Тие често изгледаат комплицирано и нежно, но со разбирање на нивните основни потреби, грижата за нив може да биде едноставна.

Иако на многумина орхидеите им ‘задаваат главоболка’, бидејќи ги бие глас дека се комплицирано и осетливо цвеќе, вистината всушност е многу поедноставна – една од клучните и често погрешно сфатени елементи во грижата за нив е ѓубрењето.

За разлика од класичните собни билки, орхидеите имаат специфичен начин на раст и апсорпција на хранливите материи. Тие не бараат обилна прихрана, но без редовно дополнување на хранливите елементи, со тек на време слабеат, престануваат да растат и ја губат способноста за цветање. Токму затоа правилно дозираното и редовно ѓубрење, прави огромна разлика помеѓу орхидејата што едвај опстанува и онаа која со години изгледа здраво и раскошно.

Ако ви се чини дека неделното ѓубрење е комплицирано или се плашите да не претерате, добра алтернатива е ѓубрењето еднаш месечно со ѓубриво растворливо во вода, но во целосна концентрација. Сепак, важно е да знаете кога да го прескокнете ѓубрењето.

За време на зимата, кога орхидеите мируваат, ѓубрењето треба значително да се намали, но никако целосно да се укине. Исто така, не се препорачува ѓубрење додека орхидејата цвета, бидејќи тоа може да предизвика прерано паѓање на цветовите и расипување на изгледот на билката.

Како правилно да ги ѓубрите орхидеите?

Секогаш пред ѓубрењето полејте го растението со обична вода.

Користете ѓубриво исклучиво наменето за орхидеи, или користете природни алтернативи.

Вишокот вода треба слободно да излезе од саксијата, за корењата да не се расипат.

Еднаш месечно исперете ја земјата со чиста вода за да го отстраните вишокот сол од претходното ѓубрење.

Исто така, многу љубители на цвеќе се прашуваат дали орхидеите треба воопшто да се пресадуваат и како да го направат тоа. Пресадувањето обично се препорачува на две до три години, или кога ќе забележите дека супстратот е премногу збиен и не им овозможува на корењата да дишат.

При пресадувањето, клучен е изборот на вистинска саксија и соодветен супстрат (земја) наменета само за орхидеи. Супстратот мора да овозможува добра дренажа и доволен проток на воздух околу кореновиот систем.

Кога ќе почнете со пресадување, внимателно отстранете ја старата земја и прегледајте ги корењата. Гнилите и оштетени делови од коренот отстранете ги за цвеќето да има здрава и стабилна околина за раст. Пресадувањето на цвеќето не е само естетски чекор, туку овозможува свеж супстрат, го поттикнува растот и цветањето, а исто така помага во превенцијата на болести и проблеми со корењата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.