Култура

Изложба на слики од ликовниот уметник Владимир Темков во Чифте амам

Изложба на слики од ликовниот уметник Владимир Темков од Кавадарци, беше отворена синоќа во галеријата на Чифте амам, во Старата скопска чаршија.  

Претседателката на македонското Друштво на ликовни уметници, Јана Манева Чупоска, ја нарече оваа ретроспективна изложба, „Патување низ времето“. Со неа, авторот прикажува 45 години творештво.

- Делата во оваа изложба за мене претставуваат еден вид на патување низ времето. Преку оваа изложба сите заедно патуваме низ времето, креирано од авторот, во неговиот уметнички универзум, рече меѓу другото таа, нагласувајќи ја силната фантазија, без која не може ниту еден уметник, ниту едно сликарство.

Способноста да се креираат нови имагинарни светови, е, всушност, според неа, силниот ликовен потпис, што Темков го гради веќе 45 години.

- Јас ги слушам птиците на Темков. Ги има во своите дела. Го слушам жуборот на водата. Го слушам и тивкиот шепот на дрвјата, рече претседателката на ДЛУМ.

Манева Чупоска нагласи дека припадноста на творештвото на Темков кон експресионизмот со навидум апстрактни слики и форми, сепак ја препознава личната авторска експресија.

Според неа, се работи за еден пристап, на едно сериозно аналитичко сликарство, што е пред сѐ слоевито, не ви дозволува како гледач само да прошетате на пола секунда пред самото дело, потребно е долго гледање на сликите, за да можете да ги забележите сите ликовни изненадувања.

Таа рече дека со задоволство споделува, дека после 75 години, друштвото конечно се вдоми, во прекрасен простор, благодарение на Министерството за култура. Тоа, како што нагласи, е историски момент. А, токму Темков е поранешен потпретседател на ДЛУМ и таа додаде дека има голем влог во друштвото.

Пензионираниот универзитетски професор Кирил Темков се осврна на животот и делото на уметникот. Тој рече дека сликите од изложбата се само мал дел од сето она што го има создадено уметникот. Професорот потсети дека авторот на изложбата има напишано и книга за своето творештво, „Драга уметност“.

Авторот на изложбата, чии слики пред неколку дена беа изложени и во Њујорк, се заблагодари за можноста да ги претстави своите дела, до сите што учествуваа во организацијата на настанот. /МИА

Македонија

Пендаровски: Понудата на Мицкоски за коалицирање е знак на слабост

Кандидатот за претседател Стево Пендаровски вечерва од Бутел рече дека е легитимно и дека е демократски избор секој да коалицира со кого сака. 

Но, понудата на претседателот на ВМРО-ДПМНЕ, Христијан Мицкоски за коалицирање со неговата партија, уште на првиот ден од кампањата за парламентарни избори, покажува дека тој бара помош.

„Ние среде кампања не бараме помош од пријател. Мене ми се чини дека тоа е јасен знак на слабост, затоа што господинот Мицкоски знае што го очекува на 24 април и на 8 мај. Инаку зошто би барал помош од страна?“, рече Пендаровски, соопштуваат од неговиот тим.

Македонија

Портокалова велосипедска тура, изложба на карикатури и холандски пазар на Деновите на Холандија

По повод националниот ден на Холандија – Денот на Кралот, Амбасадата заедно со своите партнери го отвори второто издание на „Денови на Холандија“ во Ист Гејт Мол во Скопје. 

Амбасадорот Дирк Јан Коп и извршниот директор на Ист Гејт Мол Игор Давков ги пречекаа посетителите со посебно искуство кое вклучуваше портокалова велосипедска тура, изложба на декорирани велосипеди, филмови во виртуелна реалност и холандски пазар.

Настанот започна со симболична портокалова велосипедска тура и изложба на велосипеди декорирани од средношколци од Скопје во организација на Гоу грин – Биди зелен. Покрај автентичните холандски производи во понудата на холандскиот пазар беа вклучени и локални продукти произведени со холандска технологија.

Во рамките на отворањето амбасадорот Коп ги објави и победниците на регионалниот натпревар за карикатури организиран од холандското Министерство за надворешни работи и организацијата Картун мувмент. Независно жири составено од претставници од сите шест држави од Западен Балкан ја додели првата награда на Душан Перишиќ од Србија а втората награда на Арменд Ајредини од Македонија.

Холандскиот пазар ќе биде отворен овој викенд (19-21 април) од 12:00 до 18:00 часот. Изложбата на карикатури може да се посети до крајот на април.

Свет

Германската шефица на дипломатијата во кавга со Нетанјаху за снимките од пазарот во Газа

Германската министерка за надворешни работи Аналена Баербок и израелскиот премиер Бенјамин Нетанјаху се судрија за време на состанокот во Ерусалим околу хуманитарната помош за Појасот Газа, пренесоа германските медиуми.

Баербок и Нетанјаху се судрија околу тоа дали жителите на Појасот Газа имаат доволно храна на располагање. Нетанјаху ѝ покажа фотографии на Баербок, наводно од северниот дел на Газа, каде што се вели дека хуманитарната криза е најлоша, а на кои што се гледаат пазари преполни со овошје, зеленчук и други прехранбени производи.

Како одговор, Баербок на својот мобилен телефон покажа фотографии од прегладнети деца од Појасот Газа и рече дека фотографиите што ги покажал Нетанјаху не се вистинити.

Според израелската ТВ станица Канал 13, израелскиот премиер рекол: „Ние не сме нацисти“, алудирајќи на пропагандните филмови на националсоцијалистичкиот режим кои сугерираа изобилство и добри услови за живот во варшавското гето во 1942 година.

Нетанјаху рече дека фотографиите на кои се прикажани преполните пазари во Газа се од израелската државна канцеларија Когат, која е задолжена за контакти со Палестинците и хуманитарна помош. Германското Министерство за надворешни работи воздржано реагираше на медиумските написи и соопшти дека тие „не го одразуваат вистинскиот тон“ што преовладувал за време на разговорите.

Според овие информации, Баербок, која вчера престојувала во Израел за да укаже на лошата хуманитарна состојба во Појасот Газа и да се бори за поголема помош, не му замерила на Нетанјаху дека фотографиите што ги има се лажни, туку дека не одговараат на севкупна слика за состојбата на цивилите во Газа.

притисни ентер