Тој синоќа упати критики на адреса на судството и обвинителство и вети правда и одговорност таму каде што ја нема. Според него процесот на прочистување нема да зависи од нечија политичка волја, туку единствено од законот и Уставот.

-Ги слушам лажните храбрења на Филипче, зад кои убеден сум дека стои само стравот од соочување со одговорност. Тоа се изјавите: „Еве, година и пол помина од Владата, а никој не одговара и никој не се плаши.“ Вистината е дека има над 80 пријави кои седат во фиоките на обвинителството, а клучот на тие фиоки седи некаде на „Бихаќка“. Тој клуч ќе се добие и ќе се отвори по овие избори, а јас најавувам ресет на системот и длабоки реформи. Нема да има конечна правда додека законот не ги допре и тие во судството и обвинителството, кажа Мицкоски.

Според лидерот на СДСМ Венко Филипче, пак, Мицкоски се однесува како опозиционер, а власта покажала целосна неспособност и чувство за државност, без, како што рече, резултати и визија. Филипче од Прилеп ги одби повиците од лидерот на ЗНАМ, Максим Димитриевски за соочување на ТВ дуел.

-Слушам Максим Димитриевски, пиунот на Мицкоски, барал дуел со мене. Јас со предавници на социјалдемократската идеја и подизведувачи на ВМРО-ДПМНЕ не дебатирам. Дали Максим се плаши дека е пуштен низ вода откако еднократно го искористија, тоа ли е стравот? Или пак стравот е затоа што е разоткриен од граѓаните. Мицкоски во своите говори нема што да каже. Се однесува како опозиционер после година и пол власт. Немаат проекти, немаат план, немаат идеја. И затоа измислуваат предавници, непријатели, куферчиња и приказни за мали деца, рече Филипче.

Филипче нема никакви социјадемократски вредности, бидејќи времето го поминува во луксуз, раскош на јахти и во скапи автомобили, му возврати денеска Димитриевски на лидерот на СДСМ. Тој повторно го повика Филипче на ТВ дуел, за како што кажа, пред јавноста да ги соочат аргументите и фактите.

– Во континуитет поддржан од неговиот политички гуру – Зоран Заев, не може да биде човек што ќе ја претствува социјалдемократијата. Истиот ниту знае со колкав имот располага, ниту може самиот становите да си ги преброи, па оставам на јавноста да процени дали тој е вистински социјалдемократ. За жал, една некогаш државотворна партија каква што беше СДСМ денес се сведува под 100.000 гласови и секојдневно ја напуштаат сите нејзини вистински членови и се придружуваат на ЗНАМ, изјави Димитриевски.

Изборната кампања е влезена во второто полувреме. На десетина дена пред денот на гласањето во неа преовладуваат жестоки обвинувања и пораки меѓу лидерите од власта и опозицијата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.