Новата година носи нова енергија и мотивација - време е да започнете да работите на вашите фитнес цели. Но, за да ја избегнете класичната замка на ентузијазмот кој трае само неколку недели, клучно е тренингот да го започнете на вистински начин, пишува тренерот Тијан Јагариќ на својот блог.

Во својот детален водич, Јагариќ ги објаснил чекорите кои ќе ни помогнат не само да почнеме, туку и да се задржиме на вистинскиот пат.

1. Поставете си реални цели

Повеќето луѓе грешат кога ќе поставуваат нереални цели, како „Ќе изгубам 10 килограми за еден месец“ или „Ќе одам во теретана секој ден“. Ваквите планови брзо доведуваат до разочарување и откажување. Наместо тоа, изберете цели кои се остварливи и мерливи.

Пример за добра цел е: „Ќе правам три тренинзи неделно во текот на јануари“ или „Ќе научам правилно да правам чучнувања и склекови до крајот на месецот“.

Совет: запишете ги вашите цели и остварете мали награди за нивно постигнување - ова дополнително ќе ве мотивира.

2. Почнете постепено

Ако не сте вежбале долго време или сте сосема нови во светот на фитнесот, не очекувајте одеднаш да можете да правите интензивни тренинзи пет пати неделно. Премногу оптоварување може да доведе до повреди или брз замор.

Совет: Започнете со умерен тренинг. Како што напредувате, постепено зголемувајте го интензитетот.

Пример: Првата недела фокусирајте се на основните вежби како што се чучнувања, склекови и „планк“.

3. Направете план

Една од главните пречки за успех е немањето план. Без структуриран пристап, лесно ќе се откажете. Како и за сè во животот, ако сакате да успеете, потребен ви е организиран план и систем според кој ќе работите. Ако не можете сами да го создадете, побарајте помош од професионалец.

Пример план за почетници:

Понеделник: кардио вежби (пешачење, возење велосипед или лесно џогирање – 20 минути)

Среда: Тренинг за сила (чучнувања, склекови, планк – 3 серии од 10 повторувања)

Петок: Комбиниран тренинг (10 минути кардио + 10 минути вежби за сила)

Совет: ако салата за вежбање не е опција за вас, користете апликации за домашно вежбање или следете ги тренинзите преку Интернет.

4. Внимавајте на исхраната

Тренингот е само дел од сложувалката – без соодветна исхрана, резултатите ќе бидат ограничени. Со новата година започнете со едноставни промени кои ќе ви помогнат да се чувствувате полни со енергија.

Фокусирајте се на:

Протеини (пилешко, риба, јајца, мешунки)

Зеленчук и овошје

Сложени јаглехидрати (овес, кафеав ориз, интегрален леб)

Хидратација – пијте доволно вода во текот на денот.

Избегнувајте преработени грицки, газирани пијалоци и премногу шеќер.

5. Најдете поддршка

Започнувањето може да биде предизвик, но ако имате некој кој ве поддржува, тоа може да направи голема разлика. Најдете пријател за вежбање, придружете се на групни тренинзи или споделете го вашиот напредок со другите.

Совет: Друштвото може да ве мотивира, но и да го олесни тренингот!

6. Не заборавајте да се одморите.

Една од најчестите грешки што ги прават почетниците е игнорирањето на одморот. На мускулите им треба време да закрепнат да се регенерираат и растат. Погрижете се да имате најмалку два до три дена одмор неделно, во зависност од вашето моментално ниво на кондиција.

Пример: Наместо интензивен тренинг секој ден, правете лесна прошетка или серија истегнувања.

7. Следете го вашиот напредок

Следењето на напредокот е единствениот начин да знаете дека вашиот систем функционира и има смисла. Како ќе го следите вашиот напредок зависи од вашите цели, тоа може да биде: мерење на телесна маса, мерење на обемот на телото, следење на напредокот на силата итн. Водете дневник за тренинг, користете фитнес апликации или едноставно запишете како се чувствувате после секој тренинг.

Бонус совет: Фотографирајте го вашиот напредок еднаш месечно - понекогаш промените во вашето тело не се веднаш видливи на вагата, но фотографиите покажуваат сè.

8. Не заборавајте зошто почнавте

Секој ќе има денови кога не му се вежба. Во тие моменти, присетете се на вашите причини за вежбање. Можеби сакате да бидете поздрави, да имате повеќе енергија или едноставно да се чувствувате горди на вашите достигнувања. Визуелизирајте ја вашата цел за да останете мотивирани.

„Вежбањето на почетокот на новата година може да биде совршен начин да воспоставите здрави навики кои ќе траат цел живот. Клучот е да поставите реални цели, да креирате план кој одговара на вашиот животен стил и да уживате во процесот. Запомнете, малите чекори водат до големи резултати.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.