Кои пет знаци откриваат дали вашето дете ќе биде успешно - Канал 5

Кои пет знаци откриваат дали вашето дете ќе биде успешно

Истражување на една американска советничка за образование.

Кои пет знаци откриваат дали вашето дете ќе биде успешно

За својата книга „Одгледување деловен човек“, авторката и советник за образование Маргот Махол Бисноу разговарала со 70 родители чии деца се многу успешни. Тие идентификувале пет клучни карактеристики кои придонеле за идните достигнувања на нивните деца.

Ако вашето дете ги има овие пет особини, тоа е предодредено за успех.

Упорност

Упорните деца не се откажуваат додека не најдат решение или не научат нешто. Тие се храбри и туѓите реакции не ги обесхрабруваат. Џонатан Неман покренал бројни работи додека бил во средно училиште и на факултет, но ниту една од нив не била успешна. По дипломирањето, тој и двајца пријатели го основале „Свитгрин“ (SweetGreen), еколошки синџир со над 900 продажни места.

„Не успеваме, но се обидуваме повторно и повторно. Не сум попаметен од кој било друг, само сум поупорен“ – изјавил тој.

Љубопитност

Да се ​​биде љубопитен значи да се поставуваат многу прашања, на пример: зошто е ова вака, дали мора да биде вака или дали може да биде подобро...

Тања Јуки ја основала „Shareablee“, компанија за анализа на социјалните медиуми. Таа се присетила дека како дете сакала да допира сè кога ќе се нашла во продавница за луксизни подароци, и покрај знакот „забрането допирање“. Кога продавачот ќе ѝ зел нешто од раката, таа била сигурна дека е во неволја, а татко ѝ ќе речел: „Таа е само љубопитна. Ако скрши нешто, јас ќе платам за тоа“.

Истражувачката и љубопитната природа е вообичаена особина за луѓето што го креираат сопствениот пат во животот и стануваат успешни во она што го работат.

Страста

Наместо да се трудат да ни угодат, децата би требало да откријат која е нивната страст.

Роберт Стивенс е совршен пример за некој кој страста од детството ја претворил во претприемачки успех. Момчето кое сакало да ги поправа работите, на 24 години ја основало компанијата за поправка „Geek Squad“. Подоцна ја продал за 3 милиони долари.

Неговите родители постојано ја поддржувале неговата страст и му верувале доволно за тој самиот да одлучува за своите работи, така тој научил да верува во сопствените способности.

Преземање иницијатива

На успешните луѓе не им е потребна надворешна мотивација. Кога Пејџ Микоски била во своите 20-ти години, на секој нејзин роденден добивала по 100 долари од нејзините баби и дедовци. Таа решила да ги искористи тие пари и да го оствари својот животен сон, да основа фирма за облека. Купила машина за шиење, ја напуштила работата, се вратила дома и почнала да дизајнира. Таа го основаше култниот моден бренд „Aviator Nation“. Во 2021 година нејзината компанија остварила промет од 110 милиони долари.

Подготвеност за преземање ризици

Дани Џонс е поранешен американски рагбист во Националната фудбалска лига, кој ја водеше емисијата „Дани ја напаѓа Земјината топка“ („Dhani Tackles the Globe“). Тој ја основал приватната инвестициона компанија „Qey Capital“. Додека растел, не бил суперѕвезда, но не се плашел да ризикува.

„Многумина не се подготвени да стават сè на коцка за да го постигнат она во што веруваат. Родителите би требало да им влеаат доверба на своите деца, за подоцна тие бестрашно да му пристапат на животот“, вели мајката на Дани.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Србија има нов милионер, падна седумка вредна 3,4 милиони евра

Во вечерашното извлекување на играта Лото,  во Србија беше извлечена добивка во вредност од 3,4 милиони евра. 

Србија има нов милионер, падна седумка вредна 3,4 милиони евра

Среќниот добитник го уплатил тикетот во Ниш.

Добитната комбинација е 3, 5, 8, 10, 11, 21 и 26, а еден играч ги погодил сите седум броеви и ја освои мултимилионската сума.

Покрај главниот добитник, уште 19 играчи погодиле шест броеви, а секој од нив добива по 124.188 динари(околу 1000 евра). Главната награда во играта „Лото плус“, која изнесуваше околу 3,77 милиони евра, не била извлечена.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Театар и музика во една вечер: МОТ со две претстави и концерт

Во рамки на 51. издание на Млад отворен театар (МОТ), денеска, 21 ноември, публиката ја очекува уште една фестивалска вечер исполнета со современи театарски и музички содржини. 

Театар и музика во една вечер: МОТ со две претстави и концерт

На програмата се две претстави од регионалната театарска сцена, како и концертот на косовско – швајцарската изведувачка на традиционални песни ARBËRESHË, за кој влезот е бесплатен.

Фестивалската вечер започнува во 20 часот, во салата „Фросина“ при МКЦ, со претставата „Закопани чуда“ на уметничката организација “Глумац има времена, глумица има времена” - ТАХТ од Хрватска, во режија на Нина Виолиќ.

Создадена според делото на Моника Херцег, оваа мултимедијална претстава е интимна сценска приказна за љубовта, сеќавањето и илузијата. Преку три симболични простори – Рајската градина, Мостот и Станот – публиката навлегува во еден живот исполнет со спомени, желби, нежност, страв и страст. Во претставата настапуваат Леон Лучев и Јелена Граовац Лучев. Претставата трае 90 минути и се изведува на хрватски јазик, со македонски наднаслови.

Во 22 часот, во Клуб МКЦ, следува „Смртен исход од атлетските повреди“ на Моје позориште од Босна и Херцеговина, во режија на Тара Маниќ, според истоимениот роман на Милица Вучковиќ.

Претставата претставува своевидна аутопсија на една љубовна врска, раскажана од перспектива на главната протагонистка Ева, која верува во љубовта од бајките, но се впушта во врска што постепено се претвора во простор на несигурност, изолација, гаслајтинг и насилство. Преку оваа интимна и вознемирувачка приказна, претставата ги отвора прашањата за манипулацијата, родовата надмоќ и границите на човечката издржливост. Во улогите се Џана Пињо, Ален Муратовиќ, Дариан Мехмедбашиќ и Мак Мисира. Претставата трае 100 минути, се изведува на босански јазик, со македонски превод.

Вечерта ќе биде заокружена со концертот на ARBËRESHË, со почеток во 22 часот во фоајето на сала Фросина. Родена во Швајцарија, со косовско-албански корени, а денес базирана во Приштина, ARBËRESHË создава автентичен музички израз во кој традиционалните песни од Косово, Албанија и Македонија добиваат нова звучна димензија. Преку спојот на гласот, гитарата, тапаните и древните инструменти, таа гради хипнотичко музичко патување кое ги поврзува балканското музичко наследство и современиот звук. Влезот е бесплатен.

Фестивалската програма продолжува и утре, 22 ноември, со претставата „Свињи“ на Театар „Златен Елец“ од Битола, со почеток во 20 часот, во салата „Фросина“ при МКЦ.

Во режија на Тамара Стојаноска, според текст на Томислав Зајец, „Свињи“ е претстава во која апсурдот, црниот хумор и гротеската создаваат сурова, поетична и вознемирувачка сценска алегорија. Преку приказната за две сестри, претставата ги истражува механизмите на моќта, насилството, осаменоста и траумите од детството, отворајќи прашања за тоа како средината и наследените модели на однесување го обликуваат човекот.

Во улогите настапуваат Илина Чоревска и Викторија Степановска Јанкуловска.

Билетите за театарските претстави се достапни онлајн на bileti.mkc.mk и на билетарницата на МКЦ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Уапсен е еден од најбараните бегалци на листата на ФБИ, падна еден од најмоќните нарко-босови

Мексиканската војска го уапси Фаусто Исидро Меза Флорес, познат како „Ел Чапо Исидро“ – еден од десетте најбарани бегалци на ФБИ – јавуваат мексиканските медиуми, повикувајќи се на безбедносни извори.

Уапсен е еден од најбараните бегалци на листата на ФБИ, падна еден од најмоќните нарко-босови

Операцијата во градот Гвасаве, во сојузната држава Синалоа, предизвикала вооружени судири, пукањето го прекинало дури и натпреварот во безбол, принудувајќи ги гледачите во паника да побегнат од стадионот.

Мексиканските медиуми известија за апсењето, а шпанскиот весник „Ел Паис“, повикувајќи се на извори блиски до мексиканскиот безбедносен апарат, потврди дека Меза Флорес е приведен.

Сепак, Си-Ен-Ен (CNN) наведе дека сè уште чека независна потврда од мексиканските власти.

За време на операција во Гвасаве, дојде до вооружени судири помеѓу мексиканските безбедносни сили и вооружени групи. Снимки, чија автентичност ја потврди Си-Ен-Ен (CNN), прикажуваат воени хеликоптери како летаат над градот и пукаат кон земјата.

Особено драматични сцени се одвиваа на стадионот „Курода Парк“, каде што се играше натпревар во безбол помеѓу екипите „Венадос де Мазатлан“ и „Алгодонерос де Гвасаве“. Откако се слушнаа истрели, гледачите почнаа да бегаат од трибините, прескокнувајќи огради и барајќи засолниште.

Играчите го напуштија теренот, а преносот на натпреварот беше прекинат. Коментаторите ги известија гледачите дека во близина се случува безбедносен инцидент.

Според сведоштво на локален жител, пренесено од Си-Ен-Ен, вооружени лица зазеле приватни болници, а биле запалени и разни објекти, вклучувајќи продавници и бензински пумпи. Некои граѓани останаа заробени во зградите во кои побарале засолниште.

Во февруари 2025 година, Фаусто Исидро Меза Флорес се појави на листата на ФБИ со десетте најбарани бегалци. Американските власти понудија награда во износ до пет милиони долари за информации што би довеле до негово апсење или осуда.

Според официјалното известување на ФБИ, Меза Флорес е осомничен дека раководи со тешко вооружена криминална организација со седиште во Синалоа, позната како групата „Меза-Флорес“ или „Лос Мазатлекос“.

Неговата група е обвинета за производство, дистрибуција и шверц на големи количества хероин, метамфетамин, кокаин, фентанил и марихуана во Соединетите Држави. Тој првпат беше обвинет во 2012 година, додека новото обвинение од 2019 година вклучува дополнителни кривични обвиненија поврзани со трговија со дрога и поседување огнено оружје.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер