Свет

Израелскиот шеф на дипломатијата: На Гутереш да му се збрани да стапне во Израел

Израелскиот министер за надворешни работи, Израел Кац, денеска изјави дека му забранува влез во земјата на генералниот секретар на ОН, Антонио Гутереш, бидејќи не „недвосмислено“ го осудил иранскиот ракетен напад врз Израел.

„Секој кој не може недвосмислено да го осуди грозоморниот напад на Иран врз Израел, како што тоа го направи речиси секоја земја во светот, не заслужува да стапне на израелска почва“, рече Кац, пренесе Ројтерс.

Кац додаде дека Израел ќе продолжи да ги брани своите граѓани и да го штити своето национално достоинство, „со или без Антонио Гутереш“.

Бидејќи не зборуваше против Иран, Гутереш е „непожелна личност“ во Израел, заклучи израелскиот министер.

Иран вчера истрела повеќе од 180 балистички проектили врз Израел додека ескалираа судирите меѓу Израел и либанската група Хезболах, поддржана од Иран.

По нападот, Гутереш даде кратка изјава во која зборувал само за „последните напади на Блискиот Исток“ и ја осуди „ескалацијата“ на конфликтот.

Свет

Се урна зграда во Бејрут по нападите на Израелците, бројот на жртвите постојано расте (ВИДЕО)

Во два израелски воздушни напади што го погодија центарот на Бејрут оваа вечер, се урна станбена зграда, изјави за Си-Ен-Ен извор од либанските безбедносни сили.

Либанското министерство објави дека има најмалку 18 загинати во нападот во областа Баста. Оригиналните информации беа 11 загинати.

Најмалку 92 лица се ранети.

Ранетите во израелскиот напад во центарот на Бејрут се донесени во Американската универзитетска болница. Сè уште пристигнуваат возила за итна помош.

Една жена надвор од болницата, која не сакала да биде именувана, рече дека била во зградата до експлозијата и ја слушнала детонацијата. Таа рече дека еден од нејзините роднини се здобил со повреди на главата и се наоѓа во болница каде го шијат, пренесува Би-би-си.

Жената вели дека погодената зграда била целосно станбена, и имала околу четири-пет ката.

Горна Баста, населбата во која беше погодена високата зграда, е густо населена област каде стотици луѓе се засолниле по интензивните израелски напади во јужен Бејрут и други делови на Либан во последните неколку недели.

Запрашани за коментар, ИДФ рече дека ги истражуваат извештаите.

Израелските одбранбени сили (ИДФ) издадоа „итно предупредување“ до жителите на Харет Хреик, во јужните предградија на Бејрут, барајќи од нив да се евакуираат по нападот во населбата Баста.

Портпаролот на ИДФ вели дека областа е блиску до „објектите и интересите на Хезболах и ИДФ ќе оперира против нив во блиска иднина“.

„За ваша безбедност и безбедноста на членовите на вашето семејство, мора веднаш да ја напуштите оваа зграда и соседните згради и да се оддалечите од неа на растојание од најмалку 500 метри“, додаде портпаролот на ИДФ.

Свет

Осум лица загинаа во руски напад врз Одеса

Руски проектили погодија цивилен контејнерски брод во важното украинско пристаниште Одеса, при што загинаа осум лица.

„Ова е трет напад врз цивилен брод во последните четири дена“, рече регионалниот гувернер Олех Кипер, кој го опиша како „уште едно злосторство на подмолниот непријател“.

Тој рече дека цел на Русија била пристанишната инфраструктура и дека сите жртви се Украинци. Од повредите во болница починале 46-годишен вработен во пристаништето и уште еден 26-годишен маж, додека неколку лица се повредени. Бранот напади врз украинските пристаништа на брегот на Црното Море се совпадна со европската турнеја на претседателот Володимир Зеленски, кој ги посети лидерите во Лондон, Париз и Рим.

Во Даунинг стрит, тој се состана со британскиот премиер Сер Кир Стармер и новиот генерален секретар на НАТО, Марк Руте, кој оваа недела предупреди дека Украина може да се соочи со својата најлоша зима од почетокот на сеопфатната руска инвазија во 2022 година.

Зеленски утре требаше да се сретне со американскиот претседател Џо Бајден и другите западни сојузници во Берлин, но Бајден го откажа своето патување поради заканата од ураганот Милтон во САД. Тоа е значаен удар за Украина бидејќи доаѓа на помалку од еден месец пред изборите во САД и со зголемената загриженост за континуираната поддршка од клучните сојузници.

Сепак, Зеленски се обиде да го минимизира разочарувањето пред патувањето во Лондон. „Секој лидер во слични околности би останал во својата земја“, им рече тој вчера на новинарите во Хрватска. Тој очекува дека наскоро ќе биде подготвен нов распоред за лидерската средба.

Зеленски утре ќе се сретне со папата Франциск во Ватикан пред да замине за Германија.

Свет

Договорен е прекина на борбите во Газа

Конфликтите во Појасот Газа ќе бидат прекинати за да се овозможи вториот круг на вакцинација против детска парализа, со кој ќе бидат опфатени 590.000 деца помлади од 10 години, објави денеска директорката на УНИЦЕФ, Кетрин Расел.

Хуманитарната пауза во конфликтите ќе започне на 14 октомври, рече Расел, пренесе Ројтерс.

„Од клучно значење е сите страни да ги почитуваат овие хуманитарни паузи. Без тоа, ќе биде невозможно да се вакцинираат децата“, додаде таа.

Првиот круг од кампањата за вакцинација, која започна на 1 септември, ја достигна целта на 90 отсто од децата до 10 години, објавија ОН.

Првиот круг беше изведен во фази во текот на две недели за време на хуманитарни прекини во борбите меѓу израелската армија и палестинското милитантно движење Хамас, потсетува Ројтерс.

СЗО во август потврди дека бебе било делумно парализирано од вирусот на полио тип 2, што е прв таков случај на палестинските територии во последните 25 години.

„УНИЦЕФ ќе вклучи додатоци на витамин А за зајакнување на имунолошкиот систем на децата. Децата во Газа живеат во исклучително лоши хигиенски и санитарни услови“, рече Расел.

Таа посочи дека успехот на првиот круг на вакцинација покажал дека кога ќе се испочитува договорот, може да се заврши работата.

притисни ентер