Култура

Композиторот Николов победи на конкурсот за најдобро оркестарско дело

Композиција „Горе и долу – три слики од Книга на промени“ од композиторот Владимир Николов победи на конкурсот за избор на оркестарско дело објавен од Сојузот на композиторите на Македонија (СОКОМ). Ова е едногласна одлука на жири комисијата во состав Живоин Глишиќ – композитор, Мирослав Спасов – композитор, Марко Коловски – музиколог и Владимир Костов – музички уметник.

На анонимниот конкурс пристигнаа вкупно шест нови композиции за оркестар. Победничката ќе добие парична награда од 100.000 денари, а предвидена е и изведба на композицијата со Македонската филхармонија.

- Задоволни сме од одѕивот на објавениот конкурс. Куриозитет е што добитникот на наградата не е член на СОКОМ со што пак потврдуваме дека во музичкото творештво и уметноста квалитетот е пресуден. Чинам дека со овој конкурс се навестува богата продукција на македонските автори со новиот конкурс за стимулација на македонското творештво кој наскоро ќе биде објавен од Министерството за култура, со кој ќе се поддржат 50 нови композиции, изјави претседателот на СОКОМ Сони Петровски.

Според директорката на Македонската филхармонија Маја Чанаќевиќ која, како што рече, ја поздравува иницијативата за стимулација на македонското музичко творештво, композицијата „Горе и долу – три слики од Книга на промени“ ќе биде ставена на програмата следната сезона.

- Добро е што правата за изведба ќе бидат отстапени на институцијата и што оркестарот и публиката ќе имаат можност да ја слушнат оваа композиција како дел од нашиот репертоар. Верувам дека со ова ќе се придонесе за уште поактивно творење од страна на македонските композитори, истакна Чанаќевиќ.

Владимир Николов е композитор чие творештво опфаќа широк спектар на изразни средства и жанри, користејќи ги искуствата во класичната музика и џезот како точка на поаѓање. Подолго време е „зад сцената“ во улога на аранжер во светски оркестарски проекти, но често настапува и како диригент и гитарист со реномирани солисти и ансамбли. Роден во Скопје, 1979 година, студиите по класична гитара на ФМУ во Скопје ги завршува во 2001 година, дипломирајќи со оригинална композиција. Во меѓувреме почнува со композиција и аранжирање под менторство на Илија Пејовски, како и студии по џез композиција и аранжирање на Амстердамскиот конзерваториум во Холандија, дипломирајќи со целовечерен авторски Биг Бенд концерт (2004). Магистерските студии ги завршува во 2005 година, со фокус на пишување за симфониски оркестар.

Николов е добитник на повеќе интернационални награди, меѓу кои две први награди за оригинални композиции и пет за аранжмани.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Народната банка воведе тримесечна привремена администрација во Алта банка

НБРМ подготвува посебно решение за проблемот со пензионерите што примаат пензии преку Алта банка, а немаат платежните картички за да можат да подигаат пари од банкоматите.

Станува збор за околу 3.500 граѓани, за кои гуверенот Славески во телевизиско гостување, рече дека се размислува да се отворат вратите на банката и тие со едно одење на шлатер да може да подигнат до 20.000 денари во рок од две недели.

Славески тврди дека по изборите во Србија немало милионски трансфери ниту податоци што укажуваат на перење пари. Според него, по 26 октомври одливите кон Србија изнесувале околу 180.000 евра, а приливите околу 16.000 евра, во најголем дел редовни плаќања на клиенти, меѓу кои и за увоз на стоки.

Гувернерот тврди дека не знаел кој е крајниот газда на банката и немало потреба да знае, бидејќи НБРМ дала согласноста за влез во македонскиот банкарски систем на српската банка како институција. На ова денеска реагираа од опзоициската СДСМ...

-Ова е заштита на капиталот на криминалците, на сметка на штедачите чии депозити и сметки се заробени. Наместо да им се дозволи непречено да располагаат со парите, се штитат парите на мафијата,- -Александар Саша Димитријевиќ – генерален секретар на СДСМ.

Од ВМРО-ДПМНЕ, пак, возвратија дека СДСМ создава паника за да отвори можност банката да ја преземе бизнисмен близок до опозицијата.

