Клековски: На Инфективна клиника фалат 100 нови вработувања - Канал 5

Здравје

Клековски: На Инфективна клиника фалат 100 нови вработувања

На Инфективната клиника во Скопје недостасуваат дури 100 нови вработувања, беше кажано на денешниот брифинг на директорите на Фондот за здравствено осигурување со медиумите.

Клековски: На Инфективна клиника фалат 100 нови вработувања

- Тој одлив се случи со Ковид-19 и потоа. Делумно поради пензионирање, делумно поради заминување и состојбата со инфектолози е критична низ територијата на целата држава. Има многу мал интерес за специјализација по инфективни болести. Во повеќе болници сме останати на пензионерите со продолжување до 67 години и така натаму. Мораме и со програмата за специјализација, меѓутоа и со мотивацијата на персоналот, да обезбедиме „ладен погон“, ако може да кажам, минимум капацитети што мораме да ги имаме. Комуницираме со Министерството за здравство, со директорот на Инфективна, со Министерството за финансии. И дел од проблемот таму и сега да се одобрат 100 работни места, нема да има кој да биде вработен, изјави директорот Сашо Клековски.

Тој, одговарајќи на новинарски прашања, кажа дека имаат прецизна евиденција колку лекови се трошат на Позитивната листа во аптеките преку системот на рецепти.

- За жал, имаме никаква следливост на потрошувачката на обичните лекови, ако можам да кажам, во болниците. Скапата биолошка терапија е на условен буџет и таа е со зголемен надзор и следење ако можам да кажам. Дел се структурни проблеми, наследливост, бидејќи различни институции користат различни начини на одбележување на лековите. Има една работна група од сите институции да договориме да го поедноставиме начинот на следење и регистрација, за да дојдеме до точни податоци - колку лекови се употребуваат во болниците, информираше Клековски.

На новинарско прашање рече дека нема да поскапи партиципацијата туку цената на основен специјалистички преглед која е 380 денари повеќе од 10 години. - Знаете колку чини специјалистички преглед во приватни здравствени установи? Разгледуваме неколку опции, цената нема да порасне како во приватните болници, меѓутоа зборуваме за соодветно валоризирање на трудот на специјалистите. Зголемувањето на партиципацијата може да биде за 10 - 15 денари, а не некакво радикално зголемување, одговори Клековски.

Во однос на зголемување на капитацијата за матичните лекари, тој рече дека се во разговори со Здружението на приватни лекари и со стоматолозите и со матичните гинеколози, кои се сите во сегментот на примарна заштита. Разговарале за дестимулативните мерки, за казнената политика, за капитацијата и за превентивните методи, „во сите тие делови има измена, ние начелно имаме договорено цел каде сакаме да стигнеме, тоа ќе биде повеќе од пристојно зголемување“.

Прашан кога договорците на дело ќе бидат ангажирани во здравството, тој рече дека подолг период се дискутирал моделот на вработување.

- Еднаш е направена трансформација на договорите на дело во вработувања. Сега конечната одлука е дека нема да има трансформација на договорите на дело со закон. Туку, сите јавни здравствени установи имаат обврска да поднесат барање до Министерството за здравство и преку Фондот, до Министерството за финансии, за нови согласности за вработувања во 2025 и тоа да се реализира до 31 март 2025 година, како краен датум. Наша одлука, на Фондот, ги продолживме важностите на сите договори на дело за уште три месеци за да се обезбеди оваа транзиција. Таргетот е околу 1.500 вработувања, подвлече Клековски.

Тој беше прашан дали има шанса за еден колективен договор во јавното здравство, бидејќи сега имало петнаесетина.

- Еден колективен договор не значи помали права од петнаесетте колективни договори, туку значи во еден документ да ги вклучиме сите. Мислам дека е најтранспарентно и за синдикатите, односно за вработените и за работодавачите да сите систематизации, плати, бидат на едно место, смета Клековски.

Се случувало да има забуни, кој колективен договор да се следи, а тоа создавало непотребни нервози, конфликти и судски спорови.

