Фрустрациите се разбирливи, но никој не може да и даде гаранции на Македонија дека по уставни измени нема да следат нови блокади поради билатерални прашања - еврокомесарката за проширување Марта Кос на брифинг за европските новински агенции во Брисел засега остава само простор за надеж дека наскоро ќе се најде решение, за што уверува дека лично се залага. Како доказ за тоа вели се средби со бугарски политичари денеска, а потоа најавува дека ќе оствари контакти и со политичарите од Македонија.

„ Сфаќаме и тоа е многу човечки и разбирливо што вашата земја сака да има гаранции по се она што го помина. Гаранции не може да има, но она што го очекувам од сите земји членки кога има билатерални прашања, е разговорите да се водат со добра волја и со визија да се дојде до компромис. Најдобро би било билатералните прашања да не се мешаат во пристапниот процес.. “-Марта Кос – еврокомесарка за проширување.

По овој став на еврокомесарката, се огласија од македонското МНР, од каде повторија дека остануваат на ставот дека мора да се најде начин и да се обезбедат гаранции. Велат дека министерот Муцунски кој викендот во Луксембург се сретна и со Кос, постојано потенцира дека процесот за проширување мора да се води по систем на заслуги.

„ Ја нагласуваме неопходноста ЕУ да обезбеди институционални гаранции дека билатералните прашања нема да бидат инструментализирани за блокирање на пристапниот процес. Само на тој начин може да се обезбеди транспарентен и предвидлив процес на интеграција, кој ќе ја зачува довербата на граѓаните во Унијата и европската перспектива на нашата држава. – велат од МНР.

Марко Трошановски од Институтот за демократија оценува дека унијата има опција да направи притисок врз Бугарија на тој начин што ќе постави европски објективни критериуми во билатералните преговори, по пример на други меѓудржавни спорови. Сепак, смета дека блокади во иднина се очекувани, бидејќи како држава имаме преземени обврски со преговарачката рамка.

„ Обврските кои ние тотално антидржавно ги прифативме во протоколот се тие што веднаш на следниот чекор ќе ја блокираат повторно Македонија откако би ги направила уставните измени, така што треба да сме свесни како општество за тоа. Засега останува она фазно проширување, членство во одредени европски институции, како што беше СЕПА, идеално би било нели заедничкиот пазар за кој и Германија се залага. Во оваа фаза, доколку не се промени начинот на одлучувањето за проширување – тоа е патеката која би требало за жал да ја одиме. Но, што да правиме кога имаме такви соседи. “Марко Трошановски – Институт за демократија „Социетас цивилис“.

За германско-словенечката иницијатива со која се предвидува промена во методологијата, наместо со консензус одлуките да се носат со квалификувано мнозинство, Трошановски оценува дека шансите се премногу мали. Според информациите кои ги потврди и еврокомесарката, поддршка за оваа идеја најавиле само половина од земјите-членки на унијата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.