Концерт на Симон Трпчески со македонски уметници во арената „Борис Трајковски“ - Канал 5

Култура

Концерт на Симон Трпчески со македонски уметници во арената „Борис Трајковски“

Најпознатиот македонски пијанист Симон Трпчески ќе одржи предновогодишен концерт на 20 декември во арената „Борис Трајковски“ заедно со македонски уметници. 

Концерт на Симон Трпчески со македонски уметници во арената „Борис Трајковски“

Концертот го организира „Прагма продукција“ и ќе има два дела – во првиот е свита од балетот „Оревокршачка“ на Чајковски со четирирачна изведба на пијано, за која на Трпчески ќе му се придружи пијанистот Шкељзен Бафтијари, негов поранешен студент, активен во образовната дејност. Ќе настапи дел од балетскиот ансамбл на НОБ и балетските првенци Марија Кичевска и Бобан Ковачевски.

Во вториот дел од програмата, која денеска на прес-конференција ја соопшти Трпчески, ќе биде класичен репертоар и изведба на дела од Моцарт, Лехар, Верди, Штраус..., изведени од, како што рече, „цела палета музичари“, меѓу кои ќе бидат и членови на ансамблот на неговиот проект „Македонисимо“. Ќе бидат изведени и избор од класици во поп музиката, како легендите Дин Мартин, Френк Синатра, Нет Кинг Кол..., до помладите Мараја Кери и Мајкл Бубле.

Нивните нумери, рече Трпчески, ќе бидат слушнати во „поинакво руво“, обработени специјално за овој концерт од композиторот Панде Шахов. Ќе настапат и двајца оперски солисти – сопранот Гонца Богоромова-Краповски и баритонот Иван Наумовски кои, рече, ќе дадат поинаква димензија на овие класици.

- Мило ми е што со овој концерт на поврзување на класиката и на поп композиции, ќе ја добилижиме уште повеќе публиката, а пред се децата... Ова го гледам како еден вид предизвик зашто е прв новогодишен концерт целно направен во Македонија. Имав одамна желба да направам нешто вакво. Она што мене ми импонира е дека на овој концерт македонските музичари ќе имаат можност да се претстават на врвно уметничко ниво, истакна Трпчески на прес-конференцијата.

Ја поздрави иницијативата на организаторот и рече дека одамна имал желба за ваков концерт на кој, рече, ќе направат нешто убаво за публиката.

Кристијан Стефановски од „Прагма продукција“ соопшти дека одамна имале план и желба за ваков концерт со Трпчески, но поради неговата презафатеност и динамична концертна агенда, не можеле да договорат термин. Како што рече, Трпчески бргу ја прифатил нивната иницијатива и дека концерт со маестрото со светско реноме ќе биде врв во 15-годишната работа на нивната продукција.

Трпчески настапува во концертни сали и ретко во простор како што е арената „Борис Трајковски“. Последен пат, рече, настапил во арената во Вилнус по успехот на македонската кошаркарска репрезентација.

- Од тој аспект, мислам дека „Прагма продукција“ е прилично искусна и техничкиот аспект ќе биде дополнителна мотивација сето тоа да изгледа како што доликува на нивото - и на нивното, и на моето работење. Не е лесно, меѓутоа ние ќе се потрудиме сето тоа да изгледа како што треба и целата аудиовизуелна перцепција на публиката да биде позитивна, рече Трпчески.

Претставникот на продукцијата рече дека организирањето концерт со ваков концепт и формат во спортска сала е предизвик, но дека имаат опрема и инженери специјалисти за озвучување и за приспособување на салата за ваков вид настани.

-Звукот ќе биде совршен и нема да имате замерки. Во тоа сум сигурен зашто веќе имаме претходно искуство, додаде Стефановски.

Концертот на 20 декември ќе биде организиран во преполната концертна агенда на Трпчески – вчера тој настапи во Солун, денеска веќе патува за концерт во Ливерпул оваа недела, во која ќе има и концерт во Загреб. Овој период има концерти и во Белград и Будимпешта, а му претстојат турнеи во Германија и Швајцарија. Во четвртокот, Трпчески беше солист и на концертот на Филхармонијата за 80 години од нејзиното постоење.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Тенис

Ѓоковиќ се враќа во Синсинати!

Најтрофејниот светски тенисер Новак Ѓоковиќ ќе настапи  на Мастерсот 1000 во Синсинати по тригодишна пауза.

Ѓоковиќ се враќа во Синсинати!

Последниот пат кога популарниот Ноле беше во Охајо, тој ја освои титулата во онаа славна финална пресметка против Карлос Алкараз.

„Со нетрпение очекувам да играм на овој турнир. Последен пат играв овде во 2023 година и инфраструктурата е значително подобрена. Одлична работа“, изјави Ѓоковиќ.

Негов прв противник ќе биде Аргентинецот Тиаго Агустин Тиранте, 50-тиот играч во светот.

