Традиционално здодевните конгресни избори, овој пат, се очекува да експлодираат со незапаметен одѕив во последните 50 години и се поради еден човек – Доналд Трамп.
Досега предвремено гласале над 35 милиони Американци, што е за 67 отсто повеќе од 2014-та.
Влогот е голем, а самиот Трамп синоќа одржа три завршни митинзи во Охајо, Индијана и Мисури од каде имаше една порака – се што постигнавме е на коцка.
-Кој се ќе гласа во вторник?! Контрастот на овие избори не може да биде појасен. Демократите создаваат банди, републиканците создаваат работни места., изјави Доналд Трамп, претседател на САД.
Историјата не е на страната на Трамп, затоа што партијата на актуелниот претседател секогаш губела на овие избори.
Анкетите недвосмислено упатуваат на тоа дека Демократите со сигурност ќе ја повратат контролата во Претставничкиот дом, а Републиканците на Трамп сепак да го задржат Сенатот. Во таков случај, и функционирањето на Трамп ќе биде сериозно ограничено, а подобар резултат на Демократите може да покрене и процес за импичмент на претседателот.
-Најважно е тоа што карактерот на земјата е на избирачкото ливче. Кој сме ние, е на ливчето. Каква политика да очекуваме е на гласачкото ливче., изјави Барак Обама, поранешен претседател на САД.
На денешните избори се гласа за 435 членови на Претставничкиот дом на Конгресот и за 35 од вкупно стоте места во Сенатот, кои се под контрола на Републиканците. Исходот во најголем дел ќе зависи од тоа колку Трамп упеал да ја промени Америка и да профитира од поделеноста на општеството.
-Она што е сигурно е дека изборите во 2020-та почнуваат во среда. Ќе уследи кампања од речиси две години, за време на која, сите политики ќе се гледаат низ призма на тоа – дали Доналд Трамп ќе има потенцијал да биде реизбрани, изјави Фернандо Лагурда, аналитичар
Последното истражување на Ројтерс покажаа дека 52 проценти од Американците не се согласуваат со политиките на Трамп.