Кинескиот автомобилски гигант во понеделникот објави дека ќе продава електрични возила со батерии во Јапонија од почетокот на следната година, што сигнализира континуиран пробив на големите автомобилски пазари, по договорот кој веќе е постигнат во Германија.

Од 31 јануари следната година, „BYD“ ќе го продава електричното спортско возило „ATTO 3“ во Јапонија, кое ќе може да помине 485 километри помеѓу две полнења, а ќе чини 4,4 милиони јени (32.735 долари).

За споредба, стандардниот електричен модел „Leaf“ од јапонскиот „Nissan“ може да помине 322 километри меѓу две полнења, а чини околу 3,7 милиони јени, пишува „Hrportfolio“.

Во втората половина на јануари, јапонската филијала на „BYD“ ќе отвори салони во 22 јапонски града, со планови да ги покрие сите 47 префектури, рече извршниот директор Ацуки Тофукуџи. До крајот на следната година имаат намера да лансираат уште два модели на јапонскиот пазар и да отворат повеќе од 100 продажни места до 2025 година.

Во Јапонија, хибридите сè уште се попопуларни од електричните автомобили со батерии, но доаѓањето на странските производители на електрични возила, како што се „BYD“ и „Volkswagen“, го зголеми уделот на автомобили кои користат само електрична енергија за погон.

Во мај, „Toyota“ почна да го продава првиот целосно електричен „bZ4X“ во земјата, но само за изнајмување, наплаќајќи 106.700 јени месечно за првите четири години од 10-годишниот договор.

За помалку од два месеци, тие беа принудени да ги повлечат од продажба поради безбедносни причини, а во октомври го рестартираа производството, забележува Ројтерс.

Кинескиот гигант во октомври се договори со германската компанија за изнајмување автомобили „Sixt“ да испорача околу 100.000 електрични автомобили до 2028 година. Во својата прва нарачка од „BYD“, „Sixt“ бара неколку илјади возила, од кои некои ќе бидат достапни веќе оваа година.

Во почетната фаза електрични возила ќе им бидат понудени на клиентите во Германија, Франција, Холандија и Британија, соопшти германската компанија која работи во 105 земји во светот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.