Македонија

Какви дела претходно извршувал 25-годишникот кој е под истрага за сериски убиства?

Дваесет и петгодишникот кој е под истрага за сериски убиства во Старо Нагоричане, пред да излезат на површина сомнежите дека силувал и задушувал немоќни жени и пред воопшто да биде лишен од слобода, украл товарно возило, пикап или помало комбе.

Пресуден момент за да биде фатен бил неуспешниот обид пред две недели среде бел ден да ја задуши со ќебиња врз глава 86-годишната Росанка Трајковска, чиј син го пријавил. Претходно, сомнежи дека напаѓал и убивал немало. На полицијата ѝ бил познат по тоа што со употреба на сила или обивање влегувал во дворови на куќи и фирми, а во кривичната пријава против човекот за кој мештаните велат дека од село во село одел со велосипед, стои дека извршувал кражби, но не само ситни.

-СВР Куманово поднесе кривична пријава против Т.Б. (25) од Општина Старо Нагоричане поради постоење основано сомнение дека е извршител на две „тешки кражби“ по член 236 од деловен објект и приватен имот и „кражба“ по член 235 од товарно моторно возило.

Откако бил пријавен настан на 09.02.2026 година за физички напад врз Р.Т. (86) во село Челопек, Т.Б. (25) бил лишен од слобода. - МВР

Истрагата треба да покаже дали 25-годишникот убил најмалку пет жени во серија, но и дали сакал, а не успеал телата да ги пренесува со комбе.

Од Судска медицина за Канал 5 потврдуваат дека веќе се завршени двете обдукции, и за 78-годишната жена која беше пронајдена мртва во својот дом пред околу десетина дена, но и за помладата, околу 40-годишна која била погребана пред околу еден месец, а сега беше ексхумирана. Додека извештаите „патуваат“ до кумановското обвинителство, се прават ДНК анализите, велат извори од Судска медицина кои за Канал 5 брифираат и дека „по ова, ќе мора да се ископуваат и анализираат и други случаи“ иако засега нема конкретна најава од Обвинителството за екхумации на други тела.

Експерти од областа велат дека секој случај со сериски убиства во Македонија од минатото бил специфичен, и ниту една истрага со утврдување на траги не била иста. Вообичаено секој имал свој печат во извршување на делата и нема „исти шаблони“ вели во телофонски разговор за Канал 5 Професорот по судска медицина Д-р Алексеј Дума кој додава дека лабораторијата во Македонија е моќна и работи по меѓународни стандарди.

-Ако секој одговорно си го заврши своето - делчињата од сложувалката ќе се вклопат и ќе се добие целосна слика. Нема точен рок, колку време треба да трае една ДНК анализа, а зависи и колку примероци се во прашање, но и секој случај си има специфика. Во оваа работа важи правилото „два пати потврди“ бидејќи нема простор за поправен. И во случајот со познатиот „Македонски Раскољников“ со еден детал прецизиравме кое е оружјето и дека е обложено со нешто помеко, секирата што беше обвиена со најлони што беше пронајдена,- - Д-р Алексеј Дума - Професор Алексеј Дума.

Жители на Старо Нагоричане кои тврдат дека осомничениот напаѓал жени кои успеале да се спасат испратија и снимка од безбедносни камери од куќа близу Коински пат, на која се гледа како пред околу еден месец крупен човек со црно палто и качулка на глава пробува да влезе внатре. Според дел од мештаните станува збор за 25-годишникот кој сега е зад решетки, во притвор.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Речиси 500 мигранти со чамци пристигнале во Велика Британија за еден ден

Речиси 500 мигранти пристигнаа во Велика Британија вчера, прекинувајќи го десетдневниот застој во преминувањето на Ламанш, морскиот премин меѓу Франција и Велика Британија.

Ова се првите регистрирани пристигнувања од 17 август, објавува Би-Би-Си.

Вкупно 494 лица беа истоварени од седум чамци во Довер и префрлени во база на Командата за гранична безбедност. Гумените чамци влегуваа во британските води до доцна синоќа. Анализата на владините податоци од страна на Прес Асошиејшн покажува дека вкупниот број на пристигнувања оваа година е помал од минатата година.

Од 1 јануари до 25 август оваа година, 15.897 лица го преминале Ламанш од Франција во мали бродови. Ова е за 45 проценти помалку отколку во истиот период минатата година. Од 2020 година, пристигнувањата со мали чамци станаа најчестата регистрирана рута на нерегуларен влез во Велика Британија.

