Македонија

Кос изрази надеж дека новата бугарска влада ќе и помогне на Македонија да ги започне пристапните преговори

Еврокомесарката за проширување Марта Кос изрази надеж дека новата бугарска влада ќе и помогне на Македонија да ги започне пристапните преговори со ЕУ.

На дебатата во комисијата за надворешни работи во ЕП, Кос сепак не ги заборави уставните измени и нагласи дека тие остануваат услов за напредокот на земјава. Пораките на Кос дојдоа како одговор на прашањата од бугарскиот европратеник Петар Волгин кој оцени дека Македонија се обидувала да ја промени преговарачката рамка. Дополнително, Волгин ја праша Кос дали постои ризик од ревидирање на принципот на едногласност во Унијата. Но, наместо директен одговор, таа објасни дека едногласноста е неопходна за почеток и завршување на пристапниот процес, додавајќи дека е потребна поголема ефикасност во носењето на останатите 150 одлуки помеѓу нив.

-Се надевам дека новата бугарска влада ќе ни помогне да ја доведеме Македонија до почеток на преговорите, но за да почнеме, потребно ни е Македонија да ги спроведе уставните измени и се надевам дека двете земји ќе успеат да соработуваат добро. / За пристапниот процес, врз основа на европските договори, потребни ни се две едногласни одлуки, за да се даде статус и за завршување на преговорите, сега имаме 150 чекори каде ни е потребна едногласност, и ова е една точка каде би можеле да бидеме поефективни,- - Марта Кос – Еврокомесарка за проширување.

По убедливата победа на Румен Радев, Бугарија е на пат по неколку години, конечно да добие стабилна влада. Бугарската претседателка Илијана Јотова најави дека процесот би започнал најрано идната недела, за кога планира да ја свика конститутивната седница на новиот парламентарен состав.

-Прво да ги почекаме официјалното објавување на резултатите од изборите и објавувањето по име на новите 240 народни претставници. Знаете дека рокот е до 26 април, лично јас се надевам дека Државната изборна комисија ќе биде готова и порано, така што следната недела или таа по неа најверојатно ќе има конституирање на Народното собрание. Не можам да ја кажам се уште точната дата,- - Илијана Јотова – Претседателка на Бугарија.

Ден по изборните резултати кај нашиот источен сосед и политичкиот врв во земјава изрази надеж дека во Бугарија ќе се формира стабилна политичка влада која ќе значи можност за дијалог и за деблокада на македонските евроинтеграции. Претседателката Сиљановска Давкова оцени дека нејзиниот доскорешен колега Радев во улога на премиер ќе може да го искористи долгиот политички стаж за некакво поместување во односите меѓу двете земји.

Шефот на дипломатијата Муцунски пак, најави дека во следниот период ќе има зголемен ангажман од македонска страна со цел изнаоѓање на решение за отворените прашања на релација Скопје –Софија.

Тагови: Марта Кос

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

МЗ: Состојбата во Гостивар се следи – намален вкупниот број прегледи

Министерството за здравство информира дека епидемиолошката состојба во Гостивар континуирано се следи од надлежните здравствени институции.

Во текот на 3 август се регистрирани вкупно 78 прегледи, што е за шест помалку во споредба со претходниот ден, кога биле евидентирани 84 прегледи.

Во однос на западнонилската треска, на Клиниката за инфективни болести е евидентиран еден нов сомнителен случај. Во тек се потребните испитувања за лабораториска потврда или исклучување на заболувањето.

Министерството за здравство, во координација со надлежните здравствени установи, продолжува внимателно да ја следи состојбата и навремено ќе ја информира јавноста за сите нови релевантни податоци.

Тагови: Гостивар

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Радеска: Обвинителството да отвори истрага – Мицкоски и Клековски го загрозија здравјето на граѓаните на Гостивар

Има нов, сериозен момент во скандалот со загадената вода во Гостивар.

