Европската куќа на фудбалот, УЕФА денеска ќе одржи вонреден состанок за да добие првичен одговор на контроверзниот план на ФИФА и нејзиниот претседател Џани Инфантино за продажба на дел од комерцијалните права за Светското првенство на приватни инвеститори.

Според британските медиуми, ФИФА испратила писмо до сите свои членови во кое бара од нив да се изјаснат дали го прифаќаат предлогот до 19 септември.

Федерациите што го поддржуваат планот треба веднаш да ја добијат првата уплата од 20 милиони долари од вкупниот пакет вреден 40 милиони долари.

УЕФА остро реагираше, велејќи дека овој потег покажува „сè што треба да се знае за овој план“, откако претходно изјави дека ФИФА „преминала црвена линија“.

Голем број национални сојузи, вклучително и Фудбалскиот сојуз на Англија, се незадоволни бидејќи за предлогот дознале само преку медиумите.

Според Би-би-си, планот предвидува продажба на удел од 20 отсто во натпреварувањата на ФИФА на инвестицискиот фонд „Thrive Eternal“, зад кој стои американскиот инвеститор Џошуа Кушнер.

Ставот на противење кон УЕФА го делат азиската, јужноамериканската, како и северноамериканската и централноамериканската конфедерација, додека некои сојузи сметаат дека предлогот би можел да донесе финансиски придобивки за помалите фудбалски земји.

Од ФИФА велат дека целта на проектот е обезбедување дополнителни средства за развој на фудбалот ширум светот – од изградба на инфраструктура и зајакнување на националните тимови, до инвестирање во младинскиот и женскиот фудбал.

„Ова е можност, а не обврска. Сакаме да го забрзаме развојот на фудбалот на глобално ниво“, изјави Инфантино.

Сепак, реакциите на фудбалската јавност се претежно негативни.

Асоцијацијата на европски лиги оцени дека „Светското првенство не е на продажба“, додека фудбалскиот сојуз ФИФПРО предупреди дека вклучувањето на приватен капитал може трајно да го промени начинот на кој функционира најважното фудбалско натпреварување.

Претседателот на Ла Лига, Хавиер Тебас, го обвини Инфантино дека со овој потег се обидува да обезбеди поддршка пред следниот Конгрес на ФИФА, додека потпретседателот на Германската фудбалска асоцијација, Ханс-Јоаким Ваке, го нарече планот „директен напад врз фудбалот“.

Се очекува одлуките на вонредниот состанок на УЕФА да имаат големо влијание врз понатамошниот развој на настаните и иднината на Светското првенство.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Ребалансот на Буџетот за 2026 година е доказ дека Владата предводена од ВМРО-ДПМНЕ работи одговорно и ги насочува средствата таму каде што носат најголем ефект. Наместо кратење на развојот како во времето на СДС и ДУИ, сега се инвестира во иднината.

Вкупните приходи се зголемуваат за 4 милијарди и 575 милиони денари, или 1,2 проценти, и достигнуваат 379,5 милијарди денари. Вкупните расходи се зголемуваат за 11,6 милијарди денари, или 2,8 проценти. Точно, дефицитот се зголемува и изнесува 4,1 процент од БДП. Но поважно е каде одат дополнителните средства.

Капиталните расходи се зголемуваат за 5 милијарди и 814 милиони денари, односно за 14,5 проценти. Развојните потпрограми растат за 4 милијарди и 215 милиони денари и достигнуваат повеќе од 41 милијарда денари.

СДС повторно се обидува да ја сведе дебатата на една бројка, дефицитот. Но граѓаните имаат право да ја знаат целата вистина. Секој денар од дополнителниот фискален простор е насочен кон инвестиции што создаваат работни места, ја движат економијата и оставаат трајна вредност. Тоа е одговорна економска политика, а не популизам.

Тоа не се бројки на хартија. Тоа се нови патишта, железничка инфраструктура, водоводи, канализации, училишта, градинки, здравствени установи, проекти за животната средина и инвестиции во општините.

Разликата е едноставна. ВМРО-ДПМНЕ зборува за тоа што ќе се изгради, додека во минатото СДС и ДУИ потрошија милионски буџети од кои граѓаните не видоа ништо.

СДС нема ниту еден предлог како да се забрза развојот. Единствено што нуди е ширење страв и манипулација.

Граѓаните не живеат од политички прес-конференции на СДС. Живеат од подобри патишта, поквалитетни училишта, модерни болници, сигурно водоснабдување и нови инвестиции. Токму тоа го обезбедува овој ребаланс.

Овој ребаланс ќе се мери по завршените проекти, а не по прес-конференциите на СДС.

Со почит,

Центар за комуникации на ВМРО-ДПМНЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Во силна конкуренција на најталентираните ученици од Европа и пошироко, нашиот Зоран Илијоски од Кичево освои бронзен медал, а професорот Миле Јованов беше избран за претставник во управувачкиот комитет на олимпијадата.

Македонија на ова престижно меѓународно натпреварување беше претставена од тим составен од четворица натпреварувачи: Зоран Илијоски, Јаков Грујовски, Иан Стевков и Панче Бансколиев. Тим-лидери на македонската делегација беа д-р Миле Јованов и д-р Емил Станков од Факултетот за информатички науки и компјутерско инженерство (ФИНКИ). Учениците кои ја претставуваа Македонија на ЕЈОИ 2026 беа избрани преку целогодишниот циклус натпревари што традиционално го организира Здружението на информатичарите на Македонија (ЗИМ), а кој оваа година се одржа по 37-ми пат. Натпреварите се реализираат преку системот mendo.mk, кој е достапен во текот на целата година за сите заинтересирани ученици. И годинава циклусот беше организиран со поддршка на Факултетот за информатички науки и компјутерско инженерство (ФИНКИ), како и на неколку општествено одговорни компании кои континуирано го поддржуваат развојот на младите информатичари: Сорсикс, Нетцетера и Семос Едукација.

Европската јуниорска олимпијада по информатика (ЕЈОИ) претставува едно од најзначајните меѓународни натпреварувања во алгоритамско програмирање за ученици до 15,5 години. Секоја земја-учесник на ЕЈОИ учествува со тим составен од 4 натпреварувачи, тим-лидер и заменик лидер. Натпреварувачите решаваат комплексни алгоритамски задачи во текот на два натпреварувачки дена, при што се оценуваат нивните способности за анализа на проблеми, дизајн на алгоритми и имплементација на ефикасни програмски решенија. На ЕЈОИ 2026 учествуваа вкупно 100 ученици од 25 европски земји. Годинешното издание на олимпијадата се одржа во Каунас, Литванија, но за прв пат во историјата како коорганизација на две земји: Литванија и Украина. Вкупен победник на натпреварот со освоен златен медал беше Андреј Немцишор од Романија.

Освоениот бронзен медал претставува продолжување на континуитетот на успешни настапи на македонските ученици на најпрестижните меѓународни олимпијади по информатика. Особено охрабрува фактот што Зоран Илијоски беше на само триесетина поени од освојување на сребрен медал, што дополнително ја потврдува конкурентноста на македонските ученици во европски рамки.

Следната, 11-та по ред, Европска јуниорска олимпијада по информатика (ЕЈОИ 2027) ќе се одржи идната година во Казахстан. Следен настан пак, кој им претстои на македонските ученици – информатичари, е Интернационалната олимпијада по информатика (ИОИ 2026), која ќе се одржи од 9-ти до 16-ти август во Ташкент, Узбекистан.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.