Кавадарци ќе добие градско шеталиште на местото на поранешното корзо, подносителот на предлог - граѓанската иницијатива што беше прифатена од Советот на Општината, Тодор Богев, денеска појасни во изјава за МИА, дека ја дал сега веќе прифатената иницијатива, согледувајки еден голем досегашен урбан недостаток на градот.

- По одамнешното укинување на градското корзо, ние практично немаме наша улица градско шеталише, што како градска одлика, го среќаваме кај поголемите градови и урбани центри, а особено туристичките градови, насекаде по Балканот, а и пошироко во светот. Затоа како интелектуалец, писател и граѓанин овде, се одлучив на таков чекор. Крајно време е да се исправи таа голема неправда кон град Кавадарци, рече Богев.

Тој додаде дека градското шеталиште ќе биде во централното урбанистичко јадро на град Кавадарци, дел од главната улица „Илинденска“. Според неговиот предлог, етапа по етапа, шеталиштето да се простира од градскиот плоштад до кружниот тек кај автобуската станица. Зона ослободена од автомобилски сообраќај.

Кавадарци ќе заличело на големите градови. Со тоа, ќе се отворела нова етапа во неговиот градски изглед и нова етапа на урбан, економски и културен раст и развој.

- Единствена улица што би била слободна за сообраќај би била од гимназијата само надолу покрај киното, полициска станица и кон мостот на реката Луда Мара. Со тоа што наместо семафор, би стоел знак стоп, за автомобилите да се секогаш застанати кога на пешачкиот премин ќе има пешаци кои поминуваат, по можност пред зебрата да има и лежечки полицајци, сподели Богев.

Притоа, додаде дека во догледно време, тука би можело да ce креира еден пешачки мост над сообраќајните делници, што би опфаќал и делови од плоштадот.

- За да се добие еден дел со шанкови и кафулиња како трибина за седење на концертите за време манифестацијата посветена на гроздоберот и други прослави, што би можел да се простира кружно како ринг од хотел „Балкан“ до старата стоковна куќа, образложи Богев.

Тој подвлече дека сите овие предлози се во насока на подготвување на Кавадарци, како туристичко место, за развој на туризам, меѓу кои - вински, езерски, планински, селски, алтернативен и слично, 365 дена во годината, отворен за посетители од земјава и странство.

Инаку, корзото во Кавадарци во минатото било на три локации. Најнапред било во чаршијата пред куќите на Ефтим Апостолов - Џамбазот и Игно Оравечки на една бетонирана плоча, долга околу 150 метри. Втората локација била на улицата „7 Септември“ во педесеттите и почетокот на шеесеттите години на минатиот век и на крајот, на улицата „Илинденска“ од старата банка до старата Автобуска станица. Последното корзо било во шеесеттите, седумдесеттите и дел од осумдесеттите години од минатиот век.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.