Македонија

Извршени над 2.220 инспекциски надзори, некои угостители работеле и на полициски час

Клуч на врата за 5 угостителски објекти во Кичево, Охрид, Тетово и Струмица, по вонредните 3000 надзори во последните неколку дена, информираше претседателката на Инспекциски совет, Магдалена Филиповска Грашкоска

Два од овие објекти, од Охрид и Струмица заработија и кривични пријави за непочитување на мерките на Владата за заштита од корона вирусот. Во некои трговски објекти не се почитувале и замрзнатите цени на производите. Трудовите инспектори констатирале дека најголемиот дел од работодавачите ги применуваат препораките за платено отсуство.

Во Тетово и Гостивар се забележани собири на луѓе во угостителски објекти за време на полициски час, што е недозволиво, велат од Пазарниот инспекторат. Претседателот на инспекторатот Пауновски апелира угостителите да не ги отвораат објектите додека не се укине забраната за работа со нова одлука од Владата во Службен весник,.

Инспекторите од Агенцијата за храна и ветринарство влегле во маркети, продавници, пазари, месарници. Еден од трговските објекти заработил прекршочен платен налог заради промет со небезбедни производи, а имало и такви со лоши хигиенски услови.

Инспекциските служби ќе продолжат да функционираат со полн капацитет за заштита на населението од вирусот велат од Советот. Освен заштитата на работничките права, храната и лековите, инпекторите ќе проверуваат дали и како се запазуваат редот и дисциплината во трговските објекти.

Фудбал

Ван Дајк цел на голем број врвни клубови

Дефанзивецот на Ливерпул, Вирџил ван Дајк би можел да го напушти тимот од „Енфилд“. За фудбалерот се заинтересирани неколку големи клубови, пренесува новинарот Екрем Конура.

Самиот фудбалер би сакал да го продолжи договорот со својот тим.

Според Конура, за фудбалерот се заинтересирани Милан, Интер, Атлетико, Ал-Хилал и Ал-Наср, а пријавен е интерес и од екипи од Премиер лигата.

Триесет и двегодишниот Ван Дајк игра за Ливерпул од почетокот на 2018 година. Актуелниот договор на Холанѓанецот е до крајот на следната сезона.

Во тековната сезона Ван Дајк одигра 34 натпревари во Премиер лигата на кои постигна два гола и две асистенции.

На две кола до крајот на сезоната во Премиер лигата, Ливерпул е трет на табелата со 78 бодови, зад лидерот Арсенал кој има 83 и Манчестер сити кој собра 82 бода и има натпревар помалку.

Свет

Антонов: Вежбите со нуклеарно оружје се принуден руски одговор на западната реторика

Претстојните вежби со нуклеарно оружје се принуден руски одговор на западната реторика, изјави рускиот амбасадор во Вашингтон Анатолиј Антонов.

-Ова е принудна мерка како одговор на арогантната и агресивна политика на колективниот Запад, кој создава неприфатливи безбедносни закани за Русија и нејзините граѓани, рече Антонов, пренесен од руските медиуми.

Амбасадорот додаде дека САД и нивните сојузници се повеќе ја снабдуваат Украина со смртоносно оружје, што украинските сили можат да го користат за да извршат напади на руска територија.

Генералштабот на руските вооружени сили започна со подготовки за вежби за употреба на нестратегиско нуклеарно оружје, соопшти вчера руското Министерство за одбрана.

Маневрите ќе се одржат во блиска иднина и во нив ќе учествуваат и воздухопловните сили и морнарицата. Цел на вежбите е да се одржи подготвеноста на персоналот и опремата на единиците за борбена употреба на нестратегиско нуклеарно оружје за одговор и обезбедување на територијалниот интегритет и суверенитет на државата, соопшти руското Министерство.

Свет

Најмалку десет загинати во несреќа во Перу, автобус излетал од патот и се превртел

Најмалку 10 лица загинаа кога патнички автобус излетал од патот и се превртел во областа Пуно во јужниот дел на Перу, јавија локалните медиуми.

Меѓуградскиот автобус сообраќал на релација Пуно-Куско кога се случила несреќата, јави државната новинска агенција Андина.

Во автобусот имало 24 патници, а меѓу жртвите има и шестмесечно бебе, соопшти полицијата.

Државната телевизија објави дека повредените, од кои некои со сериозни повреди, биле пренесени во блиските болници.

Причината за несреќата ќе биде позната по истрагата.