Здравје

Кенеди Помладиот: Не сум противник на вакцините

Кенеди Помладиот: Не сум противник на вакцините, ќе ја поддржам политиката на Трамп против абортусот.

Роберт Кенеди Помладиот, кој беше номиниран од американскиот претседател Доналд Трамп да го води Министерството за здравство и човечки услуги, денеска на сослушување пред Комитетот за здравство на Сенатот негираше дека е противник на вакцините и повтори дека ќе ја поддржи политиката на Трамп за забрана абортус.

За време на испрашувањето, Кенеди одби да одговори на прашањето дали верува дека вакцините предизвикуваат аутизам кај децата и дека не знае дали вакцината против коронавирус спасила милиони животи. Тој рече дека не е точно дека е противник на вакцините, бидејќи неговите деца се вакцинирани.

Републиканскиот сенатор од Луизијана, Бил Касиди, лекар, за време на испрашувањето во Сенатот рече дека е загрижен за претходните изјави на Кенеди кои „ја поткопаа довербата во вакцините со неосновани или погрешни аргументи“.

-Имам гласачи кои делумно благодарение на вас донесоа одлука да не го вакцинираат своето дете. „Вие фрливте сомнеж за некои од овие вакцини“, рече Касиди. Касиди на крајот од сослушувањето праша дали Кенеди, 70-годишен човек кој „поминал децении критикувајќи ги вакцините“ сега може „да ги промени своите ставови и пристап“, бидејќи како секретар за здравство и хуманитарни услуги ќе ја има најважната позиција со влијание врз политиката за вакцинација во САД.

Комитетот за финансии, каде вчера беше сослушан Кенеди, а чиј член е и Касиди, се уште не објави дали ќе ја испрати номинацијата на Кенеди за секретар за здравство до Сенатот под контрола на републиканците.

Портпаролот на Комитетот за финансии рече дека гласањето потенцијално би можело да се одржи следната недела, но дека се уште не е закажано.

Номинацијата на Кенеди за секретар за здравство можеби нема да стигне ни до Сенатот ако сите демократи во Комитетот за финансии гласаат против него и ако републиканецот Касиди, кој има место во тој комитет, како и во Комитетот за здравство, им се придружи.

Кенеди, кој ја основа антивакциналната група „Одбрана на здравјето на децата“, денеска, како и вчера пред Комисијата за финансии, изјави дека не е против вакцините.

Доколку биде потврдено, Кенеди ќе го предводи Одделот за здравство и човечки услуги, кој ги надгледува трошоците за здравствена заштита, вклучувајќи храна и лекови, како и програми за здравствено осигурување кои покриваат речиси половина од граѓаните на САД.

Доколку неговата номинација дојде пред целосниот Сенат, ќе му треба поддршка од најмалку 50 сенатори, што би му овозможило на потпретседателот Џеј Ди Венс да даде уште еден одлучувачки глас за да ја потврди неговата номинација.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Битола денес беше град на трчањето

Над 1.500 тркачи од 18 земји денес беа дел од 8-мото издание на ТРЧАЈ БЕ 2026, спортска манифестација која од година во година расте и ја зацврстува позицијата на Битола како значајна дестинација за спортски туризам во регионот.

Свежото утро создаде одлични услови за трчање, а годинешното издание донесе и исклучителни спортски резултати. На битолската патека беа постигнати најбрзите времиња досега и соборени рекордите на ТРЧАЈ БЕ. Низ улиците на Битола денес трчаа натпреварувачи од различни земји, бодрени од бројна публика, волонтери и сите оние кои беа дел од организацијата и реализацијата на трката.

ТРЧАЈ БЕ е спортски настан, но и приказна за Битола како отворен и активен град кој преку спортот привлекува гости, создава дополнителна вредност за локалната економија и се промовира надвор од границите на државата.

Општина Битола упатува честитки до организаторите на ТРЧАЈ БЕ, до сите институции, партнери, волонтери и служби вклучени во реализацијата, како и до граѓаните кои со својата поддршка придонесоа за атмосферата долж патеката.

Посебни честитки до победниците и до сите над 1.500 учесници кои денес ја истрчаа Битола.

Уште едно успешно издание на ТРЧАЈ БЕ, уште еден голем спортски ден за Битола.

Општина Битола

Тагови: битола

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре сончево со мала до умерена облачност

Времето утре ќе биде сончево со мала до умерена локална облачност. Ќе дува слаб до умерен ветер од северен правец.

Минималната температура ќе биде во интервал од 7 до 16, а максималната ќе достигне од 23 до 30 степени.

Во Скопје, претежно сончево. Ќе дува слаб до умерен ветер од северен правец. Минималната температура ќе се спушти до 11, а максималната ќе достигне до 28 степени.

До крајот на новата работна седмица ќе се задржи посвежо и претежно сончево време со мала до умерена облачност во текот на денот. Во вторник наместа во северните делови ќе има услови за повремен дожд. До среда ќе дува слаб до умерен ветер од северозападен правец, а потоа ветерот ќе го смени правецот во југоисточен.

Тагови: сончево

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Пожарот на Брач сè уште активен: Евакуирани речиси 700 луѓе

Пожарот е сè уште активен на хрватскиот остров Брач, две лица се повредени, а речиси 700 луѓе се евакуирани, додека населбата Милна е спасена од пожарот, изјави денес началникот на противпожарната служба Славко Туцаковиќ.

Тој рече дека постара жена, која паднала од чамец за време на евакуација и речиси се удавила, е во критична состојба, додека другото повредено лице е млад човек кој вдишал чад.

Туцаковиќ истакна дека ситуацијата на местото на пожарот на Брач утрово била помирна, иако сè уште дува ветер, по тешката ноќ во која пожарникарите ги бранеле куќите од пожарот, и дека, и покрај нивните напори, неколку згради биле оштетени, објави Индекс.

Milna. Bračani dragi, držite se! pic.twitter.com/UCbF18cH9f
— JurMag (@jur_magud) September 12, 2026

Туцаковиќ рече дека четворица канадери учествуваат во гаснењето на пожарот од воздух.

Хрватската противпожарна служба претходно објави дека пожарот се приближил до Милна поради ветер и дека сите расположиви противпожарни сили се ангажирани во гаснењето на пожарот и спречувањето на ширењето на пожарот кон самото населено место. Ветерот влијаел врз ширењето на пожарот кон јужната страна на Брач на тешко пристапен терен покриен со густа вегетација, се вели во соопштението.

Тагови: пожар Брач

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.