Министерот за економија и труд Бесар Дурмиши појасни дека станува збор за инспектори кои по минатогодишниот оглас ја започнале задолжителната едногодишна обука, неопходна за стапување на должност. Според него, засилувањето на инспекциските капацитети е особено важно со донесувањето на новиот Закон за пушење, но ќе се следи дали сегашните ресурси и новите инспектори ќе бидат доволни, па доколку се покаже потреба, тогаш ќе се размислува и за дополнителни вработувања.

- Почната е постапката, тие од минатата година веќе се ставени нови луѓе, нови кадри кои до средина на годината ќе ги исполнат условите и инспекторатот ќе се зајакне со нови луѓе вработени кои што ќе имаат повеќе контрола низ целата држава. Ќе видиме како ќе се движат работите по зајакнувањето, па ако има потреба за дополнително пред јавноста ќе бидеме и ќе го кажеме тоа или ако е доволно ќе го мониторираме и ќе ги гледаме како постапуват во нивната работа- Бесар Дурмиши.

Во однос на анализата за движењето на цените, која Дурмиши ја најави на почетокот на годината, тој изјави дека податоците од првите денови на јануари покажале стабилизирање на цените. Според него, засега нема потреба од брзи интервенции со мерки за намалување на цените на храната и пијалоците, бидејќи и во месец декември било евидентирано нивно намалување од 0,4 отсто.

- Сега за сега не гледаме причина на ограничување на бруто-профитна маржа или ограничвуање на цени. Секојдневно ја гледаме ситуацијата, во комуникација сме со претставниците од ДПИ, ако има потреба како што сме реагирале во минатиот период, така ќе реагираме и во оваа година,- Бесар Дурмиши.

Дурмиши засега отфрла можност за воведување инстант мерки, но најави дека во текот на годината ќе се преземат повеќе чекори за намалување на инфлацијата, која на ниво на 2025 година изнесува 4,1 отсто. Како што посочи, ќе се спроведуваат политики со цел годишната инфлација да се сведе на 2 до 3 отсто и да се доближи до европскиот просек од околу 2 отсто.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.