Концерт со уметнички од Албанија и премиера на претставата „Полковникот птица" - Канал 5

Култура

Концерт со уметнички од Албанија и премиера на претставата „Полковникот птица"

Улогите во претставата ги толкуваат Бехреда Решит, Дритон Љазами, Кујтиме Ахмети, Марко Дојоски, Ајше Усеини, Берат Махмути, Ариан Ејупи, Елизабета Клинчаревска Младеновска, Ѓорѓи Нешкоски, Марија Кондовска. 

Концерт со уметнички од Албанија и премиера на претставата „Полковникот птица"

Фестивалската програма на „Охридско лето" за денеска предвидува две содржини, со концерт на уметничките од Албанија Викена Каменица – мецо сопран во пијано придружба на Мерита Реџа –Тершана, како и премиерната изведба на претставата „Полковникот птица" со Театарот од Гостивар, во режија на Андреј Цветановски.

За „Полковникот птица" од Христо Бојчев режисерот Цветановски ќе рече дека е претстава за различни луѓе, кои со својата различност и возбуда за нови работи треба да не пленат сите. Нивната посветеност треба да не учи колку е битно да се верува и да се постои во овој свет, колку и да е тешко. Целта на претставата треба да се бара во нивното разбирање, и кога ќе ги разбереме да станеме подобри луѓе со тоа. Нивната лудост е само начин да се верува. Можеби идејата е утопистичка и идеалистичка, но тоа е и улогата на театарот. Соочени со пандемијата, театарот почнува да бара начини на функционирање низ регулативите и правилата што ги носи овој нов свет. Се обидуваме низ сите тие правила да создадеме топла приказна и да го искористиме процесот и како експеримент и од прописите да направиме квалитет.

Инаку, „Полковникот птица" е оценет како најуспешен драмски текст на Бојчев што ја добива една од најголемите европски награди за драмски текстови, наградата на Британскиот совет. Дејствието на драмскиот текст зборува за една група ментално заболени луѓе кои живеат во лудница, заборавени од Бога, и таму стигнува хуманитарна помош која требало да стигне во кризно подрачје, ама по грешка дошла до нив. Тоа ги охрабрува и тие се организираат да одат до Стразбур, да го изложат својот проблем. Во ова време кога се актуелни мигрантските кризи и премините преку граница, овој текст може да добие нов контекст, а во исто време да зборува за Балканот како вечен кандидат за Европа…

Улогите во претставата ги толкуваат Бехреда Решит, Дритон Љазами, Кујтиме Ахмети, Марко Дојоски, Ајше Усеини, Берат Махмути, Ариан Ејупи, Елизабета Клинчаревска Младеновска, Ѓорѓи Нешкоски, Марија Кондовска. Претсавата че се игра на големата сцена „Долни Сарај" од 22 часот.

Два часа претходно солистички концерт во „Света Софија" ќе одржат албанските уметнички Викена Каменица – мецо сопран и Мерита Реџа –Тершана на пијано.

Викена Каменица е една од најпознатите оперски пејачки на нејзината генерација во Албанија.Таа е ќерка на оперски пејачи, успешно ги завршила студиите на Музичката академија во Тирана, а во периодот од 2004-2006 продолжува да студирана ЦЕЕ Музичкиот театар во Виена каде работи со Илеана Котрубас и Бернд Вајкл.

Во 2008 година добива специјален грант да студира на летната академија „Моцартеум" во Салцбург во класата на Алесандра Алтхоф. Во Албанија, Викена Каменица два пати ја добива наградата „Култ" за најдобро Оперско остварување и тоа за Розина во „Севилскиот берберин" и во 2017 година за улогата на Ромео во „Капулети и Монтеки" на Белини. Од 2001 година е вработена во Националната опера во Тирана каде ги покрива сите улоги од мецосопранскиот фах како Фидалма во „Таен брак", Сузуки во „Мадам Батерфлај" од Пучини, Флора во Вердиевата „Травијата", Анита во „Приказна од западната страна" од Бернштајн, Сибел во „Фауст" од Гуно и Трета дама во Моцартовата „Волшебна флејта". Гостува во Букурешт и Темишвар во Романија, а настапува и на Фестивалот во Седиер во Франција. Настапува во главната улога во операта „Кармен" од Бизе, ја пее Мадалена во „Риголето", Дорабела во „Така прават сите", Џована Сејмур во „Ана Болена", а настапува и покрај исклучителната Инва Мула во „Хофманови приказни", а партнерка е како Шарлота во „Вертер" на извонредниот албански тенор Сајмир Пиргу. Неодамна во Париз ја пее насловната улога на Далила во „Самсон и Далила" од Сен-Санс, како и улогата на Ацучена во „Трубадур".