Пред два дена, Тиранте го елиминираше домашниот претставник Јан Чоински, по тај-брејк во одлучувачкиот сет. Ова ќе биде нивната прва меѓусебна средба, и тоа на турнирот каде што сè започна за Новак.

Токму во Синсинати тој го одигра својот прв меч на ова ниво, а оттогаш има освоено рекордни 40 титули на турнирите од серијата 1.000. Уште во 2005 година, тој загуби од Фернандо Гонзалез во првото коло, а 21 година подоцна влегува во главната жрепка како трикратен шампион.

Новак триумфираше во 2018, 2020 и во споменатата 2023 година, кога спаси меч-топка против Алкараз, а потоа славеше по три часа и 49 минути игра – што и натаму претставува најдолго финале во историјата на АТП-турнејата кога станува збор за мечеви што се играат на два добиени сета.

„Имав голема поддршка овде, од Чикаго и од Охајо. Српската заедница е навистина голема. Тоа е она што го паметам од финалињата во 2023 и 2018 година. На стадионот имаше многу српски знамиња. Беше навистина убаво“, изјави Новак.

Тагови: Новак Ѓоковиќ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Европскиот првак ПСЖ го доведе и светскиот шампион!

Шпанскиот фудбалер Феран Торес е новото засилување на  актуелниот европски и француски шампион, Пари Сен Жермен.

Европскиот првак ПСЖ го доведе и светскиот шампион!

Торес, кој неодамна го реши финалето на Светското првенство, потпиша договор со европскиот шампион до 2031 година и ќе го носи дресот со број 9.

ПСЖ ѝ плати на Барселона фиксна сума од 50.000.000 евра, што претставува четврта најголема продажба во историјата на каталонскиот клуб.

„Многу сум среќен што започнувам нова авантура во клуб со толку големи амбиции како Пари Сен Жермен. Сакам да им се заблагодарам на претседателот Насер Ал-Хелаифи, на Луис Кампос и на тренерот Луис Енрике за можноста да му се придружам на тимот, на кој се надевам дека ќе му помогнам да освои што е можно повеќе трофеи“, изјави Торес.

Торес е член на Барса од 2022 година, кога пристигна од Манчестер Сити за 55 милиони. Тој помина две сезони меѓу „Граѓаните“, додека кариерата ја започна во Валенсија.

Пред Торес, во Париз пристигнаа Магнес Аклиуш и Лука Дињ, а се очекува и доаѓањето на Мика Готс од Ајакс.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Мицкоски: Повеќе од 1.200 проекти во моментов се реализираат низ целата држава

Повеќе од 1.200 проекти во моментов се реализираат низ целата држава - ќе продолжиме да инвестираме во проекти од областа на образованието.

Мицкоски: Повеќе од 1.200 проекти во моментов се реализираат низ целата држава

-Јас би сакал исто така да се придружам на честитките на претходните говорнички — на градоначалничката и на министерката. Добро е кога се гради, добро е кога се исполнуваат потребите на најмалите, на децата, бидејќи ваквите објекти им се потребни за да го градат својот дух. Како што велевме: „Во здраво тело, здрав дух“, па така, кога спортувате, кога другарувате и кога се натпреварувате истовремено, тогаш го градите и својот дух во правилна насока, а тука е, нормално, и сето она коешто доаѓа со спортот.

Ние ќе продолжиме како Влада да поддржуваме вакви проекти и во периодот којшто следи. Нашата задача е да работиме и тоа коешто сме го ветиле да го испорачаме. Од ден на ден, дел од проектите коишто ги започнавме се завршуваат, помал дел се во фаза на реализација, а помал дел се отпочнуваат сега, така што јас би сакал уште еднаш да напоменам дека повеќе од 1.200 проекти веќе се реализираат на целата територија на државата. Мислам дека Македонија во моментот е претворена во едно големо градилиште, а тоа беше и целта на оваа Влада кога беше избрана, па во таа насока ќе продолжиме и понатаму.

За следната година, преку ЗЕЛС, ги охрабруваме градоначалниците да подготвуваат проекти во зависност од можностите. Исто така, како Влада, планираме дел од средствата да ги децентрализираме од централниот буџет кон општините за да може уште повеќе проекти да се реализираат. Така што, еве, тоа коешто беше приоритет продолжуваме и понатаму да го реализираме.

Уште еднаш честитки до градоначалничката за посветената работа, за сите оние во Советот коишто ја поддржуваат нејзината работа, а се разбира и до администрацијата, без којашто сите овие проекти е невозможно да се реализираат. Би сакал да ѝ се заблагодарам и на министерката за образование, како и на колегите од Владата коишто исто така го носат овој проект за финансирање проекти од Владата кон општините.

Нека е со среќа и голем број спортисти, успешни репрезентативци и репрезентативки да излезат од оваа сала, коишто со гордост, достоинство и успешни резултати ќе ги бранат боите на Македонија.“- истакна премиерот Христијан Мицкоски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер