Пред многубројната публика, Имери се претстави со изведба на романтичните и импресивни дела: „Ноктурно“ од Мануел Де Фаља, „Песни и танци“ бр. 1 и бр. 3 и „Млади девојки во градината“ од суитата „Сцени од детството“ од Фредерик Момпу, „Благородни и сентиментални валцери“ и „Alborada del gracioso“ од Морис Равел и „Кармен“ варијации од Ж. Бизе/В. Хоровиц.
Она што посебно интригираше во врска со овој настан, е што македонскиот пијанист свиреше на историскиот инструмент „Плејел“ од 1911 година, кој бил во сопственост на Светислав Станчич - таткото на хрватската пијанистичка педагогија и славен пијанист, кому специјално му го испорачале од Париз. Во внатрешноста на инструментот, има и автограм на Имери, што на целиот настан му даде посебна убавина.
-Ова е мое четврто рецитално гостување во Загреб - град во кој често се слушаат изведбите на светските имиња на пијанизмот, но и центар на една многу сериозна пијанистичка школа. Сум настапувал во различни стадиуми од мојата кариера, од студентските денови па се до оваа зрела фаза и за сите тие посети можам да кажам дека секогаш чувствувам неверојатна топлина, љубов и вистинска предаденост од страна на верната публика која одново се враќа на моите концерти, вели Дино Имери, по синоќешното концертирање кое имаше извонреден одзив.
Посочи дека тоа е огромен комплимент за него особено затоа што станува збор за луѓе кои се постојано изложени на концерти од светски калибар - нешто кон кое се стремел уште во почетокот на неговата меѓународна кариера.
-Не беше различно и овој пат, се случи прекрасна музичка вечер и со нетрпение го чекам моето враќање во овој град“, додава Имери.
Инаку, пијаното на кое свиреше Имери, како што сведочат и наследниците на Станчич, има топлина, љубов и убавина – карактеристики кои ретко кој инструмент го поседува сам по себе. Правејќи паралела со познатата марка „Стенвеј“, велат дека по силниот и продорен звук на „Стенвеј“ на кој сме навикнати, кога ќе се слушне звукот на „Плејел“, на кој инаку, свирел и славниот Шопен, се чувствува дека тој „самиот од себе пее“. Неговите тонови се топли, нежни, а сепак, не им недостига силата на звукот за да го исполнат амбиентот.
Концертот на Дино Имери беше дел од Циклусот „Pleyel Svetislava Stančiča“, а организатор на настанот е уметничката организација „Кристофориум“, во соработка со Културно-информативниот центар на РМ во Загреб. Уметничката организација „Кристофориум“, е основана во чест на италијанскиот градител на инструменти - Бартоломео Кристофориј.
Македонскиот пијанист Дино Имери до крајот на годината го очекуваат уште два значајни настани. На 24 ноември настапува во Ленгерих, Германија, во рамките на „Виртуозо фестивал“, додека на 4 декември, пак, во Скопје, во Камерната сала на Филхармонија на РМ, ќе настапи заедно со македонската истакната диригентка Дијана Имери - Илкоска, а ќе го реализираат долгоочекуваниот проект „Музика и поезија - вечер со музиката на Шопен“. /МИА