Иако земјава нема значајна директна трговска размена со регионот, според професорот Арбен Халили, индиректно ќе ги почувствува последиците од војната преку растот на цените на енергенсите. Тој посочува дека клучен ризик претставува Ормускиот теснец, преку кој минуваат околу 20 проценти од светската трговија со нафта. Секој евентуален прекин или ограничување на транспортот таму би можел нагло да ја зголеми цената на суровата нафта на светските берзи, што директно би се одразило и врз домашниот пазар. Според Халили, во таков случај цените на горивата во земјава би можеле да пораснат за 5 до 10 проценти, а тоа би значело поскап транспорт, повисоки цени на храната и зголемени производствени трошоци, што дополнително би ја забрзало инфлацијата. Во најлошо сценарио, предупредува тој, стапката на инфлација би можела да стане двоцифрена.

- Очекувано е нагло инфлацијата да оди нагоре. Тоа подразбира дека ќе повлече зголемување и на цените на прехранбените производи, но посебно на индустријата на глобално ниво, поради фактот што се што се користи во производството во индустријата, користи нафта. Не очекувам дека ќе останеме на планираното 2,7 според Владата и 3,5 од страна на Светска Банка инфлацијата да биде кај нас. Ако не се најде некое брзо решение секако дека инфлацијата сега да не преудицирам, но со овие предвидувања може да биде и двоцифрена.

Според Халили, секој глобален енергетски потрес има посилен ефект врз мали и отворени економии како македонската. Како увозно зависна земја, особено кога станува збор за енергенси, суровини и дел од прехранбените производи, Халили вели дека ваквите состојби ја наметнуваат потребата од зголемување на домашното производство и намалување на зависноста од увоз.

- Реално ова е уште еден показател дека ние мора да се свртиме кон домашното производство и да станеме повеќе проиводители на тоа што е неопходно за нас и да не бидеме целосно зависни од увозот. Ние за жал од земја која што извезувавме станавме земја која што најголемиот дел од прехрамбената индустрија ја увезуваме.

Дека глобалната економија се наоѓа пред сериозни ризици со долготрајни ефекти предупредуваат повеќе светски аналитичари. Иако берзите се затворени за време на викендот, според најавите и во зависност од развојот на безбедносната состојба, можни се нагли ценовни варијации веќе од утре, особено на пазарите на нафта и енергенси.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.