Доколку не се најде заеднички јазик, повлечениот Закон за средно образование ќе биде вратен и без одредбата за интонирање на државната химна во училиштата – вели министерката за образование Весна Јаневска. Според неа приоритетно е да се спроведат посуштински реформи во образованието кои би произлегле од останатите одредби, но остава простор за дискусија на темата. Според неа целта на иницијативата за интонирање на химната не била да се разгорат меѓуетнички тензии, како што тоа било толкувано од страна на опозициската ДУИ.

„ За жал партијата ДУИ го искористи тоа на најнесоодветен начин за да ги вметне политичките и етничките проблематики во законот за образование. Нема да дозволам такво нешто да се случува затоа законот е повлечен. Ќе продискутираме уште малку на таа тема, но доколку не најдеме заеднички јазик важно е да поминат суштинските реформи во средното образование и законот ќе биде вратен и без таа одредба ако тоа биде неопходно.“

Јаневска оствари средба со претставници од сојузот на средношколци и националното студентско тело, по која соопшти дека денеска ќе бидат исплатени 120 милиони денари на ЈСП за бесплатниот студентски превоз. Јаневска соопшти и дека на крајот на месецот ќе биде распишан оглас за сите потребни учебници за идната учебна година. Со измени во повлечениот Закон за средно образование најави и нов модел на матура, која годинава ќе се полага во универзитетските амфитеатри. Во МОН се прават и анализи за проширување на опсегот на студентскиот оброк и зголемување на неговата сума на 160 денари.

„Оние кои што ќе полагаат средна стручна матура ќе можат без приемен испит да се запишат на сродните нивни факултети. Пример од електро машинско училиште и на машински и на електро, но ако сакаат да се запишат на медицина или филозофија тие ќе треба да полагаат државна гимназиска матура. Дел од студентите кои се вкучени на пазарот на труд по минимални цени би требало да добијат студентски оброк, во МОН има големо расположение и волја тоа да се оствари. Мислам дека до крајот на овој месец или евентуално во февруари ќе ги имаме и тие анализи и ќе седнеме да се договориме за сето тоа. “

Меѓу барањата на студентите и средношколците се и воведување на кариерно советување, овозможување на студентска работа во текот на студиите, дигитализација на учебниците и на картичките за превоз од ЈСП.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.