Култура

Изложба на фотографии од Јана Луловска во Кавадарци

Во галеријата при Домот на културата „Иван Мазов-Климе“ од Кавадарци, синоќа беше отворена изложба на фотографии од авторката Јана Луловска, насловена „Корелација”. Изложбата се состои од 16 фотографии направени во необична техника, гумитипија.

- Станува збор за една од најстарите фотографски техники. Експериментална и аналогна техника. Процесот е многу бавен, се е рачна изработка. Се работи за хартија што не е фотографска, значи не е фотосензитивна. Се нанесува емулзија која е првенствено заштита на хартијата. Емулзијата се суши и потоа се нанесува друга емулзија, која е фотосензитивна, осетлива на светлина, појасни авторката.

Нагласи дела сето тоа се работи во апсолутна темница, со можна пригушена светлина.

- Кога ќе се исуши емулзијата, се експонира филмот и потоа се развива во чиста вода. Откако ќе се развие фотографијата, се суши и потоа се повторува истиот процес од почеток, се додека да се постигне последниот сакан ефект, за да се добијат сите различни тоналности, рече Луловска.

Таа информираше дека процесот е долг, едно развивање е триесетина минути.

- Наликува на акварел, тоа е првичното нешто што многу ме привлече мене како фотограф, тоа што самиот финален продукт не наликува на класична фотографија. Затоа што се работи со пигмент. Во самиот хемиски процес се користат хемикалии кои прават хемиска реакција и се зацртува сликата, но се користи и пигмент, за да се добијат различни бои, соопшти Луловска.

Во случајов таа ги користи црвената и сината боја. - Ги избрав, за да наликува на 3Д очила. Затоа што, концептуално , една од појдовните точки ми беше да го изразам самиот процес на гледање. Затоа се две исти копии на еден ист кадар. Ние луѓето добиваме информации од надворешниот свет преку две слики кои праќаат информација до мозокот. Мозокот ја преработува таа збирна информација и добиваме формирана слика, рече авторката на фотографиите.

Изложбата организирана од културниот дом и со поддршка на Министерството за култура и Младинскиот културен центар од Скопје, е во рамките на манифестацијата “Кавадаречка културна есен”.

Јана Луловска е родена во 1986 година во Скопје. Завршила уметничка и приложна фотографија на Националната Академија за театарска и филмска уметност „Крсто Сарафов" во Софија, Бугарија. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Предупредување во Полска: Воена авијација во состојба на готовност

Полска денеска започна превентивни операции на воената авијација и го подигна степенот на готовност на системите за противвоздушна одбрана и на радарите за извидување поради нападите со руски беспилотни летала врз Украина.

Полска денеска започна превентивни операции на воената авијација и го подигна степенот на готовност на системите за противвоздушна одбрана и на радарите за извидување поради нападите со руски беспилотни летала врз Украина, соопшти Оперативната команда на полските вооружени сили.

Како што е соопштено, преземени се мерки за заштита на полскиот воздушен простор, особено во областите што се граничат со зоните погодени од нападите. Активирани се потребните сили и средства, а системите за противвоздушна одбрана и радарско извидување се ставени во состојба на готовност.

Одлуката на Варшава уследи неколку дена откако руско беспилотно летало се урна на само четири километри од полската граница, погодувајќи бензинска пумпа на територијата на Украина.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

НБА

Браќата Томпсон испишаа историја во НБА – договори вредни 363 милиони долари

Младите кошаркари, Аусар и Ајмен Томпсон испишаа историја во НБА, станувајќи првите браќа кои потпишале договори во вредност од најмалку 100 милиони долари.

Вкупната вредност на нивните нови договори изнесува 363 милиони долари.

Кошаркарот на „Детроит Пистонс“, Аусар Томпсон, се договори за продолжување на договорот на пет години во вредност од 155 милиони долари, при што договорот е целосно загарантиран, пренесува ESPN.

Неговиот брат близнак, Амен, претходно овој месец потпиша петгодишен договор вреден 208 милиони долари со „Хјустон Рокетс“.

Браќата Томпсон пристигнаа во НБА во 2023 година. „Хјустон“ му укажа доверба на Амен избирајќи го како четврти пик на драфтот, додека „Детроит“ веднаш потоа, од петтата позиција, го избра Аусар.

Аусар беше избран во првата дефанзивна петорка на НБА минатата сезона, откако оствари просек од 9,9 поени, 5,7 скока, 3,1 асистенција и 2,0 украдени топки по натпревар – најмногу во лигата. Во гласањето за најдобар одбранбен играч во лигата, тој го зазеде третото место.

Тој исто така одигра одлични натпревари во плејофот, каде што оствари просек од 2,0 украдени топки и 1,8 блокади по натпревар на вкупно 14 средби.

Томпсон стана и првиот играч по Ентони Дејвис во 2020 година кој забележал најмалку 25 украдени топки и 25 блокади во една плејоф-серија. Ниту Ајмен не заостанува многу зад својот брат кога станува збор за одбраната.

Минатата сезона, тој беше избран во првата дефанзивна петорка на НБА-лигата, додека во нападот ги оствари најдобрите бројки во својата кариера.

Минатата сезона, тој имаше просек од 18,3 поени, 7,8 скока, 5,3 асистенции и 1,5 украдени топки по натпревар во дресот на Хјустон.

Браќата Томпсон уште во раната фаза од своите кариери обезбедија договори што ги вбројуваат меѓу најплатените млади играчи во НБА.

Тагови: НБА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Хаџиевска: Герасимовски и СДС се неспособни да се справат со наездата на глодари, а камоли да ја водат општина Центар

Не стивнуваат реакциите во јавноста дека глувци и стаорци ја преплавија Општина Центар. Секојдневно сме сведоци на живи или угинати глодари пред нашите влезови, училишта, паркинзи, тротоари и пешачки патеки.

Горан Герасимовски и неспособните кадри на СДС се на чекор да ја вратат општината во 15-ти век. Период засекогаш запомнет поради болестите кои ги пренесувале овие животни.

Мене, како мајка, особено ме загрижува последниот пример со инфестацијата кај основното училиште „Јохан Хајнрих Песталоци“. Вистински ризик за најранливите, ризик за здравјето на нашите најмили. Да не заборавиме дека во непосредна близина се наоѓа и градинката 13 ноември, со што во опасност се ставени и најмалите деца.

Градоначалникот Герасимовски е должен да одговори како ние, родителите, да ги пуштиме своите деца надвор да си играат, а притоа да не се сомневаме дека нема да дојдат во контакт со површини на кои се движат глувци и стаорци?

Должен е да одговори дали ја гарантира безбедноста и здравјето на учениците во „Песталоци“?

Важно е да се потсетиме дека според член 15 од Закон за Град Скопје, дератизација е надлежност на општините, па прашање е дали градоначалникот и Општина Центар потфрлаат во надлежностите и обврските со кои се задолжени.

Почитувани,

Ова не е случајно. Ова е резултат на мрзеливоста и неспособноста на Горан Герасимовски и неговите сопартијци.

Кадрите на СДС, по мерка на Зоран Заев и Венко Филипче, не знаат да се справат со глувци и стаорци, а камоли да водат општина.

Овие луѓе успеаја да направат да се срамиме од она во што се претвора нашата општина. Некомпетентни лица, проследени со секојдневни скандали, не смеат да раководат со срцето на градот!

Ана Хаџиевска, член на ОК Центар на ВМРО - ДПМНЕ

Со почит,

Центар за комуникации на ВМРО-ДПМНЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.