Македонија

Јанушев: Дали во СВР Скопје имало пријава пред 5 дена дека убиецот е Палевски?

Во СВР Скопје официјално е заведено дека Љупчо Палевски Палчо и убиецот на Вања уште пред 5 дена, тврдат од ВМРО-ДПМНЕ и прашуваат зошто ништо не се презело од тогаш.

Нивните сомнежи се дека тоа има врска со одржаувањето на Самитот на ОБСЕ, кој се одржа истиот ден кога Палевски ја напуштил државата... Бараат оставка од Спасовски и да се прогласи ден на жалост.

„ Зошто 5 дена не биле преземени никакви дејствија во однос на таа информација?!? Како може неколку дена да има исчезнато лице со неговото сопствено возило, кое потоа убијците го користат за киднапирање на друго лице и со него вршат ново кривично дело – киднапирање и убиство? Извршителот на убиството е поранешен висок функционер во партијата на Спасовски, претседател на градската организација на СДС. Исто така, познато е дека подолго време беше дел од јавна рекетарска група која во јавниот простор тргува со влијание и работи преку користољубие, а политичката партија му беше само параван за се она што го прави. Зошто власта предолго го толерираше ова однесување? Спасовски и СДС да одговорат дали ваквите групи ги стимулираат и користат за нивни лични потреби, а подоцна ги толерираат се додека не се случи ваква трагедија каде што животот го загуби невино дете?!?“ Игор Јанушев, ВМРО-ДПМНЕ

Одговорност и максимални казни за сторителите, побара министерот за правда Кренар Лога. На својот ФБ профил изрази сочуство до семејствата и напиша дека „Ова е една од најголемите трагедии во нашата држава затоа што безмилосно се одземени два живота.“

Сторителите и сите инволвирани во најкус рок да бидат изведени пред лицето на правдата и да понесат одговорност за злосторството, очекуваат и од владејачката СДСМ, кои изразија сочуство до семејството, роднините, пријателите и соучениците на Вања.

„Надлежните институции, Министерството за внатрешни работи и Јавното обвинителство работеа интензивно, целосно го расветлија случајот, ги пронајдоа сторителите на ова грозоморно злосторство и тоа е за поздравување. Во рамки на своите законски надлежности МВР и Јавното обвинителство навреме преземаа соодветни активности, покажаа посветеност и професионалност на високо ниво. Очекуваме во најкраток можен рок сите сторители и инволвирани да бидат изведени пред лицето на правдата и да понесат одговорност за злосторството кое го потресе целото наше општество.“ пишуваат од СДСМ

Свет

Високиот Суд во Лондон одлучува за екстрадиција на Асанж во САД

Џулијан Асанж денеска ќе се соочи со следната фаза од неговата правна битка околу екстрадицијата во САД пред Високиот суд во Лондон, јави ДПА.

На основачот на Викиликс му се заканува екстрадиција во САД поради наводен заговор за добивање и откривање информации за националната одбрана по објавувањето на стотици илјади протечени документи во врска со војните во Авганистан и Ирак.

За време на дводневното рочиште во февруари, адвокатите на 52-годишникот побараа дозвола за да го оспорат отфрлањето на поголемиот дел од неговиот случај од страна на судиите за да се спречи негова екстрадиција.

Во март, судиите Викторија Шарп и Џастис Џонсон ги отфрлија повеќето правни аргументи на Асанж, но рекоа дека доколку САД не дадат гаранции, тој ќе може да поднесе жалба по три основи.

Гаранциите се однесуваа на тоа дека Асанж ќе биде заштитен и ќе му биде дозволено да се потпре на Првиот амандман – кој ја штити слободата на говорот во САД – дека нема да има „предрасуди при судењето“ поради неговата националност и оти нема да има смртна казна.

Минатиот месец, двајцата судии потврдија дека САД му дале гаранција на судот и го закажаа сослушувањето за денеска кога се очекува адвокатите на САД и Асанж да изнесат аргументи за гаранциите.

Доколку судиите утврдат дека гаранциите се задоволителни, се очекува да биде одбиена можноста на Асанж за конечна жалба во Велика Британија, и ќе биде наредена негова екстрадиција.

Доколку гаранциите не се сметаат за задоволителни, на Асанж ќе му биде дозволено да ја поднесе жалбата до Високиот суд.

Сослушувањето пред Викторија Шарп и Џастис Џонсон ќе почне денеска во 10.30 часот по локално време.

Македонија

Едно лице загина, две се повредени во сообраќајка на автопатот Куманово-Скопje

Едно лице загина, две се повредени во сообраќајка што се случи вчера на автопатот Куманово-Скопје.

Едно лице го загуби животот во сообраќајна несреќа што се случи вчера на автопатот Скопје-Куманово во атар на Агино село, а две лица се повредени, соопшти денеска МВР.

- Вчера околу 15:00 часот во СВР Куманово било пријавено дека на автопатот Скопје – Куманово, атар на село Агино село, Кумановско, патничко возило „субару импреза“ со кумановски регистарски ознаки, управувано од шеесет и четиригодишниот И.А. од Куманово, излетало од коловозот. Од здобиените повреди на местото на несреќата починал сопатникот Б.Н. од Куманово, а лекар од Итна медицинска помош Куманово констатирал смрт, соопшти МВР.

Возачот И.А. и сопатничката Д.Н. се здобиле со телесни повреди констатирани во општа болница Куманово. Извршен бил увид од увидна екипа на СВР Куманово и јавен обвинител, по чија наредба телото на починатиот било предадено на обдукција. На сообраќајната несреќа интервенирала и противпожарна единица.

Свет

ЕУ изрази сочувство за смртта на иранскиот претседател

Претседателот на Европскиот совет Шарл Мишел изрази сочувство во име на Европската унија по смртта на иранскиот претседател Ебрахим Раиси во хеликоптерска несреќа.

- ЕУ го изразува своето искрено сочувство за смртта на претседателот Раиси и министерот за надворешни работи Абдолахиан, како и другите членови на нивната делегација и екипажот во хеликоптерска несреќа, напиша Мишел на Х.

- Нашите мисли се со семејствата, додаде тој.

Раиси и иранскиот министер за надворешни работи Хосеин Амирабдолахиан беа меѓу деветте лица кои загинаа кога нивниот хеликоптер се урна во планинскиот северозападен дел на Иран при лоши временски услови.