Објавата ја пренесуваме интеграло:

Адвокатот Сашко Дуковски денеска изјави дека казната од 12 години затвор за Васил Јованов — лице кое без возачка дозвола, под дејство на алкохол, со огромна брзина и на црвено светло свесно ја прегази нашата ќерка Фросина Кулакова — била резултат на „притисок од јавноста“.

Дополнително, Дуковски говореше за „лов на вештерки“ и дека судот применил „шеријатско право – око за око, заб за заб“.

Со вакви изјави, овој адвокат не само што го навредува нашето семејство, но и ја понижува жртвата, заради што во најмала мера треба јавно да ни се извини, но со вакви невистинити изјави дополнително го поткопува кредибилитетот на целиот правосуден систем кој и онака е крајно долен...

Па ако е и од него – премногу е...

Во продолжение следуваат пет фактички и правни точки со кои се гледа неоснованоста и гола манипулативност но и врвно ниво на бескрупулозен чин препознаено во неговите тврдења.

1️⃣ Судската пракса не е алиби за неправда

Тврдењето дека „никогаш досега не е изречена ваква казна“ не е аргумент, туку признание за системски неуспех.

Во секоја држава што тежнее кон правда, позитивен преседан што ја исправува неправилната пракса и ја воведува во адекватни и потребните законски рамки е знак на напредок – не на притисок.

Ако досега ниту еден убиец зад воланот не добил соодветна казна, тоа не значи дека оваа казна е висока, напротив оваа изречена казна е крајно несразмерно ниска и затоа вака реагираме и потенцираме дека сите претходни биле премногу благи...

Токму поради ваквите благи казни како што е и постоечката на Васо Јованов од само пола од пропишаната Законска казна а сите сме сведоци дека напросто сите можни отежнителни околности му се на вратот на ладнокрвниот убиец Васо Јованов и затоа доколку оваа казна се официјализира од страна на Апелацискиот суд ќе продолжи и како судска пракса ќе се потхранува систем во кој живееме во секојдневие со беззаконие, дивеење и човечки жртви.

Фросина ја плати цената на тој системски пропуст. Друга Фросина да не дозволиме да се деси...

Понатаму Дуковски, кој се повикува на „судска пракса“, не кажува дека во сличен случај, познат како „Златарот од Мавровка“, судот не прифати манипулативно признание и изрече максимална казна, иако обвинетиот го признал делото.

Зошто? Затоа што признанието нема тежина кога има обилје на докази и по правило наведува на правни маневри на одбраната односно голи манипулации со цел неосновано да се постигне намалување на казната...

И токму затоа, според таа судска пракса како што е случајот со Златарот од Мавровка и неприфатеното признание на убиецот, па подеднакво и Васил Јованов заслужува максимална казна....

Во ова, дури и со Дуковски можеме да се согласиме штом бара примена на судска пракса еве јаснен пример...

2️⃣ Кога совеста на народот ќе прозбори – тоа не е притисок, туку е правда

„Притисокот од јавноста“ не му пресуди на убиецот Васо Јованов – туку неговите злодела.

Судот не е изолиран остров: пресудите се донесуваат во име на граѓаните, во име на јавноста.

Тие 40.000 граѓани во Скопје и десетици илјади низ другите градови не излегоа од омраза, ниту за „шеријатско право“.

Излегоа затоа што совеста на народот не може повеќе да молчи пред озаконувањето на беззаконието од страна на системот особено кога казни и убиства се минимизираат

Ние како семејство, а и целата јавност, не бараме одмазда – бараме владеење на правото.

3️⃣ „Каење“ не се мери со зборови – туку со дела

Да се зборува за „искрено каење“ кај лице кое е правосилно осудено за трговија со дрога, кое сакало да побегне од местото на убиството и потоа манипулативно се обидувало да ја ублажи вината – е морален и правен апсурд.

Таквото „каење“ е сценарио, не совест. Така повеќе не може и ЗАТОА БЕШЕ И РЕАКЦИЈАТА НА НАРОД И СИТЕ ПРОТЕСТИ

Во вистинско каење има самопријава, искреност ...

Во овој случај – нема ништо од тоа. Васо и неговото семејство уште првиот ден во притвор му шверцуваат мобилен телефон што е уште еден низата огромни докази за каков тежок криминален профил се работи !!!!!!!!!!

4️⃣ „Лов на вештерки“ е срамен збор за убиство на дете и понижување и сквернавење на нејзината жртва...

Да се спореди барањето за правда со „лов на вештерки“ е навреда за секое семејство што изгубило најмил.

Ова не е мит, туку злосторство.

Фросина нема да дозволиме да биде дел од нечија правно -медиумска магла, туку архетип на совеста на едно општество што повеќе не прифаќа да биде се молчаливо.

5️⃣ Фактите се непобитни – и јавноста не ги измисли

Васил Јованов:

– возел без возачка дозвола

– бил под дејство на алкохол

– минал на црвено светло

– возел со екстремна брзина низ еден од најфреквентните пешачки премини

– сакал да побегне од местото

– правосилно осуден за трговија со дрога

– со 14 прекршоци „чувани во фиока“

Критичната вечер свесен дека на врат има бројни пријави и затворски казни тој најарогантно сето го апстрахира и тргнува со колата без возачка дозвола да пие низ градот и да дивее како што правел вообичаено и така ја убива нашата мила Фросинче

Сите овие отежнителни околности го откриваат профилот на лице што не покажува ни трошка совест, туку повторува криминални шеми.

Овие факти не се „притисок од јавноста“, туку темели на правдата што бара максимална казна.

Заклучок

Кога Васил Јованов ја прегази Фросина Кулакова, не беше прегазено само едно дете, туку човечноста на ова општество.

Зашто Васил Јованов одамна требало да биде во затвор – имајќи предвид неговото богато криминално досие, бројните прекршоци и кривични дела што со години биле прикривани или чувани „во фиока“.

Тоа прикривање, за жал, било овозможено и преку неколку манипулативни и незаконски судски постапки, кои наместо да го заштитат човечкиот живот, му овозможиле на сторителот повторно да излезе на улица – сè до денот кога на пешачки премин ја одзеде младоста и животот на нашата мила Фросинче

Сега е моментот судот да покаже дека Законот има сила и совест.

Да докаже дека животот на едно дете вреди повеќе од ароганцијата на еден убиец.

И дека правдата, конечно, не се купува – туку се заслужува.

Фросина живее преку нас, преку светлината што ја остави зад себе.

Семејството Кулакови

Голем поздрав

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.