Концертите се значаен дел од карирата на Викена Каменица, па така, таа настапува со дела од: Мануел де Фаља, Вивалди, Дворжак, Перголези, Бетовен, Брамс и Вагнер.

Особено се истакнува со циклусот „Зимско патување" од Шуберт кој го изведува во придружба на Мерита Реџа -Тершана. Покрај со класичната музика, Викена настапува и како џез пејачка и во изведба на мјузикли во кои ги пее улогите на Есмералда во „Грбавецот од Нотр-Дам", Мама Мортон во „Чикаго", г-ѓа Монтеки во „Ромео и Јулија" и др. Викена Каменица е омилена кај албанската публика, токму поради нејзината целокупна музичка личност како и поради исклучителното сценско присуство.

За Мерита Реџа –Тершана критиката вели дека е една од најактивните уметници на албанската територија и таа продолжува да гради кариера полна со нови достигнувања. Добитничка е на импресивна бројка на национални награди како Изведувач на годината на албанскиот фестивал за современа музика во 1996, Изведувач на годината и добитник на Култ наградата во 2010 и 2016. Родена во Тирана, Мерита Реџа – Тершана дипломира на Универзитетот за уметности во Тирана во класаста на проф. Маргарита Кристиди, а се усовршува на пост-дипломски студии и на мајсторски курсеви кај Паул Бадура-Скода и Тил Енгел. Тершана работи на Универзитетот во Тирана од 1994, најпрво како корепетитор, а подоцна од 2002 година како педагог.Како солист настапува со повеќе оркестри вклучително со оркестарот на Албанското радио и ТВ, оркестарот на Универзитетот во Тирана, оркестарот на Операта под диригентската палка на: Ј. Барбулуши, Л. Квадрини, Б. Лапај, А. Лепури, Н. Марин и Д. Савиќ. Како солист е често канета да настапи на познати фестивали во Албанија и Европа меѓу кои Фестивалот „Шлезгвиг- Холштајн" (Германија), Фестивалот во Брегенц (Австрија), Фестивалот „Гросето" во Италија како и на бројни фестивали во регионот. Мерита Реџа -Тершана често и за прв пат изведува нови дела од албански композитори, а во 2009 снима ЦД со музика од Шуман. Исто така, има снимено 2 ЦД- а со дела од албански композитори. Сега, Тершана како вонреден професор предава пијано на Универзитетот за уметности во Тирана.

На програмата на концертот од 20 часот се арии на Леонкавало, Шуберт, Бизе, Албениц, Сен Санс, Гранадос, Барбиери, Чапи, Дебиси, Вајл, Гершвин, Харапи, Мула, Јакова. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Градот Скопје: Авионска дезинсекција против комарци на 20.08.2026 и 21.08.2026

Доколку временските услови не го дозволуваат вршењето на дезинсекцијата, истата ќе се изврши првиот нареден ден.

Градот Скопје: Авионска дезинсекција против комарци на 20.08.2026 и 21.08.2026

Градот Скопје ги известува граѓаните дека:

- Авионска дезинсекција на подрачјето на градот Скопје, против комарци, ќе се реализира на 20.08.2026 (четврток) и 21.08.2026 (петок) во раните утрински часови.

- Терестична дезинсекција на подрачјето на градот Скопје, против комарци, ќе започне на 23.08.2026 (недела) и ќе трае до 26.08.2026 (среда), во период од 22.00 до 03.00 часот, наредниот ден

Доколку временските услови не го дозволуваат вршењето на дезинсекцијата, истата ќе се изврши првиот нареден ден, кога временските услови ќе бидат поволни, во истите термини.

Се известуваат пчеларите навремено да ги преземат потребните мерки за заштита на пчелите.

Тагови: Градот Скопје

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Муцунски – Мацинка: Цврсто македонско-чешко партнерство, силна поддршка за европската интеграција и нови можности за економска соработка

Во фокусот на средбите во Охрид беа натамошното зајакнување на билатералните односи и потврдувањето на континуираната чешка поддршка за европската интеграција на земјата. 

