За време на вториот ден од судењето на Доминик Пелико (71), неговата ќерка Керолин Даријан ја напушти судницата откако судијата спомна дека на компјутерот на нејзиниот татко има нејзини разголени фотографии.
„Убедена сум дека бев издрогирана, но тој никогаш нема да признае“, изјави таа за Le Parisien.
Додека претседавачкиот судија Роџер Арата почна да ги чита деталите за сликите, Даријан - која беше во јавната галерија - се расплака и мораше да ја напушти судската зграда на околу 20 минути.
Даријан, која сега има 40-тина години, веќе напишала книга за случајот наречена „Престанав да те нарекувам тато“, која судијата ја наведе пред судот.
Рекла и дека е „прогонувана“ од стравот дека можеби татко ѝ дозволувал мажи да ја силуваат откако на неговиот компјутер биле пронајдени нејзини слики во „туѓа долна облека, на некои фотографии и во облеката на нејзината мајка“, пренесува Билд.
Фотографиите се пронајдени на компјутерот на Доминик во папка наречена „За мојата ќерка, гола“.
Доминк, наводно, користел онлајн форум за да регрутира странци да го посетат нивниот дом, според полицијата која пронашла разговори на страницата наречена coco.fr, која оттогаш е затворена.
Неговата сопруга Жизел (72) наводно била дрогирана и силувана повеќе од 100 пати, соопшти судот.
Жизел „не се сеќава“ на 10-годишното злоставување, кое го открила во 2020 година, откако полицијата пронашла стотици нејзини слики на телефонот на нејзиниот сопруг.
Сликите и видеата наводно покажуваат десетици силувања во семејниот дом во Мазан, во близина на Авињон, Франција.
Тие се преселиле во селото од Париз, две години откако започнало злоставувањето во 2011 година.
Полицијата го открила овој грозоморен случај откако Доминик бил фатен од чувар на трговски центар како тајно фотографира жени под нивните здолништа.
71-годишникот, кој тврди дека бил силуван од медицинска сестра кога имал девет години, е подготвен да се соочи со „неговото семејство и неговата сопруга“, рече неговата адвокатка Беатрис Заваро.
За Жизел, сепак, ова судење ќе биде „ужасно искушение“, бидејќи „првпат таа ќе мора повторно да ги преживее силувањата што ги трпела повеќе од 10 години“, рече нејзиниот адвокат.