Македонија

Јовановски: Градскиот стадион, затворениот базен и детската градинка во Прилеп ги реализира СДСМ, на прав пат сме

Заробена и задолжена општина беше состојбата во која ја затекнав општина Прилеп, со моето доаѓање на функција како градоначалник – истакна Илија Јовановски, градоначалникот на Прилеп на граѓанската трибината „На Прав Пат" на СДСМ.

12 години ВМРО-ДПМНЕ и тогашниот градоначалник Марјан Ристески им продаваа на граѓаните лажен патриотизам и популизам. Но, граѓаните ги препознаа лагите и затоа им рекоа „не" на ВМРО-ДПМНЕ. –истакна Јованоски.Тој потенцираше дека 12 години, проекти биле само ветувани, а ништо не се сработило. Како лажното ветување дека Прилеп ќе биде европски град, а при тоа не бил направен ниту еден детален урбанистички план,а сега само последнава година направени се 4 урбанистички планови и во моментов се работи на планови за 30 села во оваа општина.-истакна Јовановски.

За 12 години немаше ниту еден капитален проект, а во мојата предизборна програма имаше 12 проекти и сите ќе бидат направени за мандатот од 4 години.-истакна Јовановски .

Единствен капитален проект кој го започна минатата локална власт е училиштето кое што е позиционирано на место без пристапен пат, без одвод и довод на вода, без потребната инфраструктура ,на ливада, целосно несоодветно за училиште.-посочи Јовановски.Тој додаде дека за цел еден мандат Марјан Ристески асфалтирал само 8 километри улици, а локалната власт од СДСМ за само две години асфалтираше 24 километри улици во градот, а до крајот на оваа градежна сезона ќе се довршат уште 20 улици.

Шест години минатата власт го правеше градскиот стадион, два пати сечеа ленти и не го направија. Една година потрошивме на средување на проектната документација и поправање на гршките во статика во самиот проект.До крајот на оваа градежна сезона стадионот ќе биде пуштен во употреба.-потенцираше Јовановски.Како дел од проектите на кои работеше и сеуште работи локалната власт во Прилеп, градоначалникот Јовановски ги истакна дневниот центар за детска парализа, новите автобуси на метан,новиот мост на градската река широк 20 метри со 4 ленти, комплетно преуреден просторот на Марковите кули,а готов е и проектот за езерото околу кое комплетно е уредено со мултикултурни содржини кое ќе се гради следната година.

Општина Прилеп неуморно работи и на уште големи проекти планирани за периодот кој следува, како булеварот од вредност од 1 милион евра, реновирање на градската чаршија, затворен базен и детска градинка и театарот во Прилеп.

За разлика од порано, оваа власт предводена од СДСМ стои на зборот и го исполнува ветеното. Прилеп е на прав пат, државата ни е на прав пат!

Свет

Министерство за одбрана на Русија: Неутрализирани повеќе од 100 украински дронови

Министерство за одбрана на Русија: Неутрализирани повеќе од 100 украински беспилотни летала при ноќни напади.

Министерството за одбрана на Русија соопшти дека повеќе од 100 украински беспилотни летала се уништени или пресретнати ноќеска во напади на југозапад на руската територија и на полуостровот Крим.

Министерството соопшти дека армијата неутрализирала 51 дрон над Крим, 44 над регионот Краснодар, шест над регионот Белгород и еден над регионот Курск.

Во текот на ноќта, поморската противвоздушна одбрана и патролни бродови на Црноморската флота уништија шест поморски беспилотни летала во водите на Црното Море.

Руската армија редовно објавува дека одбила ноќни напади на украински беспилотни летала, но ретко се наведува толкава бројка, јавија западни медиуми.

Гувернерот на Белгородската област, која граничи со Украина, претходно денеска објави дека мајка и четиригодишно дете загинале при напад со беспилотно летало врз селото Октјабарски.

Живот

Во САД марихуаната ќе биде класифицирана како помалку опасна дрога

Американската Влада одлучи да ја категоризира марихуаната како помалку опасна дрога, што значи дека луѓето кои користат или ја поседуваат веројатно нема да одат во затвор во иднина.

- Премногу животи се превртени наопаку од нашиот неуспешен пристап кон марихуаната. Министерството за правда го прави следниот чекор за прекласификација на марихуаната од категорија еден во категорија три според федералниот закон, напиша американскиот претседател Џо Бајден на социјалната мрежа Икс.

Во САД наркотиците се класифицирани во пет различни категории. Досега марихуаната или канабисот беа во првата, а со тоа и најстрогата категорија, која вклучува хероин и ЛСД. Американската Влада сега побара марихуаната да биде вклучена во третата категорија. Како резултат на тоа, марихуаната ќе биде на исто ниво со стероиди или парацетамол.

Американските медиуми ја означија таа прекласификација како историска. Со прекласификацијата се признава медицинската употреба на канабисот, но целосна легализација низ државата за приватна употреба не е планирана. Марихуаната е веќе легална за рекреативни и медицински цели во повеќе од 20 американски држави, а само за медицински цели во повеќе од десетина други држави.

Македонија

Од денеска пријавување за бесплатно подигнување кабаст отпад во сите населби во Кисел Вода

Од денеска почнува пријавувањето за бесплатно подигнување кабаст отпад во сите населби во Кисела Вода

Нова акција за собирање на кабаст отпад ќе се спроведе во општина Кисела Вода. Како дел од активностите за заштита на животната средина, во периодот од 27 мај до 07 јуни во сите месни и урбани заедници на територија на општината, ќе бидат ангажирани одговорни лица и сезонски работници кои бесплатно ќе го подигаат кабастиот отпад од пред домаќинствата или колективните згради, информираат од Општина Кисела Вода.

Пријавувањето почнува денеска и ќе трае до 23 мај. Секој жител на општина Кисела Вода кој поседува кабаст отпад и сака тој да биде подигнат и депониран на соодветна локација, ќе може да закаже термин на телефонскиот број 02/2785-427, секој работен ден од 09:00 до 15:00 часот.

Од Општината појаснуваат дека кабастиот отпад треба да биде поставен пред објектот кој е претходно договорен, на безбедна локација со што не би се загрозила безбедноста на пешаците, велосипедистите и останатите учесници во сообраќајот, кои ќе се движат во тој период.

-Само со одговорно однесување на секој поединец заеднички ќе можеме да ја одржуваме Кисела Вода чиста и уредна. Зачувувањето на природата и животната средина е наша заедничка обврска и одговорност, велат од Општина Кисела Вода.

Оттаму апелираме до сите граѓани да се приклучат на оваа акција, бидејќи, како што велат поддршката и заедничката ангажираност се од суштинско значење за заедницата.