- Баш можам да кажам, кој како си го договорил со министерот во минатото, таков колективен договор си потпишал и сега имаме професии што се потценети, а стануваат критични за натамошното функционирање на здравството, додаде Клековски.

Прашан дали е вистина дека работниците на Стоматолошката клиника се без здравствено осигурување, посочи дека инциденти со здравственото осигурување се случуваат на дневна основа. Најчесто, заради чести прекини, пријави и одјави, што не се навремено приметени и поради такви грешки во пресметките, кога ќе истечат 60 дена од грешката, се прекинува. Кај нас има 10 луѓе ангажирани само за решавање такви условно кажано грешки во системот, најчесто предизвикани од чести пријави и одјави, појасни Клековски.

Тој потсети дека има глобален недостиг на лекари, здравствени работници, а не само во нашата држава.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Жената, која изгуби 77 килограми, сега се натпреварува за Мис на САД: Ова е мојот сон (ФОТО)

Амбер Улер (41) од Мичиген денес се натпреварува на изборот за Мис на САД, а веќе влезе во историјата како најстара учесничка на тој избор. 

Жената, која изгуби 77 килограми, сега се натпреварува за Мис на САД: Ова е мојот сон (ФОТО)

Но, нејзиното патување до гламурозната сцена не започна со круна и фустани, туку со тешка одлука да го промени сопствениот живот.

Пред пет години, Амбер, мајка на три деца, тежеше 136 килограми. По лекарскиот преглед што целосно ја шокираше, таа одлучи дека повеќе не сака да продолжи по истиот пат. Потоа докторот ѝ кажа дека е патолошки дебела, дека има предијабетес и дека е во опасност од прерана смрт.

„Веројатно нема да доживеете да ги видите вашите деца како дипломираат“, се присети Амбер во разговорот со „Пипл“.

Овие зборови беа предупредување што требаше да го слуша долго време. Но, дополнителен поттик дојде само неколку дена подоцна, за време на семејно патување во парк со трамболини.

Моментот што ѝ го промени животот

Потоа Амбер си играше со децата и скокна во базенот исполнет со пена. Проблемот се појави кога повеќе не можеше да излезе.

„Се заглавив и никој не можеше да ме извлече“, рекла таа. „Три силни мажи се обидоа да ме извлечат формирајќи човечки синџир, но не можеа. Мислеа дека ќе мора да ја повикаат противпожарната служба. Никогаш во животот не сум се чувствувала толку засрамено.“

Тој момент беше пресвртница. Сфати колку вишок килограми го ограничуваат нејзиниот секојдневен живот. „Тогаш сфатив дека е исклучително тешко да се биде толку загрозен. Живеев само половина од мојот живот“, рекла таа. „Не можев ни да се качувам по скалите во сопствената куќа.“

Во тој момент, таа одлучи да ги промени своите навики. Нејзината цел не беше веднаш да изгуби десетици килограми, туку повторно да се чувствува здраво и во форма. „Знаев дека губењето на тежината ќе биде тешко, но исто толку е тешко да се продолжи да се живее со таа тежина“, објаснила таа.

Исто така, додала еден голем сон на својот план - еден ден да застане на сцената на натпревар за убавина.

Од 136 килограми до круната

Амбер вели дека губењето на 77 килограми на почетокот изгледало речиси невозможно. „Мислам дека во тоа време би се чувствувало како да се искачувам на Монт Еверест. Затоа решив едноставно да се посветам на здравјето“, рече таа.

Во текот на три и пол години, таа ја промени исхраната, почна редовно да вежба и постепено изгради нов начин на живот. Не само што ослабе, туку го врати и чувството за слобода и самодоверба.

Својот прв голем успех го постигна во 2024 година кога ја освои титулата „Госпоѓа Флорида Универзум“. После тоа, ја претставуваше Флорида на „Госпоѓа Универзум САД“, каде што и победи.

Сепак, нејзиниот најголем сон отсекогаш била Мис САД. Ја привлекувала сцената, телевизиското емитување и целиот свет што го следи тој избор.

Најстарата натпреварувачка во историјата

Во јули, по отворен кастинг, таа беше избрана за Мис Мичиген САД 2026, обезбедувајќи го своето место на 75-от избор за Мис САД. „Знам, луда сум“, се пошегува Амбер. „Се пријавив доброволно да застанам пред камерите во бикини откако ослабев 77 килограми.“

Сепак, таа нагласува дека нејзината цел не била да докаже дека и жените со нејзиното минато можат да бидат убави. Најважно било да ѝ покаже дека животот може да се промени на која било возраст. „Се чувствував како да живеам само половина од мојот живот“, рекла таа за периодот пред трансформацијата.

Во Мајами, каде што се одржува изборот, Амбер открила дека подготовките ѝ дале поголема самодоверба отколку што очекувала. Како најстара натпреварувачка, се плашела дека ќе се чувствува поинаку меѓу помладите кандидатки, но тврди дека била пречекана со голема поддршка.

„Мислев дека ќе дојдам да ги видам сите овие девојки во нивните дваесетти години и ќе се чувствувам несигурно, но сите беа толку поддржувачки“, рекла таа.

Додала дека дури и најмладите натпреварувачки ја поддржуваат. „Дури и девојките од категоријата „тинејџерки“ се мои најголеми обожаватели. Тие навиваат за мене и ме бодрат“, рекла таа.

Таа верува дека би можела да стане најстарата Мис САД во историјата, како и првата мајка што ја освоила таа титула. „Чувствувам дека можам да срушам многу бариери“, рекла таа.

За неа, ова е многу повеќе од натпревар за убавина

Амбер верува дека денешните натпревари за убавина повеќе не се базираат само на физичкиот изглед. „Ова е многу повеќе од изглед, бидејќи кога ќе се сведете на 51 финалистка, сите девојки се убави“, рече таа. „Прашањето е, што друго носите со себе?“

Денес, тој ја гледа својата возраст како предност, а не како пречка. Таа верува дека искуството ѝ дава нешто што помладите натпреварувачки можеби сè уште го немаат. „Имам мудрост, зрелост и знам што бара оваа работа“, рече таа.

Амбер вели дека сака да остане дел од светот на изборите за убавина дури и по натпреварот. „Се гледам себеси како се враќам како придружничка или помошничка и учествувам во ова секоја година до стогодишнината. Ќе продолжам да доаѓам“, рече таа.

За неа, доаѓањето на сцената на Мис САД е остварување на сон што некогаш изгледаше целосно недостижен. „Отсекогаш сонував за овој натпревар, а фактот дека успеав е вистинска моја приказна за Пепелашка.“

Тагови: Мис

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

За само 4 минути од музеј во Шпанија е украдена златна колекција накит, стар 3.000 години

Во четириминутен грабеж извршен рано наутро, „Богатството на Вилена“, една од најважните колекции на артефакти од бронзеното време во Европа, беше украдена од музеј во шпанскиот град Вилена. 

За само 4 минути од музеј во Шпанија е украдена златна колекција накит, стар 3.000 години

Службениците потврдија дека се украдени повеќе од 50 предмети, претежно злато, објавува „Гардијан“.

„Алармот во музејот се вклучи околу 5:20 часот наутро“, изјави портпаролот на градот, додавајќи дека крадците веќе ја напуштиле зградата до 5:24 часот наутро. Тој ја опиша операцијата како „исклучително брза и професионална“. Според Мануел Пинеда, заменик-претставник на шпанската влада во Аликанте, крадците пристигнале со неколку возила и веројатно влегле во музејот низ прозорец.

Портпаролот на Вилена изјави дека сите безбедносни системи биле активирани и дека музејот не направил никакви грешки. Властите сега истражуваат дали алармот, кој се вклучил во спортскиот центар на градот непосредно пред грабежот, бил диверзија организирана од крадците.

„Целосно сме уништени, дури и се тресам“

Градоначалникот на Вилена, Фулгенсио Сердан, беше видливо потресен. „Го зедоа поголемиот дел од богатството“, им рече тој на новинарите. „Целосно сме уништени, дури и се тресам. Ова нè уништува во Вилена. Тоа е дел од нашето наследство, нашето богатство“, додаде тој.

Украдената колекција, која се чуваше во градскиот археолошки музеј, се состои од 29 нараквици, 11 чинии, три шишиња и други предмети. Тие се изработени претежно од злато, но колекцијата содржи и парчиња сребро, железо и килибар. Сите предмети датираат од приближно 1000 година п.н.е.

Богатството е пронајдено во 1963 година од археологот Хозе Марија Солер, закопано во сад во исушено речно корито. Иако историската вредност на колекцијата е непроценлива, само златото, според проценката на градоначалникот, вреди околу 1,7 милиони евра.

Кражби на уметнички дела низ Европа

Кражбата во Вилена е најновата во низата грабежи што ги погодија европските културни институции. Минатиот октомври, накит вреден 88 милиони евра беше украден од Лувр во Париз насред бел ден, а крадците избегаа за помалку од осум минути.

Италијанското Министерство за култура минатата недела објави дека четири дела на ренесансниот уметник Антонело да Месина со „исклучителна вредност“ се украдени од музеј на Сицилија. Два дена пред тоа, италијанската полиција објави дека пронашла слики од Реноар, Сезан и Матис, вредни повеќе од 10,4 милиони долари. Сликите беа украдени од музејот на Фондацијата Мањани-Рока во близина на Парма.

Тагови: музеј накит

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Американец ќе биде егзекутиран- убил две агентки за недвижности

Властите во Џорџија, југоисточна американска држава, за 16 септември ја закажаа егзекуцијата на Стејси Хамфрис, осуден за убиство на две агентки за недвижности пред повеќе од 20 години.

Американец ќе биде егзекутиран- убил две агентки за недвижности

Хамфрис, 53, ќе биде егзекутиран со смртоносна инјекција во државен затвор за убиствата на Синди Вилијамс, 33, и Лори Браун, 21, во предградието на Атланта.

Ова ќе биде првата егзекуција во Џорџија оваа година, објавува АП њуз. Државата долго време имаше мораториум на егзекуции поради правни спорови околу договорот за признавање на вина склучен за време на пандемијата на коронавирус. Одбраната тврдеше дека договорот привремено ги штител затворениците осудени на смрт од егзекуција. Последната егзекуција во Џорџија беше во март 2024 година.

Тој им ги зел парите, а потоа ги убил

Егзекуцијата на Хамфрис првично беше закажана за декември минатата година, но беше одложена. Неговите адвокати побараа двајца членови на државниот Одбор за помилување и условна слобода да бидат отстранети од рочиштето за помилување, тврдејќи дека тие имале конфликт на интереси бидејќи биле професионално вклучени во неговото судење.

Судијата Роберт Мекберни привремено ја одложи егзекуцијата додека ги разгледуваше нивните приговори. Адвокатите на Хамфрис поднесоа жалба до Врховниот суд на Џорџија, кој одби да го разгледа случајот. Жалбата потоа беше испратена до Врховниот суд на САД, кој сè уште одлучува за случајот.

Убиствата се случија околу пладне на 3 ноември 2003 година, во Паудер Спрингс, околу 20 милји од Атланта, главниот град на Џорџија во југоисточниот дел на САД. Хамфрис наводно влегол во продажната канцеларија каде што работеле агентките Вилијамс и Браун. Доказите презентирани на судењето покажаа дека тој ги принудил да се соблечат и да му ги дадат ПИН-овите од нивните банкарски картички, пред да ги убие.

Според судските записи, Хамфрис ги зел возачките дозволи и картичките на жените и подигнал повеќе од 3.000 долари од нивните сметки. По апсењето, тој им рекол на полицајците дека е задолжен од неколку брзи кредити со висока камата и дека му се потребни парите за да отплати пикап. Во времето на злосторството, тој бил условно ослободен за тешка кражба во 1993 година, а бил ослободен од затвор 13 месеци претходно.

Тагови: егзекутиран агентки

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер