Ова, вклучително и потребата од напредок во владеењето на правото, се клучните наоди од извештајот на Европската Комисија за напредокот на земјава, објавен попладнево. Во заклучоците од документот, се нотира и потребата за доследно спроведување на договорите со соседите.

-Не се направени обиди за усвојување на релевантните уставни измени наведени во Заклучоците на Советот од 18 јули 2022 година, кои земјата се обврза да ги започне и постигне, со цел да се обезбеди дека Уставот ги опфаќа граѓаните кои живеат во границите на државата и кои се дел од други народи, како што се Бугарите. се вели во извештајот на Комисијата.

Поконкретна од она што во документот го спакува Комисијата, попладнево беше еврокомесарката за проширување Марта Кос, сублимирајќи ги накусо извештаите на сите земји кандидатки за членство пред Комитетот за надворешни работи во Европскиот Парламент. Вметнувајќи ја земјава во групата со Србија и Босна и Херцеговина, наспрема Црна Гора, Албанија, Украина и Молдавија, Кос порача дека земјава не направила решителни чекори за напредок.

-Македонија продолжи со целосното усогласување со заедничката надворешна и безбедносна политика и техничката подготовка за Патоказот и Акцискиот план поврзан со Кластерот 1. Но, земјата на презеде решителни чекори за напредок во пристапниот процес измината година. Треба да го смени Уставот, согласно заклучоците на Советот од 2022, како би напредувала кон патот на ЕУ. , изјави Марта Кос, еврокомесарка за проширување.

Во извештајот се посочува дека властите продолжиле да работат на реформските патокази во областите на владеење на правото, јавната администрација и демократските институции, како и на акцискиот план за заштита на малцинствата, но повторно се нагласува потребата од натамошен напредок во сферата на судството и борбата со корупцијата, каде како што се наведува нема никаков напредок. Во контекст на корупцијата се споменува и трагедијата во Кочани.

Корупцијата останува распространета во многу области и е прашање што предизвикува сериозна загриженост. Трагедијата од 16 март 2025 година во Кочани, за време на која пожар изгоре во клуб, откри трајни системски предизвици во врска со спроведувањето на антикорупциските мерки. Превентивните мерки и ефикасното потиснување на корупцијата треба да се подобрат.

Целокупната независност и финансиска автономија на судството е поткопана од мешањето и притисокот од другите државни гранки, вклучително и обидите на Парламентот да изврши притисок врз членовите на Судскиот совет да поднесат оставка, како и ограничените доделени финансиски ресурси. Недостатокот на персонал во судството е загрижувачки бидејќи влијае на квалитетот и ефикасноста на правосудниот систем., се вели во извештајот.

Во однос на другите кандидатки за членство, се нотира дека Црна Гора постигнала најголем напредок, ги отворила сите 33 преговарачки поглавја, од кои седум се времено затворени.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.