Во него се наведува дека во најголемиот дел од пријавите или речиси 80 проценти како дискриминатори се посочени државните институции, органите на управата и општините. Сепак, според податоците, во 2024 година имало 405 претставки до комисијата, што е за 20 проценти помалку од претходната година.

-Во однос на областите, работата и работните односи е најчеста област во којашто се пријавува дискриминација и имаме исклучително зголемен број на претставки кои се однесуваат на членувањето во синдикатот и синдикалното организирање. За разлика од 2023 кога медиумите и јавното информирање ни беа најголема област, сега се наоѓаат на трето место.Имаме зголемување на поднесените претставки врз основа на национална и етничка припадност, значи дискриминација врз оваа основа. Сеуште високо котираат другото уверување или друга основа и личен и општествен статус. Во рамките на постапувањата гледаме дека позади ваквата дискриминација стои политичкото уверување,- - Игор Јадровски.

На настанот на кој беше презентиран годишниот извештај, обраќање имаше и Претседателката Гордана Сиљановска Давкова, која податоците ги оцени како загрижувачки, особено бидејќи како што кажа, има висок степен на дискриминација и кај работните односи, но и во образованието. Јавниот сектор како што кажа таа, се однесува како приватен, а ситуацијата треба да се обратна.

-Најголем број на дискриминација произлегува од извештајот дека има во сферата на работните односи и во јавниот сектор. Да, така изгледа, но јас мислам дека во приватниот сектор е скриен, невидлив и сигурно уште поголем. Тоа е за мене загрижувачко. И второ дека во образованието исто така високо значи постои,- Гордана Сиљановска Давкова.

Во извештајот се наведува и дека бројот на мажи и жени кои поднесуваат претставки до комисијата е речиси идентичен, а бројката на луѓе кои лично се обраќаат до комисијата се зголемува.

Комисијата инаку според извештајот, минатата година донела 316 одлуки по претставките, од кои повеќе од половината или 52 проценти биле отфрлени, најмногу поради неуредност на поднесоците.