Свет

Израел пресретна уште една флотила што носеше помош за Газа, притвори десетици активисти

Флотилата „Глобал Сумуд“ од околу 50 бродови претходно беше пресретната и околу 450 активисти, вклучувајќи ги европските пратеници и климатската активистка Грета Тунберг, беа приведени.

Израелската војска рано утрово во Средоземното Море пресретна флотила од девет бродови што се обидуваа да ја пробијат поморската блокада на Газа од страна на Израел и притвори десетици активисти на бродот, соопштија организаторите на флотилата и израелското Министерство за надворешни работи.

Флотилата „Глобал Сумуд“ од околу 50 бродови претходно беше пресретната и околу 450 активисти, вклучувајќи ги европските пратеници и климатската активистка Грета Тунберг, беа приведени.

Повеќето од тие активисти се депортирани, а шест од Норвешка, Мароко и Шпанија остануваат во израелски притвор, изјавија нивните адвокати.

Организаторите на флотилата што беше пресретната денеска ги осудија новите притворања како „произволни и незаконски“.

Меѓу оние што беа земени од бродовите беа лекари, најмалку четири членови на Европскиот парламент и други пратеници од Турција, Данска, Франција и Белгија.

Списокот на патници објавен на веб-страницата на флотилата вклучува двајца израелски државјани.

Флотилата носела храна и медицинска помош наменета за болниците во Газа.

Организаторите изјавија дека флотилата била пресретната на околу 120 наутички милји од брегот на Газа. Камерите на бродовите, голем патнички брод и осум помали едрилици, ги емитуваа пресретнувањата во живо. Никој не беше повреден.

Турција остро го осуди последното пресретнување на Израел во меѓународни води, нарекувајќи го „чин на пиратство“. Турското Министерство за надворешни работи денеска изјави дека тоа е сериозно кршење на меѓународното право и го обвини Израел за ескалација на тензиите и поткопување на мировните напори.

Турција започна дипломатски напори за обезбедување итно ослободување и безбедно враќање на своите граѓани и се координира со други земји во врска со статусот на другите активисти, се вели во соопштението.

Тагови: Израел флотила

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Здравје

Клековски: Продолжува намалувањето на бројот на новопрегледани пациенти во болницата и во здравствениот дом во Гостивар

Во Општа болница Гостивар се регистрирани 111 нови прегледи на инфективното одделение, 65 нови прегледи на педијатриското одделение и 7 прегледи во Ургентниот центар, односно вкупно 183 прегледи.

Според податоците од јавните здравствени установи во Гостивар, во текот на вчерашниот ден (20.07.2026 година) продолжува трендот на намалување на бројот на новопрегледани пациенти, односно лица кои првпат побарале лекарска помош поради симптоми на гастроентеритис.

Во Општа болница Гостивар се регистрирани 111 нови прегледи на инфективното одделение, 65 нови прегледи на педијатриското одделение и 7 прегледи во Ургентниот центар, односно вкупно 183 прегледи.

Во Здравствениот дом Гостивар се евидентирани 110 прегледи, како и 25 повици до Итната медицинска помош.

-Во текот на вчерашниот ден вкупниот број пациенти прегледани во болницата е намален за 38 проценти. Во споредба со 19.07.2026 година, кога во Општата болница Гостивар беа регистрирани 289 прегледи, вчера се евидентирани вкупно 183 прегледи. Истовремено, бројот на прегледи во здравствениот дом продолжува континуирано да опаѓа – од 315 пациенти на 18 јули, на 275 пациенти на 19 јули и 110 пациенти на 20 јули, појаснува министерот за здравство, Сашо Клековски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Во Украина се засилуваат повиците за смена на шефот на војската, Зеленски се сретна со негови можни замени

Украинскиот претседател Володимир Зеленски се сретна со некои од највисоките команданти на украинската војска, во обид да го смири растечкото незадоволство од раководството на одбраната

Украинскиот претседател Володимир Зеленски се сретна со некои од највисоките команданти на украинската војска, во обид да го смири растечкото незадоволство од раководството на одбраната, што ги предизвика најголемите улични протести од почетокот на руската инвазија во 2022.

И покрај воената состојба, илјадници луѓе излегоа на улиците во Киев и други градови неколку дена по ред за да протестираат против смената на министерот за одбрана Михајло Федоров и да побараат разрешување на шефот на војската олександр Сирски.

Тој се соочува со критики од граѓанското општество, војниците и пратениците поради неговото командување и тактиките со голем број жртви.

Зеленски се сретна со петмина генерали и еден полковник, кои политичките аналитичари ги сметаат за потенцијални замени за сирски, при што со секого одделно разговарал за ситуацијата на бојното поле.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

МВР демантира дека жртвите биле бркани од „лажна полиција“

Министерството за внатрешни работи ги демантира информациите што се појавија во дел од медиумите, а се однесуваат на сообраќајната несреќа на патот ГП Блаце – Скопје во која загинаа три лица.

Од МВР велат дека се неточни тврдењата дека возилото во кое се наоѓале жртвите било бркано од друго возило што лажно се претставувало како полиција, како и дека вакви случаи биле забележани и претходно.

„Апелираме да не се шират непроверени информации и дезинформации. Ниту е евидентирана појава на таканаречена лажна полиција, ниту има пријави за такви случаи“, информираат од министерството.

Од МВР додаваат дека истражните органи продолжуваат со работата и ќе ги утврдат сите околности и причините што довеле до трагичната сообраќајна несреќа.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.