Власта официјално потврди присуство на бактеријата Pseudomonas aeruginosa во водата.

Водата што ја прогласија за „техничка“ и дека може да ја користат граѓаните има бактерија. Страшно!

Тоа значи дека граѓаните на Гостивар се капеле со бактерија која претставува ризик по здравјето.

Кожни инфекции и бројни други сериозни заболувања и други инфекции предизвикува оваа бактерија.

Ова е врв на институционалниот колапс и уште еден здравствен скандал.

Системот на Мицкоски и Клековски целосно потфрли во својата основна задача, наместо да го заштити здравјето на граѓаните го загрози.

Затоа Мицкоски и Клековски се кријат зад Тошковски и Ангелов, луѓе кои не се стручни за ова и само создаваат забуна и грижа кај граѓаните.

Сѐ уште Владата не достави официјален документ со кој се потврдува дека водата што граѓаните на Гостивар ја користат повеќе од една недела е технички исправна.

Единствена „потврда“ беше изјавата на Мицкоски. Ништо повеќе.

Со признанието за присуство на бактерија се потврдува дека капењето не било дозволено, а граѓаните се капеа.

И повторно се врши хиперхлорирање.

Кога се прави хиперхлорирање - капењето не е дозволено исто така поради високото ниво на хлор.

Концетрацијата на хлор мора да се спушти на дозволени вредности за да може да се користи.

Министерот Клековски најавуваше дека од оваа недела водата ќе може да се пие.

Мицкоски рече дека има бактерија.

Сега и официјално е потврдено: присутна е опасната бактерија Pseudomonas aeruginosa, која има сериозни последици по здравјето на човекот.

Ова е страшна информација.

Обвинителството мора веднаш да отвори истрага, мора да има кривична одговорност за:

• Христијан Мицкоски;

• Сашо Клековски;

• Сите одговорни лица во институциите кои молчеа и не презедоа мерки додека беше загрозено здравјето на илјадници граѓани.

Одговорноста не може и не смее да се избегне.

Обвинителството мора да покаже дека законот важи за сите и веднаш да отвори истрага за овој тежок скандал.

Прес конференција на Елена Радеска, СДСМ

Тагови: Радеска

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

РКЕ: Цената на дизелот се зголемува за 1 денар, бензините поевтинуваат за 2 денари по литар

Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 1,24% во однос на одлуката од 27.7.2026 година.

Референтните цени на нафтените деривати на светскиот пазар во споредба со претходната пресметка бележат намалување кај бензините во просек за 2,069%, кај дизелот зголемувањето е во просек за 4,806%, кај екстра лесното масло зголемувањето е во просек за 0,930% и кај мазутот намалување во просек за околу 4,787%.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,1423%.

Од 05.08.2026 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС - 95 91,00 (денари/литар)

Моторен бензин ЕУРОСУПЕР БС - 98 93,00 (денари/литар)

Дизел гориво ЕУРОДИЗЕЛ БС (Д-Е V) 99,50 (денари/литар)

Масло за горење Екстра лесно 1 (ЕЛ-1) 98,50 (денари/литар)

Мазут М-1 НС 46,419 (денари/килограм)

Во денешната одлука е применет намален износ на акцизата од 2,00 ден/лит кај бензините ЕУРОСУПЕР БС-95 и ЕУРОСУПЕР БС-98 и намален износ на акцизата од 4,00 ден/лит кај ЕУРОДИЗЕЛ (Д-Е V).

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 2,00 ден/лит.

Малопродажната цена на ЕУРОДИЗЕЛ (Д-Е V) се зголемува за 1,00 ден/лит.

Малопродажната цена на Екстра лесното масло за домаќинство (ЕЛ-1) се зголемува за 0,50 ден/лит.

Малопродажната цена на Мазутот М-1 НС се намалува за 1,680 ден/кг.

Напоменуваме дека ова се максималните цени на нафтените деривати од 00:01 часот на 05.08.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

РКЕ

Тагови: горивата РКЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.