Црковните власти се под зголемен притисок да им исплатат компензација на жртвите, откако пред нешто повеќе од еден месец биле објавени резултатите на независната комисија која ја истражува сексуалната злоупотреба на деца во Франција од страна на свештеници и други католички службеници во Франција, објави АФП.
Жан-Марк Сов, кој раководи со независната комисија, рече дека католичките свештеници сексуално злоставувале околу 216.000 деца од 1950 година. Ако се додадат на тоа жртвите на злоупотреба што не ги извршиле свештеници, туку други луѓе поврзани со црковните институции, како што се католичките училишта и домови, се доаѓа до бројка од 330.000 малтретирани деца.
Околу 80% од жртвите се мажи.
„Последиците се многу сериозни. Околу 60% од жртвите подоцна имаа големи проблеми во приватниот и сексуалниот живот“, рече Сове.
Ќе биде формирана независна комисија која ќе ја процени оправданоста на барањето, а Црквата ќе обезбеди средства за отштета, изјави Ерик де Мулен-Бофор, шеф на Бискупската конференција во Франција.
На денешната конференција присуствувале 120 членови.
Шефот на бискупската конференција најавил и дека црквата во Франција ќе бара заем од банките доколку е потребно и дека од Ватикан ќе биде побарано да испрати набљудувач кој ќе ја следи исплатата на отштетата на жртвите.
Штетата може да ја чини црквата во Франција десетици милиони евра, а епископите ги ветија првите исплати веќе следната година. Најавиле и дека ќе воведат нови мерки кои треба да спречат нови сексуални напади од свештеници и да овозможат казнување на свештениците.
Црковните водачи се уште не одлучиле колкава ќе биде висината на обесштетувањето. Тие се надеваат дека ќе ги решат тужбите со обвинителите против обвинетите за користење на црковните позиции за злоупотреба на децата.
По презентирањето на резултатите од истрагата, првиот човек на комисијата што ја истражувал злоупотребата рече дека проблемот се уште постои. Тој додаде дека до 2000-тите, Католичката црква покажала целосна сурова рамнодушност кон жртвите и дека навистина почнала да го менува својот став во 2015-2016 година.
Црквата не само што не ги преземала неопходните мерки за да се спречи злоупотребата, туку и ги затворила очите, не пријавувајќи злоупотреба и понекогаш свесно ставајќи ги децата во контакт со предаторите, рече тој.
Претседателот на Француската бискупска конференција, Ерик де Мулен-Бофор, побарал прошка од жртвите, наведува АП.
Комисијата ја повикала Црквата да преземе решителни чекори и да се откаже од тезата за „грешки“. Комисијата ја повикала државата да најде начин за обештетување на жртвите, особено на оние на кои им е истечен рокот на застареност.
„Вие сте срам за човештвото“, им рече Франсоа Дево, кој го основал Здружението на жртви на слободата „Ла Парол“, пред претставниците на црквата на јавната презентација на извештајот, пред Сове да земе збор.
„Имаше одвратни масовни злосторства во овој пекол, но, уште полошо, имаше предавство на довербата, предавство на моралот, предавство на децата“, рече Дево, обвинувајќи ја Црквата за кукавичлук.
Комисијата, според Би-Би-Си, пронашла докази за 2.900 до 3.200 злоставувачи на деца меѓу свештениците и другите црковни лица, кои ги има вкупно околу 115.000 во Франција.
Извештајот се заснова на црковни, судски и полициски архиви и интервјуа со жртви.
Истрагата била нарачана од Француската католичка црква во 2018 година по серија слични скандали во други држави. Комисијата ја сочинувале 22 члена, а меѓу нив имало адвокати, лекари, историчари, социолози и теолози.
Повеќето од случаите што ги истражувала комисијата се чини дека се застарени според францускиот закон.
Сове, висок француски државен службеник, претходно изјавил дека извештајот од 2.500 страници се обидувал да го измери бројот на сторителите и бројот на жртвите.
Се бараа и „механизми, особено институционални и културни“ кои им дозволуваа на педофилите да останат во рамките на Католичката црква.