-Целта на Филипче и СДСМ е да создадат паника и хаос во банкарскиот свет, за утре близок бизнисмен до Филипче и Заев да ги откупи акциите за багателна цена,- Бране Петрушевски – заменик-генерален секретар на ВМРО-ДПМНЕ.

Заинтересирани има, а купувач за мнозининскиот пакет акции на Алта банка, Славески очекува да се најде во следните 3 месеци, колку што ќе трае и тримесечна привремена администрација.

Според одлуката објавена во Службен весник, за администратори се именувани Илија Андовски, Весна Стојчевска и Марија Тодоровска, вработени во Народната банка, кои имаат рок од 3 недели да ја утврдат состојбата во банката.

Во меѓувреме, Трговскиот суд во Белград донесе решение за отворање стечајна постапка во матичната АЛТА банка. Државата ќе обештети депозитите до 50.000 евра во рок од три години, а останатите ќе чекаат разврска на стечајната постапка.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Контроверзни ставови на Петар Богојески за „машки надзор“ во бракот и семејното насилство

На сопругот му е задача и обврска да врши „машки надзор“ во бракот...

Овој контроверзен став на претседателот на Македонски концепт Петар Богојески покрена бура од реакции во јавноста, а остри осуди пристигнаа и од политичките партии, новинари, невладини оргазации. Неговите тези за тоа како треба да функционираат односите меѓу мажите и жените ги објаснуваше синоќа во телевизиско гостување во кое дебатираше со адвокатката Катерина Котеска на тема за македонските семејства, насилствата и разводите...

-Феминизмот е тој кој жените ги направи да се однесуваат на неадекватен начин и да отфрлат било каков машки надзор. –Кој да ми врши надзор? Сопругот. – Зошто да ми врши надзор? – Зашто тоа му е задача. / Дали е насилство изневерувањето од сопругата? Или е насилство реакцијата на сопругот на фактичката состојба? Тоа неговото не е насилство. Петар Богојески – претседател на „Македонски концепт“ (гостување во Алфа ТВ).

Денеска Богојески се дообјаснува на фејсбук. Се закани за тужби кон новинари бидејќи се ваделе заклучоци само врз база на кратки исечоци од емисијата, но останува на ставот дека феминизмот е лош за жените.

Новинарот Бранко Героски во изјава за Канал 5 вели дека нема простор за релативизирање и најмалку што може да стори по скандалозните тези е да се извини на јавноста.

Понижувачки, ретроградни и опасни се зборовите на Богојески, оценува портпаролката на Владата од ВМРО-ДПМНЕ Марија Митева која на социјалните мрежи напиша дека е згрозена од искажаните ставови. Да се зборува за жената како за личност на која ѝ е потребен надзор е недозволиво. Најстрашно, во неговите изјави се релативизира насилството во партнерските односи и тоа е опасно и заслужува најостра јавна осуда.

Како претседателка на Унијата на жени на ВМРО-ДПМНЕ, но пред сè како жена, најостро ги осудувам ваквите ставови. – стои во реакцијата на Митева. Осуда има и од ЛДП, од Националната мрежа за борба против насилство, од женската медиумска мрежа „Еднаква“. Бараат реакција и од обвинителството, комисијата за заштита од дискриминација, како и од Воената академија кадешто Богојески работи како професор.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Поранешниот директор на „Лотарија“ Перпарим Бајрами излегува од притвор со гаранција од над 1 милион евра

Поранешниот директор на „Државна лотарија“, Перпарим Бајрами кој е првообвинет за злоупотреби со ВЛТ терминалите излегува од притвор, соопшти кривичниот суд.

Кривичниот совет на предлог на одбраната го прифатил предлогот и донел решение со кое на Бајрами му се укинува притворот и му се прифаќа гаранцијата во износ од 1.140.781 евра во недвижен имот.

За неколку дена поминува и законскиот рок до кога Бајрами може да биде во притвор. Судот му одредил мерки за претпазливост, одземање на патната исправа и забрана за издавање нова исправа за преминување на државната граница, како и обврска за редовно јавување во судот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.