Муцунски – Мацинка: Цврсто македонско-чешко партнерство, силна поддршка за европската интеграција и нови можности за економска соработка

На покана на министерот за надворешни работи и надворешна трговија, Тимчо Муцунски, денеска во официјална дводневна посета на Република Македонија престојува заменик-претседателот на Владата и министер за надворешни работи на Чешката Република, Н.Е. г. Петр Мацинка.

Во фокусот на средбите во Охрид беа натамошното зајакнување на билатералните односи и потврдувањето на континуираната чешка поддршка за европската интеграција на земјата. Соговорниците заеднички оценија дека македонско-чешките односи се одликуваат со високо ниво на политички дијалог, искрено пријателство, меѓусебна доверба и партнерство, при што беше изразен заемен интерес за нивно натамошно продлабочување.

Значаен дел од разговорите беше посветен на економската соработка, зголемувањето на трговската размена и можностите за нови чешки инвестиции. Беше истакната подготвеноста за интензивирање на контактите меѓу надлежните институции и бизнис-заедниците на двете земји, особено во транспортот и инфраструктурата, енергетиката, туризмот, земјоделството и технолошките инвестиции.

„На економски план постои значителен простор за повеќе. Чешката Република веќе се вбројува меѓу нашите 15 најзначајни трговски партнери, но нашата амбиција е оваа соработка да ја подигнеме на повисоко ниво. Гледаме конкретни можности во транспортот и инфраструктурата, енергетиката, туризмот, земјоделството и технолошките инвестиции“, истакна министерот Муцунски по средбата.

Соговорниците разменија мислења и за актуелните регионални, европски и глобални безбедносни прашања. Како сојузници во НАТО, беше нагласена потребата од натамошно зајакнување на соработката и координацијата, како и заедничката одговорност за зачувување на мирот, безбедноста и стабилноста во Европа и во регионот, особено во услови на длабоки геополитички промени и зголемени безбедносни предизвици.

Посебно внимание беше посветено на европската перспектива на земјата и на процесот на пристапување кон Европската Унија. Министерот Муцунски изрази благодарност за принципиелната и континуирана поддршка на Чешката Република за европската перспектива на Западниот Балкан и за полноправното членство на земјата во Европската Унија.

Во разговорите беше потврдено дека Чешката Република останува јасен поддржувач на политиката на проширување, препознавајќи го нејзиното стратешко и геополитичко значење за стабилноста, безбедноста и просперитетот на европскиот континент. Соговорниците разговараа и за реформските процеси, европската агенда и прашањата од значење за натамошниот напредок кон полноправно членство.

„За нас, европската интеграција останува стратешка определба. Подготвени сме да ја завршиме нашата работа, да ги спроведуваме реформите и да ги исполнуваме европските стандарди. Но процесот мора да биде кредибилен и предвидлив, а напредокот да се вреднува врз основа на резултати, заслуги и однапред утврдени европски критериуми. Тоа не е барање за привилегиран третман. Тоа е барање за фер и европски процес“, нагласи Муцунски.

Изразувајќи задоволство од посетата и благодарност за гостопримството, министерот Мацинка нагласи дека посетата, покрај политичката и билатералната, има и значајна бизнис-димензија. Во официјалната делегација се вклучени и претставници на повеќе чешки компании, кои во рамките на дводневната посета ќе остварат директни контакти со македонската бизнис-заедница, со цел искористување на потенцијалот за B2B-соработка и натамошно унапредување на економските и трговските односи меѓу двете земји.

На средбата беше реафирмирана заемната определба за натамошно унапредување на македонско-чешкото партнерство и за преточување на одличните политички односи во конкретна и продлабочена соработка во областите од заемен интерес.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

УЈП на работна средба со туристичкиот сектор во Охрид

„Фер туризам започнува со пријавен доход“

УЈП на работна средба со туристичкиот сектор во Охрид

Во рамки на активностите за поголема даночна информираност и усогласеност во туристичкиот сектор, денес 19.08.2026 година Управата за јавни приходи во Охрид одржа информативно-работна средба со издавачи на вили, апартмани и соби, хотелиери, угостители и претставници на други дејности поврзани со туризмот.

