Некои луѓе заслужуваат титула за народен херој – овој човек е жив пример.
Еден жител на Индијанаполис, Роберт Дин, бил шокиран кога открил две бебиња оставени во ендек на само неколку чекори од неговиот дом. Неговата храброст и брзата реакција веројатно им ги спасила животите на овие неколкумесечни девојчиња, кои биле пронајдени во седишта за автомобил, оставени на милост и немилост.
Дин излегол од домот да провери дали му пристигнал пакетот, но наишол на сцена која длабоко го потресла. Двете девојчиња, за кои се покажало дека се братучетки, биле оставени надвор во ендек. Едното од нив неутешно врескало. Дин брзо ги зграбил седиштата и ги внел дома.
-Едното бебе врескаше, па веднаш ги зедов седиштата и ги внесов внатре. Ги загреавме и повикавме 911“, изјавил Дин за CBS4.
Температурата тој ден била само минус 2 °С, што ја правело ситуацијата уште поопасна.
Дин брзо ја известил полицијата, а украдениот автомобил во кој се наоѓале напуштените бебиња бил пронајден во близина. Полицијата истакнува дека исходот можел да биде многу потрагичен доколку Дин не реагирал навреме.
- Го направил она што би го направил секој добар човек. Ги спасил бебињата од студеното време. Не можам доволно да му се заблагодарам на тој добар Самарјанин“, изјави портпаролот на полицијата Вилијам Јанг.
Бебињата кои не се здобиле со никакви повреди се безбедни и на топло благодарение на овој народен херој. Дин, кој имал роденден тој ден, изјавил дека тоа било најдобриот подарок за него.
- Јас би го направил повторно ова. Ако видите нешто, на пример, бебе во ров, кажете нешто, направете нешто – порачува тој.
- Немаме осомничени во притвор, но тоа ќе ни биде следен приоритет, изјавил Јанг.
Овој инцидент потсетува на слични инциденти што се случиле во изминатава година, вклучувајќи ги и оние бебиња беа оставени во украдени автомобили, што укажува на растечкиот проблем со кражбата на возилата и загрозувањето на безбедноста на децата.