Справување со шверцерите

Речиси секој што пристигнува со мал чамец бара азил. Меѓународното право им дозволува да останат во земјата додека не се обработи нивното барање. Помеѓу јули 2025 и јуни 2026 година, пристигнувањата со мали чамци сочинуваа 40 проценти од сите барања за азил. Чамците што пристигнаа во Велика Британија помеѓу 26 август 2025 и 25 август 2026 година превезуваа во просек 68 лица. Ова е двојно повеќе од бројот во 2021 година.

Експертите предупредуваат дека пренатрупаноста на чамците го прави патувањето поопасно. Податоците на Обединетите нации покажуваат дека најмалку 84 лица загинале обидувајќи се да го преминат Ламанш во 2024 година. Пристигнувањата со мали чамци сочинуваа околу пет проценти од целата имиграција во Велика Британија во 2025 година.

Владата објави мерки против мрежите за шверц кои ги организираат преминувањата со цел да се намали бројот на пристигнувања. Еритрејците сочинуваа 18 проценти од сите пристигнувања помеѓу јули 2025 и јуни 2026 година.

Некои луѓе влегуваат преку други патишта

Според бројките на Министерството за внатрешни работи за 2025 година, најмалку 2.335 лица кои пристигнале со мали чамци се проценува дека се потенцијални жртви на трговија со луѓе или други форми на модерно ропство. Дополнителни 4.712 лица беа откриени како нелегално влегуваат во Велика Британија преку други патишта помеѓу јули 2025 и јуни 2026 година, на пример скриени во возила, фериботи или авиони. Ова е намалување од 17 проценти во однос на истиот период претходната година.

Исто така, има луѓе кои влегуваат во земјата легално, со работна или студентска виза, но остануваат по истекот на нивната дозвола. Не е познато колку луѓе во Велика Британија остануваат без важечка дозвола откако легално влегле во земјата. Најновите пристигнувања го зголемуваат вкупниот број на мигранти што го преминуваат Ламанш оваа година на 16.391. Ова е за 43 проценти помалку од истиот период минатата година и 17 проценти помалку од истиот период во 2024 година. Министерката за внатрешни работи Шабана Махмуд рече дека падот на пристигнувањата не е причина за опуштање и рече дека има „уште работа што треба да се направи“.

Извор: Индекс.хр

Тагови: мигранти

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Метео

Утре сончево и топло со мала до умерена облачност

Сончево и топло со мала до умерена локална облачност. Сончево и топло со мала до умерена локална облачност.

Наместа ќе биде нестабилно со пороен дожд, грмежи и засилен ветер. Локално процесите ќе бидат во форма на невреме со пороен дожд, силен ветер и услови за појава на град. Ќе дува слаб до умерен ветер од југоисточен правец. Минималната температура ќе биде во интервал од 11 до 20, а максималната ќе достигне од 32 до 36 степени.

Во Скопје, сончево и топло со мала до умерена облачност. Во попладневните часови наместа ќе има појава на нестабилност со пороен дожд, грмежи и засилен ветер. Во делови од котлината процесите ќе бидат во форма на невреме со пороен дожд, силен ветер и услови за појава на град. Минималната температура ќе се спушти до 19, а максималната ќе достигне до 36 степени.

За време на викендов времето претпладне ќе биде сончево и топло, а во попладневните часови наместа ќе има појава на нестабилност со пороен дожд, грмежи и засилен ветер. Локално процесите ќе бидат во форма на невреме со пороен дожд, силен ветер и услови за појава на град. А во новата работна седмица ќе биде сончево и топло, со услови за слаба локална нестабилност во попладневните часови.

Тагови: УХМР

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Вучиќ: Хаг ја сакаше смртта на Младиќ зад решетки, ќе биде погребан според желбата на семејството

Тој испрати остра порака кон Хашкиот трибунал.

Србија ќе организира сè за достоинствен погреб на Ратко Младиќ доколку тоа го побара неговото семејство, изјави претседателот на Србија, Александар Вучиќ кој рече дека се подготвени како државата да помогнат, но оти Србија сè уште нема официјално известување од Хаг за смртта на Младиќ. Тој испрати остра порака кон Хашкиот трибунал. Младиќ кој почина вчера во затворот во Хаг на 85-годишна возраст, беше осуден на доживотен затвор за геноцидот во Сребреница, злосторства против човештвото и воени злосторства извршени за време на војната во Босна и Херцеговина.

-Сега видовме дека Хаг сакаше Младиќ да почине зад решетки. Тие не сакаа генералот да почине во Србија, да умре каде што сакаше. Тоа е антицивилизациско однесување, однесување без преседан и без оправдување.- изјави Вучиќ

Тагови: Александар Вучиќ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.