Информативно-работната средба беше реализирана од страна на стручен тим на Управата за јавни приходи, во соработка со Општина Охрид, со цел зајакнување на соработката и навремено информирање на туристичкиот сектор за даночните обврски.

Средбата беше посветена на запознавање на туристичките работници со нивните права и обврски, со посебен акцент на пријавувањето на доходот од издавање недвижен имот, ангажирањето сезонски и повремени работници, како и пријавувањето на доходот од дејности од времен карактер.

Во текот на средбата беше презентирана кампањата „Фер туризам започнува со пријавен доход“, преку која се укажува дека сите граѓани кои остваруваат доход од издавање сместувачки капацитети имаат обврска истиот навремено да го пријават и да го платат утврдениот данок на личен доход.

Беше појаснето дека обврската се однесува на сите кои издаваат апартмани, станови, куќи, вили, соби и други сместувачки капацитети, независно од тоа дали имотот се издава на подолг период или само неколку дена во месецот. Обврската постои и кога плаќањето се врши од домашен или странски гостин, во готовина или преку трансакциска сметка, преку Airbnb, Booking.com, Facebook, Kayak, Tripadvisor и други платформи.

На присутните им беше објаснет и начинот на пријавување на доходот остварен од закуп и подзакуп преку системот на е-Даночни услуги, како и начинот на пресметување на данокот на личен доход. Притоа беше посочено дека данокот се пресметува на бруто остварениот доход, намален за признатите трошоци, зависно од тоа дали просторот се издава неопремен или опремен со мебел.

Посебен дел од средбата беше посветен на ангажирањето лица во туристичката сезона, како што се: готвачи/ки, бармени/ки, собари/ки, рецепционери/ки, лица за чистење, одржување и други работни задачи.

На работодавачите им беше укажано дека доколку ангажираат физички лица за сезонска или повремена работа, до најмногу 180 дена во текот на една календарска година, работниот ангажман треба да биде формализиран и пријавен согласно Законот за работно ангажирање на лица. Со цел плаќање на данокот на личен доход и придонесите од задолжително социјално осигурување, работодавачите треба да обезбедат е-ПДД пресметка за данокот и МПИН пресметка за придонесите од Управата за јавни приходи преку нивните профили на системот е-даночни услуги.

На средбата беа опфатени и дејностите од времен карактер, кои се особено присутни во летната туристичка сезона. Станува збор, меѓу другото, за изнајмување кајчиња, педалинки, СУП даски, кануа, кајаци и друга опрема за рекреација на вода, но и за продажба на ракотворби, сувенири, накит и уметнички предмети.

Присутните беа информирани дека физичките лица кои вршат дејност од времен карактер имаат обврска да го пријават остварениот доход и да го платат данокот на личен доход. За таа цел, пред започнување со дејноста се поднесува Барање за паушално плаќање на данокот на личен доход – Образец ДЛД-П, до надлежната организациона единица на Управата за јавни приходи.

Средбата беше и можност туристичките работници директно да постават прашања и да добијат појаснувања за конкретни ситуации со кои се соочуваат во секојдневното работење. Преку отворен разговор беа разменети мислења и искуства, со цел обврските да бидат што појасни и полесни за исполнување.

Од Управата за јавни приходи беше нагласено дека целта на ваквите активности е, пред сè, навремено информирање и поддршка на граѓаните за правилно исполнување на нивните законски обврски и даночно усогласено работење.

Пријавувањето на приходите и плаќањето на данокот создаваат еднакви услови за сите туристички работници и придонесуваат кон намалување на сивата економија и нелојалната конкуренција.

Редовното исполнување на даночните обврски е важно и за самата туристичка дестинација, бидејќи преку платените даноци се обезбедуваат средства за подобри јавни услуги, инфраструктура и развој на локалната заедница.

Заедничката активност на Управата за јавни приходи и Општина Охрид претставува придонес кон создавање поуреден, одговорен и конкурентен туристички сектор, во кој правилното исполнување на законските обврски е предуслов за фер услови за работа и одржлив развој на туризмот.

Пораката од средбата е јасна: фер и успешен туризам се гради со информирани туристички работници, почитување на законските обврски и еднакви правила за сите.

Фер туризам започнува со пријавен доход.

УЈП

Тагови: УЈП

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер