– Крај на децениското чекање на оваа градска адреналинска авантура ако ја добијат довербата од граѓаните, ветуваат и Ѓорѓиевски и Шукова.. И двајцата се на иста линија – Скопје изобилува со запуштени содржини, а најавуваат и нови со кои „метрополата“ ќе излезе од сивилото и монотонијата.

Кандидатот на ВМРО – ДПМНЕ за Град Скопје вели, покрај на парковите, ќе заживее и „звукот“ на градот и ноќниот живот преку разни содржини, а Луна Паркот е еден во приоритетите, бидејќи барем децата кои сега растат да можат да уживаат.

-Мене ми е жал, еве ние сме генерација која израсна без Луна Паркот во Скопје, но за жал растат и нашите деца во моментов. Во наредниве неколку дена ќе биде презентирана 3Д визуелизација, на се тоа како ќе изгледа и до јуни, 2027 година, јас одговорно тврдам дека скопјани ќе добијат нов Луна Парк. Ќе се искористат тие шест реквизити кои што се тука, ќе ги доплатиме како град бидејќи не се доплатени, но и дополнително ќе набавиме нови реквизити за да овозможиме современ, ултрасовремен како што нашите деца заслужуваат, а го има во европските метрополи,- - Орце Ѓорѓиевски – Кандидат за градоначалник на Скопје.

Кандидатката на СДСМ која ги претстави своите ТОП 20 проекти, за кои вели дека се срцето на нејзината програма, посочи дека Скопје под нејзина „палка“ ќе заживее во град каде младите лесно ќе можат да најдат забава и ќе уживаат, нешта кои ќе бидат дополнителен мотив да се одвратат од преселбата. И на нејзиниот „репертоар“ е Луна Паркот, но како дел од модерен комплекс кој би ја опфаќал Зоолошката градина, но и Аквариум.

-Имаме направено мултифункционално решение кое што ќе им понуди на најмладите нов Луна Парк, но секако со нова содржина и аквапарк и планираме и нови содржини во зоолошката градинка, односно нови живеалишта по примерот на тоа што беше направено пред неколку години, и мислиме дека тоа како сеопфатен мулт, со сеопфатен мултифункционален центар за најмладите дека ќе доенсе нова радост за децата. Тоа е визија за град кој нуди забава, образование и рекреација, семејствата и децата ќе имаат современо место за авантура во сопствениот град, Скопје заслужува ваква радост,- - Каја Шукова – Кандидат за градоначалник на Скопје.

И двајцата говореа за Аквапарк во Скопје, Ѓорѓиевски вели дека по разговорите со актуелниот директор на комплексот се надева дека веќе на пролет ќе може да се врати во функција, Шукова пак посочи дека ќе го реактивира проектот кој го правеа светски познати италијански дизајнери, со што Скопје, како што беше најавувано, би добил најубав аквапарк во регионот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.