почитува владеењето на правото, тоа може да ги отвори вратите за штетни влијанија, корупција и организиран криминал. Нашата Унија е изградена врз доверба меѓу своите членки. Успех во проширувањето е можен само кога има доверба заснована на достигнувања базирани на заслуги, рече Кос.

Според неа, паралелно и ЕУ треба да се прилагоди за проширувањето за да овозможи одржување на нејзиниот социјален модел, зајакната контрола на границите, почитување на владеењето на правото и свое непречено и ефикасно функционирање.

Таа нагласи дека во времето кога нејзината земја Словенија се подготвуваше за членство во ЕУ на проширувањето главно се гледаше низ призмата на просперитет, но денес тоа исто така е и прашање на безбедноста.

- Гледаме дека ако нашите соседи изберат европска иднина, тие се напаѓани. Нашите земји кандидатки гледаат кон ЕУ заштита од овие напади и затоа ние мора да ја направиме европската интеграција реалност денес, а не утре, истакна Кос.

Според неа, Унијата не треба да се плаши да размислува за следните чекори во проширувањето, туку треба да работи на тоа како може да ги интегрира земји кандидати за членство и во некои други нејзини структури.

- Потребата за обнова на дискусијата за иднината на проширувањето и за проширената Унија денес е од огромно значење. Затоа овој Форум за проширувањето се одржува токму навремен, за да ја започнеме таа дебатата заедно денес, заклучи Кос.

Тагови: Марта Кос

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Ќерката на Никол Кидман го оствари сонот што го имала на 16 години: „Плачев од среќа“

Ќерката на Никол Кидман, Сандеј Роуз, преку социјалните мрежи се осврна на еден од најголемите моменти во нејзината досегашна кариера.

Ќерката на Никол Кидман го оствари сонот што го имала на 16 години: „Плачев од среќа“

Младата манекенка се присети како, пред само две години, го гледала настанот „Vogue World“ со својата мајка и сонувала еден ден и самата да учествува во него. Оваа година, таа желба се оствари.

„Дојдов во Париз со мајка ми пред две години и се сеќавам дека слушнав оти токму тој ден се одржува ’Vogue World‘. Се вратив во хотелот и го гледав преносот на YouTube – сите тие прекрасни жени, музиката и целиот спектакл. Во Милано сфатив дека оваа година и самата ќе учествувам во шоуто. Мојата 16-годишна верзија ќе плачеше од среќа, а плачев и јас сега, на 18 години. Имам огромна среќа што можам да доживеам вакви работи и да запознаам толку многу луѓе“, напиша Сандеј на Инстаграм.

Оваа 18-годишна девојка учествуваше на ревијата „Vogue World“ за време на Модната недела во Милано во септември. Таа се појави во полупроѕирен бел фустан со длабоко деколте, широки ракави и лелеава силуета. Фустанот беше украсен со нежен цветен вез.

Советот на Никол Кидман за нејзината ќерка

Во интервју за ноемвриското издание на „Vogue“, Никол откри како ги советува своите ќерки додека тие растат под будното око на јавноста. Кога ја прашаа за омразата на интернет, осудувањето и нападите, таа одговори: „Едноставно се вртиш и си заминуваш. Зашто тоа ќе те скрши. Ќе те уништи“.

„Тоа многу ме плаши. Но, јас почнав да работам на 14 години, така што и немам многу право на глас“, додаде таа. Сандеј претходно зборуваше за магазинот „Nylon“ за правилата што нејзината мајка ги поставила во врска со нејзината кариера.

„Постојат две важни правила“, рече таа. „Првото беше дека не можев да работам во модната индустрија сè додека не наполнив 16 години. Второто е дека училиштето секогаш мора да биде на прво место. На почетокот тоа го мразев, но всушност мило ми е што постојат тие правила, бидејќи ми помагаат да останам цврсто на земја.“

Тагови: никол кидман

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Фридрих Мерц е во сериозни проблеми

Само 10% од Германците изјавиле дека се задоволни од работата на канцеларот Фридрих Мерц – што претставува најниска бројка во последните речиси 30 години – според анкетата „Deutschlandtrend“, за што известува порталот „Interia“.

Фридрих Мерц е во сериозни проблеми

На почетокот на септември, 13% од испитаниците ја оценувале работата на Мерц позитивно. Оваа нова бројка го означува најниското ниво во текот на целиот негов мандат како канцелар.

Доколку изборите за Бундестагот се одржеле на преминот од септември кон октомври, блокот CDU/CSU би можел да смета на 20% од гласовите. Тоа е за еден процентен поен помалку отколку на почетокот на септември.

Крајно десничарската партија „Алтернатива за Германија“ (AfD) доби најголема поддршка во анкетата, со 27%; нејзиниот рејтинг остана непроменет во текот на месецот. Зелените би освоиле 16%, Социјалдемократската партија на Германија (SPD) 13%, а партијата „Левица“ (Die Linke) 11%. Со 4% од гласовите, Слободната демократска партија (FDP) не би го достигнала изборниот праг од пет проценти.

Што се однесува до членовите на владата, министерот за одбрана Борис Писториус (SPD) доби значително подобри оценки од канцеларот: 50% од учесниците во анкетата биле задоволни или многу задоволни од неговата работа. Работата на министерот за надворешни работи Јохан Вадефул позитивно ја оцениле 34% од испитаниците, додека работата на министерот за внатрешни работи Александар Добринд добила позитивна оценка од 27%. Околу 20% од испитаниците биле задоволни од работата на вицеканцеларот и министер за финансии Ларс Клингбајл, додека приближно еден од шест испитаници бил задоволен од работата на министерката за труд Бербел Бас. И двајцата се членови на „SPD“.

Анкетата била спроведена кон крајот на септември од страна на институтот „Infratest dimap“. Истражувањето било спроведено преку телефон и интернет, користејќи репрезентативен примерок од 1.303 гласачи со право на глас.

Извор: Б92

Тагови: Фридрих Мерц

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

„Тајм“: Трамп го прашал „Грок“ што би се случило ако го уапси Мадуро

Американскиот претседател Доналд Трамп го прашал „Грок“ – чет-бот со вештачка интелигенција во сопственост на Илон Маск – како народот на Венецуела би реагирал на апсењето на тогашниот претседател Николас Мадуро.

„Тајм“: Трамп го прашал „Грок“ што би се случило ако го уапси Мадуро

Ова се случило неколку недели пред тој да нареди операција за негово приведување, открива списанието „Тајм“. Наводно, вештачката интелигенција му рекла на Трамп дека многумина во Венецуела веројатно би го прославиле падот на Мадуро.

Во декември 2025 година, Трамп се сретнал приватно со Маск во Овалната соба, каде што со часови го испрашувал „Грок“ за својот мандат и политичкото наследство. „Тајм“ ја заснова оваа информација на изјава од официјално лице кое присуствувало на средбата.

Едно од прашањата што Трамп му ги поставил на чет-ботот било како би реагирале Венецуелците доколку САД го уапсат Мадуро. Официјалното лице цитирано од списанието вели дека „Грок“ го опишал Мадуро како „репресивен и крајно непопуларен диктатор“ и проценил дека многумина во Венецуела навистина би можеле да го прослават неговиот пад.

Операција во Каракас

Еден месец подоцна, Трамп наредил операција за апсење на Мадуро. Американските сили го привеле него и неговата сопруга, Силија Флорес, за време на воена операција во Каракас на 3 јануари, а потоа ги префрлиле во Соединетите Држави.

Мадуро бил однесен во Њујорк, каде што се соочува со федерални обвиненија за трговија со дрога – обвинувања што тој ги негира. Кога некои Венецуелци навистина го прославиле апсењето, Трамп – според официјалното лице – заклучил дека „Грок“ е „генијален“.

Извор: Индекс.хр

Тагови: Доналд Трамп Николас Мадуро

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер